អាជ្ញាធរស្រុកបាទី បន្តចុះផ្សព្វផ្សាយផលប៉ះពាល់គ្រឿងញៀន ច្បាប់ចរាចរណ៍ និងអនាម័យបរិស្ថាន នៅតាមវិទ្យាល័យ

តាកែវ ៖ នៅព្រឹកទី១៧ ខែមីនា ឆ្នាំ២០២៥ លោក ហង្ស វិច្ឆិការាស្សី អភិបាលរងស្រុកបាទី តំណាងលោក ភួន ឈីម អភិបាលស្រុកបាទី និងជាប្រធានគណៈបញ្ជាការឯកភាពរស្រុក បានអញ្ជើញដឹកនាំលោក លោកស្រី នាយករដ្ឋបាលស្រុក កម្លាំងនគរបាលស្រុក កងរាជអាវុធស្រុក ភាគីពាក់ព័ន្ធ និងអាជ្ញាធរមូលដ្ឋាន បន្តចុះផ្សព្វផ្សាយពីផលប៉ះពាល់គ្រឿងញៀន ច្បាប់ចរាចរណ៍ផ្លូវគោក និងបញ្ហាបរិស្ថានបរិស្ថានដល់ក្មួយៗជាសិស្សានុសិស្ស នៅវិទ្យាល័យ ឈើទាលជ្រំ ឃុំក្រាំងលាវ ស្រុកបាទី ខេត្តតាកែវ។

លោក ហង្ស វិច្ឆិការាស្សី អភិបាលរងស្រុកបាទី បានផ្តាំផ្ញើ និងជំរុញឱ្យក្មួយៗសិស្សានុសិស្សត្រូវខិតខំប្រឹងប្រែងរៀនសូត្រ ជៀសវាងឱ្យផុតនូវអបាយមុខផ្សេងៗ ហើយឆ្លើយទេគ្រប់កាលៈទេសៈ និងមួយជីវិត ចំពោះគ្រឿងញៀន។ លោកបន្ថែមថា នៅប៉ុន្មានខែខាងមុខទៀត សម័យប្រឡងឆ្នាំសិក្សា ២០២៤~២០២៥ សម្រាប់ក្មួយៗសិស្សានុសិស្សថ្នាក់ទី១២ ដូច្នេះត្រូវស្វ័យសិក្សាបន្ថែមទៀត ដើម្បីឈានយកនិទ្ទេសល្អ គឺនិទ្ទេស A,B,C ដើម្បីជាកិត្តិយសសម្រាប់ខ្លួនឯង ក្រុមគ្រួសារ សាលារៀនក្មួយៗសិស្សានុសិស្ស មិងជាចំណេះសម្រាប់អនាគត៕