គណៈប្រតិភូរុស្ស៊ី និងអាមេរិក ត្រៀមជួបគ្នាក្នុងទីក្រុងមូស្គូ សម្រាប់កិច្ចចរចាបទឈប់បាញ់អ៊ុយក្រែន

បេសកជនពិសេសរបស់ប្រធានាធិបតីអាមេរិក លោក Donald Trump កំពុងបំពេញទស្សនកិច្ចនៅប្រទេសរុស្ស៊ី ខណៈទីក្រុងវ៉ាស៊ីនតោន និងទីក្រុងមូស្គូ បានឈានចូលដល់ពេលវេលាដ៏លំបាកក្នុងកិច្ចព្រមព្រៀងបទឈប់បាញ់ដែលនឹងបញ្ឈប់សង្គ្រាមជាបណ្តោះអាសន្ន៣០ថ្ងៃ នៅអ៊ុយក្រែន។

អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់កាលពីថ្ងៃព្រហស្បតិ៍សប្ដាហ៍នេះថា គណៈប្រតិភូអាមេរិកនឹងចូលរួមពិភាក្សាជាមួយសមភាគីរុស្ស៊ី ខណៈទីភ្នាក់ងារព័ត៌មានរដ្ឋ TASS របស់រុស្ស៊ីបានរាយការណ៍ថាបេសកជនមជ្ឈិមបូព៌ារបស់លោកប្រធានាធិបតី Trump គឺលោក Steve Witkoff បានមកដល់ទីក្រុងមូស្គូកាលពីថ្ងៃព្រហស្បតិ៍ មុនកិច្ចប្រជុំរបស់លោកជាមួយប្រធានាធិបតីរុស្ស៊ីលោក Vladimir Putin ។

ការវិវឌ្ឍន៍នេះ បានកើតឡើងទន្ទឹមរុស្ស៊ីបានអះអាងកាលពីថ្ងៃព្រហស្បតិ៍ថាបានដណ្តើមយកមកវិញនូវទឹកដីសំខាន់ៗនៅក្នុងតំបន់ Kursk ពីអ៊ុយក្រែនជាសញ្ញាបង្ហាញពីភាពខ្លាំងរបស់ខ្លួនក្នុងការចរចា។

លោកWitkoff បេសកជនមជ្ឈិមបូព៌ារបស់លោក Trump បាននិងកំពុងដើរតួនាទីកាន់តែខ្លាំងក្លាក្នុងកិច្ចខិតខំប្រឹងប្រែងដើម្បីបញ្ចប់សង្គ្រាមអ៊ុយក្រែនរយៈពេលជាងបីឆ្នាំមកនេះ។

លោក Trump បាននិយាយកាលពីថ្ងៃពុធថា ឈានដល់ដំណាកកាលនេះគឺអាស្រ័យលើប្រទេសរុស្ស៊ី ខណៈរដ្ឋបាលរបស់លោកបានជំរុញឱ្យទីក្រុងមូស្គូយល់ព្រមចំពោះសំណើសម្រាប់បទឈប់បាញ់រយៈពេល ៣០ ថ្ងៃដែលអ៊ុយក្រែនបាននិយាយថាខ្លួននឹងគាំទ្រ។

ជាការឆ្លើយតបពីរុស្ស៊ី លោក Putin បាននិយាយថា លោកគាំទ្របទឈប់បាញ់ជាមួយអ៊ុយក្រែន តែនៅមានបញ្ហាជាច្រើនទៀតដែលត្រូវពិភាក្សាជាមួយលោក Trump៕