អាមេរិកគ្រោងមានកិច្ចព្រមព្រៀងអាវុធ ៣ពាន់លានដុល្លារ ជាមួយអ៊ីស្រាអែល ចំពេលមានក្ដីបារម្ភពីបទឈប់បាញ់

មន្ទីរបញ្ចកោណ កាលពីថ្ងៃសុក្រ (ទី២៨ ខែកុម្ភៈ) បានឲ្យដឹងនៅក្នុងសេចក្តីថ្លែងការណ៍ថា ក្រសួងការបរទេសអាមេរិក បានយល់ព្រមលើការលក់ដែលអាចកើតមានតម្លៃជិត ៣ពាន់លានដុល្លារ នូវគ្រាប់បែក ឧបករណ៍កម្ទេច និងសព្វាវុធផ្សេងទៀតដល់អ៊ីស្រាអែល។

លទ្ធភាពនៃការលក់អាវុធនេះ ត្រូវបានជូនដំណឹងទៅសភា កាលពីរសៀលថ្ងៃទី២៨ ខែកុម្ភៈ ដោយផ្នែកលើមូលដ្ឋានស្ថានភាពបន្ទាន់។ ដំណើរការនោះបានរំលងការអនុវត្តជាយូរមកហើយ ក្នុងការផ្ដល់ឲ្យប្រធាន និងសមាជិកជាន់ខ្ពស់នៃគណៈកម្មាធិការកិច្ចការបរទេសរបស់សភា និងព្រឹទ្ធសភានូវឱកាស ដើម្បីត្រួតពិនិត្យការលក់ និងសួរព័ត៌មានបន្ថែម មុនពេលធ្វើការជូនដំណឹងជាផ្លូវការទៅកាន់សភា។

កាលពីថ្ងៃទី២៤ ខែកុម្ភៈ រដ្ឋបាលរបស់លោក Donald Trump បានលុបចោលក្រឹត្យសម័យលោក Joe Biden ដែលតម្រូវឲ្យមានការរាយការណ៍ អំពីការរំលោភលើច្បាប់អន្តរជាតិរបស់សម្ព័ន្ធមិត្ត ពាក់ព័ន្ធនឹងអាវុធដែលផ្គត់ផ្គង់ដោយសហរដ្ឋអាមេរិក ក្នុងនោះរួមទាំងអ៊ីស្រាអែលផងដែរ។

កិច្ចព្រមព្រៀងបទឈប់បាញ់ រវាងអ៊ីស្រាអែល និងក្រុមហាម៉ាស កាលពីខែមុន បានបញ្ឈប់ការប្រយុទ្ធគ្នារយៈពេល ១៥ខែ និងបានបើកផ្លូវឲ្យមានកិច្ចពិភាក្សា ស្តីពីការបញ្ចប់សង្គ្រាម ស្របពេលដែលនាំឲ្យមានការដោះលែងចំណាប់ថ្នូរអ៊ីស្រាអែលចំនួន ៤៤នាក់ដែលត្រូវបានឃុំខ្លួន នៅតំបន់ហ្កាហ្សា ជាថ្នូរនឹងអ្នកទោសប៉ាឡេស្ទីនប្រហែល ២.០០០នាក់ដែលត្រូវបានឃុំខ្លួនដោយអ៊ីស្រាអែល។

តែទោះបីជាយ៉ាងណាក៏ដោយ អ៊ីស្រាអែល និងក្រុមហាម៉ាស បានចោទប្រកាន់គ្នាទៅវិញទៅមកថា បានរំលោភលើបទឈប់បាញ់ ដោយបានផ្ដល់ភាពមិនច្បាស់លាស់ ចំពោះដំណាក់កាលទី២ នៃកិច្ចព្រមព្រៀងនេះ ដែលមានបំណងរួមបញ្ចូលទាំងការដោះលែងចំណាប់ថ្នូរ និងអ្នកទោសបន្ថែមទៀត ព្រមទាំងជំហានឆ្ពោះទៅរកការបញ្ចប់សង្រ្គាមជាអចិន្ត្រៃយ៍៕