អាកាសចរស៊ីវិលកំពុងរៀបចំគម្រោងផ្ទេរព្រលានយន្តហោះចាស់ មកទីតាំងថ្មីនាពេលខាងមុខ

ឯកឧត្តម សយ សុខាន់ រដ្ឋលេខាធិការនៃលេខាធិការដ្ឋានអាកាសចរស៊ីវិល បានឱ្យដឹងថា គម្រោងនៃការផ្ទេរអាកាសយាន្តដ្ឋានចាស់ (ព្រលានយន្តហោះអន្តរជាតិភ្នំពេញ) មកកាន់ទីតាំងថ្មី គឺអាកាសយានដ្ឋានអន្តរជាតិតេជោ ក្រុងតាខ្មៅ កំពុងតែរៀបចំនឹងគ្រោងផ្ទេរនាពេលខាងមុខនេះ ខណៈព្រលានយន្តហោះថ្មីគ្រោងនឹងបើកដំណើរការជាផ្លូវការនៅខែកក្កដា ឆ្នាំ២០២៥នេះ។

មានប្រសាសន៍ប្រាប់ក្រុមអ្នកសារព័ត៌មាន ក្រោយចប់កិច្ចប្រជុំបូកសរុបវឌ្ឍនភាពគម្រោងការសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F កាលពីថ្ងៃទី២៨ ខែកុម្ភៈ ឆ្នាំ២០២៥កន្លងទៅ ឯកឧត្តមរដ្ឋលេខាធិការ បានលើកឡើងថា ទាក់ទងនឹងការងារផ្ទេរនេះ ក្រុមការងារកំពុងតែរៀបចំផែនការ ដែលខាងលេខាធិការដ្ឋានអាកាសចរស៊ីវិល សហការជាមួយនឹងក្រុមហ៊ុនមបូឌា អ៊ែរផត អ៊ិនវេសមិន ឯ.ក (CAIC) និងភ្នាក់ងាររាជរដ្ឋាភិបាល សមត្ថកិច្ចច្រកទ្វារទាំងអស់ បានរៀបចំផែនការផ្ទេរដោយបានកំណត់កាលបរិច្ឆេទរួចរាល់ហើយផងដែរ ដែលនឹងធ្វើមុនពេលបើកដំណើរការអាកាសយានដ្ឋានថ្មី ដែលអាចចុងខែមិថុនា ឬដើមខែកក្កដា។

ឯកឧត្តម សយ សុខាន់ បានពន្យល់បន្ថែមថា ចាប់ពីឥឡូវនេះ ក្រុមការងារសិក្សា និងរៀបចំផែនការដើម្បីផ្ទេរ ហើយការផ្ទេរនេះគឺផ្ទេរប្រតិបត្តិការពីចាស់មកថ្មី ដូចជាបុគ្គលិក ក្រុមហ៊ុនអាកាសចរណ៍ (airline) និងភ្នាក់ងារទាំងអស់ដើម្បីបំពេញកិច្ចការងារនៅទីតាំងថ្មីនេះ។ ឯកឧត្តម បានឲ្យដឹងទៀតថា កិច្ចការងារផ្ទេរនេះ គឺជាកិច្ចការងារសំខាន់ណាស់ ជាពិសេសទាក់ទងអាកាសចរណ៍ស៊ីវិលនេះ មិនមែនជាការងារផ្ទេរមួយដែលងាយស្រួលនោះទេ ព្រោះវាទាក់ទងនឹងសន្តិសុខ សុវត្ថិភាពប្រតិបត្តិការទាំងអស់ មានន័យថា កិច្ចប្រតិបត្តិការអាកាសយានទាក់ទងនឹង airline កិច្ចប្រតិបត្តិការនាំផ្លូវអាកាស ហើយនឹងកិច្ចសហប្រតិបត្តិការសម្រាប់អាកាសយានដ្ឋានផង។

សូមបញ្ជាក់ថា មកដល់ពេលនេះ អាកាសយានដ្ឋានអន្តរជាតិតេជោ ក្រុងតាខ្មៅ សម្រេចការសាងសង់ប្រមាណជាង ៩៤% នឹងគ្រោងដាក់ឲ្យដំណើរការជាផ្លូវការនៅខែកក្កដា ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕ អត្ថបទ៖ ឈិត បូរ៉ាវី