លោក Zelenskiy ឆ្លើយតបដោយពាក្យ «អរគុណ» លើបណ្ដាញសង្គម X ក្រោយមានជម្លោះជាមួយលោក Trump

ប្រធានាធិបតីអ៊ុយក្រែន លោក Volodymyr Zelenskiy បានឆ្លើយតបជាមួយនឹងពាក្យ «អរគុណ» ជាច្រើន តាមរយៈការបង្ហោះនៅទូទាំងគណនីបណ្ដាញសង្គម «X» ផ្លូវការរបស់លោក បន្ទាប់ពីត្រូវបានចោទប្រកាន់ដោយអនុប្រធានាធិបតីអាមេរិក លោក JD Vance ថា លោកមិនបាននិយាយពាក្យ «អរគុណ» អំឡុងដំណើរទស្សនកិច្ច នៅសេតវិមាន កាលពីព្រឹកថ្ងៃសុក្រ (ទី២៨ ខែកុម្ភៈ)។

កិច្ចប្រជុំរបស់លោក Zelenskiy ជាមួយលោក Trump និងលោក Vance បានបញ្ចប់ទៅដោយភាពរញ៉េរញ៉ៃ បន្ទាប់ពីមានការប្រើពាក្យសំដីខ្លាំងៗដាក់គ្នាទៅវិញទៅមក នៅចំពោះមុខប្រព័ន្ធផ្សព្វផ្សាយពិភពលោក នៅឯសេតវិមាន ជុំវិញសង្គ្រាមជាមួយរុស្ស៊ី។

លោក Vance បានលើកឡើងថា វាគឺជាការមិនផ្ដល់ក្ដីគោរពនោះឡើយ ដែលលោក Zelenskiy មកការិយាល័យ Oval Office ហើយអះអាងពីគោលជំហររបស់គាត់ ដើម្បីឲ្យលោក Trump យល់ស្របតាម។ លោក Vance បាននិយាយថា «អ្នកមិនបាននិយាយអរគុណនោះទេ»។ អមដោយការដំឡើងសំឡេងខ្លាំងជាងធម្មតា លោក Zelenskiy បានឆ្លើយតបថា «ខ្ញុំបាននិយាយជាច្រើនដងមកហើយនូវពាក្យអរគុណ ចំពោះប្រជាជនអាមេរិក»។

គួរបញ្ជាក់ថា ដំណើរទស្សនកិច្ចរបស់លោក Zelenskiy ត្រូវបានរៀបចំឡើង ដើម្បីជួយអ៊ុយក្រែនបញ្ចុះបញ្ចូលសហរដ្ឋអាមេរិកកុំឲ្យឈរនៅខាងប្រធានាធិបតីរុស្ស៊ីលោក Vladimir Putin ដែលបានបញ្ជាឲ្យមានការលុកលុយលើអ៊ុយក្រែន កាលពី ៣ឆ្នាំមុន។ តែផ្ទុយទៅវិញ មេដឹកនាំអ៊ុយក្រែនមិនយល់ស្របយ៉ាងខ្លាំងជាមួយលោក Trump និងលោក Vance ជុំវិញជម្លោះនេះ ដោយគូសបញ្ជាក់អំពីថា តើការផ្លាស់ប្តូររដ្ឋបាល នៅទីក្រុងវ៉ាស៊ីនតោន បានធ្វើឲ្យខូចយ៉ាងដូចម្ដេចដល់ការប៉ុនប៉ងរបស់ទីក្រុងគីវ ដែលចង់ឲ្យលោកខាងលិចបន្តគាំទ្រដល់កិច្ចប្រឹងប្រែងធ្វើសង្គ្រាមរបស់ខ្លួន៕