[BREAKING NEWS ]អ្នកដំណើរត្រូវបានជម្លៀសចេញតាមស្លាបយន្តហោះរបស់ក្រុមហ៊ុនអាកាសចរណ៍ American Airlines បន្ទាប់ពីម៉ាស៊ីនឆេះនៅអាកាសយានដ្ឋាន Denver

អ្នកដំណើររាប់សិបនាក់ត្រូវបានបង្ខំឱ្យដើរលើស្លាបយន្តហោះរបស់ក្រុមហ៊ុនអាកាសចរណ៍ American Airlines នៅឯអាកាសយានដ្ឋានអន្តរជាតិ Denver ខណៈពួកគេត្រូវបានជម្លៀសចេញពីយន្តហោះ បន្ទាប់ពីម៉ាស៊ីនមួយបានឆេះកាលពីល្ងាចថ្ងៃព្រហស្បតិ៍ស្ដាហ៍នេះ។

រដ្ឋបាលអាកាសចរណ៍សហព័ន្ធបាននិយាយនៅក្នុងសេចក្តីថ្លែងការណ៍មួយថា ជើងហោះហើរ American Airlines Flight 1006 ដែលជាយន្តហោះ Boeing 737-800 កំពុងធ្វើដំណើរទៅកាន់ តំបន់ Dallas-Fort Worth នៃរដ្ឋ Texas ពីទីក្រុង Colorado Springs ដោយមានដំណើរ ១៧២ នាក់ និងក្រុមអាកាសយានិក៦ នាក់នៅលើនោះ បានបង្វែរផ្លូវទៅក្រុង Denver នៅម៉ោង ៥:១៥នាទី ល្ងាច ម៉ោងក្នុងស្រុក បន្ទាប់ពីអាកាសយានិក បានរាយការណ៍ពីការ “រំញ័រម៉ាស៊ីន” ។ សេចក្តីថ្លែងការណ៍បានបន្តថាបន្ទាប់ពីចុះចត ម៉ាស៊ីនបានឆេះ។

អ្នកនាំពាក្យអាកាសយានដ្ឋានអន្តរជាតិ Denver បានប្រាប់ទូរទស្សន៍ CNN ថា យន្តហោះបានមកដល់ច្រកទ្វារ C38 ជាកន្លែងដែលម៉ាស៊ីនយន្តហោះបានឆេះ។ អ្នកនាំពាក្យដដែលបាននិយាយថា ភ្លើងត្រូវបានពន្លត់ ហើយអ្នកដំណើរទាំងអស់ត្រូវបានជម្លៀសចេញ។

អ្នកនាំពាក្យរបស់ក្រុមហ៊ុនអាកាសចរណ៍អាមេរិកអ៊ែរឡាញ មួយរូបបានប្រាប់ទូរទស្សន៍ CNN ថា អ្នកដំណើរ៦នាក់ត្រូវបានបញ្ជូនទៅមន្ទីរពេទ្យដើម្បីពិនិត្យបន្ថែមទៀត៕