សម្ដេចធិបតី៖ ឱ្យតាមដានជាប់លាប់ចំពោះការប្រើប្រាស់សេវា ប.ស.ស របស់ពលរដ្ឋ កុំឱ្យមានការរើសអើង

ក្នុងឱកាសអញ្ជើញសម្ពោធដាក់ឱ្យប្រើប្រាស់ទារកដ្ឋានរោងចក្រកាត់ដេរម៉ាវ៉ល ស្ថិតនៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ នៅព្រឹកថ្ងៃទី១០ ខែមីនា ឆ្នាំ២០២៥នេះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំដល់រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ និងរដ្ឋមន្រ្ដីក្រសួងសុខាភិបាល ត្រូវតាមដានឱ្យបានជាប់លាប់ចំពោះការប្រើប្រាស់សេវា ប.ស.ស របស់ប្រជាពលរដ្ឋ ដើម្បីធ្វើយ៉ាងណាកុំឱ្យមានការរើសអើងចំពោះប្រជាពលរដ្ឋដែលប្រើប្រាស់សេវានេះ។

ក្នុងឱកាសនោះសម្តេចធិបតី បានថ្លែងថា បណ្ណ ប.ស.ស មានអត្ថប្រយោជន៍ច្រើនដល់បងប្អូនកម្មករ ទាំងពេលមានជំងឺ និងមានគ្រោះថ្នាក់អ្វីក៏ដោយ គឺ ប.ស.ស ជាអ្នករ៉ាប់រងទាំងអស់។

សម្តេចធិបតី បន្តថា គោលនយោបាយជួយឧបត្ថម្ភដល់ស្រ្តីមានផ្ទៃពោះ រហូតដល់មានកូន គឺជានយោបាយរបស់សម្តេចតេជោ ហើយបន្តរហូតដល់រាជរដ្ឋាភិបាលថ្មី អាណត្តិទី៧ គឺជានយោបាយដ៏ល្អជួយដល់ស្រ្តីរបស់ ​និងកម្មការិនីមានផ្ទៃពោះ។

ឆ្លើយតបនឹងសំណួររបស់សម្តេចធិបតី ហ៊ុន ម៉ាណែត, កម្មការិនី ដែលបានជួបជុំជាមួយសម្ដេចធិបតីនាព្រឹកនេះ បានថ្លែងថា ការប្រើប្រាស់ បណ្ណ ប.ស.ស គឺមានភាពងាយស្រួល និងការផ្ដល់សេវាសុខាភិបាល ​នៅតាមបណ្តាមណ្ឌលសុខភាព មាន​ភាពល្អប្រសើរ បើទោះបីកាន់ បណ្ណ ប.ស.ស ក៏ដោយគឺគ្រូពេទ្យមានភាពរួសរ៉ាយរាក់ មិនមានការរើសអើងដល់ប្រជាពលរដ្ឋឡើយ។

ក្នុងឱកាសនោះដែរសម្ដេចធិបតីនាយករដ្ឋមន្រ្ដី បានមានប្រសាសន៍ថា រាជរដ្ឋាភិបាលអាណត្តិទី៧ បានបន្តគោលនយោបាយអត្ថប្រយោជន៍ដល់ស្រ្តីមានផ្ទៃពោះ ​និងមានកូនរហូតដល់២ឆ្នាំ។ សម្ដេច បានបញ្ជាក់ថា ​បច្ចុប្បន្នកម្មករនិយោជិតបានទទួលប្រាក់ឈ្នួលអប្បបរមា ២០៨ ដុល្លារអាមេរិក, ប្រាក់ឈ្នួលខ្ពស់បំផុត ៧០០ ដុល្លារ, ប្រាក់ឈ្នួលមធ្យម ៤៣០ ដុល្លារ និងប្រាក់ឈ្នួលទាបបំផុត ២៥៤ ដុល្លារ។ បន្ថែមពីលើនេះ កម្មករ និយោជិត​ ក៏ទទួលបានប្រាក់អត្ថប្រយោជន៍ផ្សេងៗ ដូចជា​ប្រាក់រង្វាន់ធ្វើការទៀងទាត់ចំនួន ១៦ដុល្លារ, ប្រាក់សោហ៊ុយធ្វើដំណើរចំនួន ១៩ ដុល្លារ, ប្រាក់រង្វាន់​អតីតភាពការងារពី ២ ដុល្លារ ទៅ ១១ដុល្លារក្នុងមួយខែ, ប្រាក់ឧបត្ថម្ភប្រាក់ចំនួន ៥ ដុល្លារ​ក្នុងមួយខែក្នុងទារកម្នាក់ រហូតដល់អាយុ ៣៦ ខែ (សម្រាប់អ្នកដែលមិនយកកូនមកដាក់​ក្នុងទារកដ្ឋាន) ជាដើម៕ អត្ថបទ៖ វ៉ន ដារ៉ា