នគរបាលបង្ក្រាបកុបកម្ម បំបែកការតវ៉ា ជុំវិញឧបទ្ទវហេតុរថភ្លើងបណ្តាលឲ្យមានមនុស្សស្លាប់ច្រើន នៅប្រទេសក្រិក

គ្រាប់បែកសាំង ត្រូវបានគប់ទៅលើនគរបាលក្នុងទីក្រុង Athens ខណៈប្រជាជនក្រិក កាលពីថ្ងៃសុក្របានបន្តធ្វើកូដកម្មក្នុងការតវ៉ានៅទូទាំងប្រទេសដែលប្រារព្ធខួបលើកទី២នៃឧបទ្ទវហេតុរថភ្លើងបណ្តាលឲ្យមានមនុស្សស្លាប់ច្រើនបំផុតនៅប្រទេសនេះ។ មនុស្ស៥៧នាក់បានស្លាប់ នៅពេលដែលរថភ្លើងដឹកអ្នកដំណើរមួយគ្រឿង បានបុកជាមួយរថភ្លើងដឹកទំនិញមួយគ្រឿងផ្សេងទៀត កាលពីថ្ងៃទី២៨ ខែកុម្ភៈ ឆ្នាំ ២០២៣ នៅ ប្រទេសក្រិកភាគកណ្តាល។

នៅក្នុងបាតុកម្មធំបំផុតមួយនៅក្នុងប្រទេសក្រិកក្នុងរយៈពេលជាច្រើនឆ្នាំមកនេះ សេវាកម្មសាធារណៈ និងអាជីវកម្មឯកជនជាច្រើន រួមទាំងជើងហោះហើរអន្តរជាតិ និងក្នុងស្រុកទាំងអស់ ត្រូវបានបញ្ឈប់។

នៅទូទាំងប្រទេស ប្រជាជនបានចេញធ្វើបាតុកម្មតាមដងផ្លូវដោយស្រែកថា «ឃាតក» ប្រឆាំងនឹងអ្វីដែលពួកគេនិយាយថាជាតួនាទីរបស់រដ្ឋនៅក្នុងមហន្តរាយនេះ។

នគរបាលបង្ក្រាបកុបកម្ម បានបាញ់ឧស្ម័នបង្ហៀរទឹកភ្នែក និងកាណុងបាញ់ទឹក ខណៈក្រោយមកមានការប៉ះទង្គិចគ្នា បានរាលដាលចូលទៅក្នុងសង្កាត់ជុំវិញនោះ។ អាជ្ញាធរបាននិយាយថា មនុស្សជាង៨០ នាក់ត្រូវបានឃុំខ្លួន និង៥ នាក់បានរងរបួសនៅក្នុងទីក្រុង Athens តែមួយ។