កម្ពុជាបើកយុទ្ធនាការហែលទឹកទន្លេមេគង្គជាលើកដំបូងចម្ងាយ ១២០គីឡូម៉ែត្រ ដើម្បីលើកកម្ពស់ការយល់ដឹងអំពីសត្វផ្សោត

ភ្នំពេញ៖ ក្រុមការងារអភិរក្សរបស់ប្រទេសកម្ពុជា និងអន្តរជាតិ បាននឹងកំពុងចាប់​ផ្តើម​យុទ្ធនាការ​ហែល​ទឹក​ទន្លេមេគង្គ ដែលមានចម្ងាយ ១២០គីឡូម៉ែត្រ ចាប់ពីថ្ងៃទី១៧ ដល់ថ្ងៃទី២០ ខែមីនា ឆ្នាំ​២០២៥ ដើម្បីលើកកម្ពស់ការយល់ដឹងអំពីសត្វផ្សោត ដែលជាប្រភេទជិតផុតពូជនៅកម្ពុជា និង​ចូលរួមកៀរគរមូលនិធិសម្រាប់ការអភិរក្ស។

នៅក្នុងសេចក្តីប្រកាសព័ត៌មាន យុទ្ធនាការហែលទឹកទន្លេមេគង្គ ដែលមានចម្ងាយ ១២០​គីឡូម៉ែត្រ ចេញផ្សាយនៅព្រឹកថ្ងៃទី១៧ ខែមីនានេះ បានសសេរឲ្យដឹងថា សត្វផ្សោត ប្រឈម​នឹង​ហានិភ័យ​នៃ​ការផុតពូជ ដែលបច្ចុប្បន្នវត្តមានរបស់សត្វផ្សោតមាននៅក្នុងចម្ងាយ១២០គីឡូម៉ែត្រ រវាង ខេត្តស្ទឹងត្រែង និងក្រចេះ។ ខណៈពេលដែលកិច្ចខិតខំប្រឹងប្រែងអភិរក្ស ដែលកំពុង​បន្ត​នេះ​បាន​ជួយ​ធ្វើឱ្យចំនួនរបស់វាមានស្ថេរភាព ប៉ុន្តែការគំរា​ម​កំហែង​ក៏​នៅ​តែ​បន្ត​បង្ក​គ្រោះថ្នា​ក់​ដល់​ចំនួ​ន​សត្វ​ផ្សោតទឹកសាបនេះ ដូចជាការជាប់ទៅនឹងនៅក្នុងឧបករណ៍នេសាទដោយចៃដន្យ ការបាត់​បង់​ទី​ជម្រក និងការនេសាទខុសច្បាប់ជាដើម។

ប្រភពដដែល បានឲ្យដឹងទៀតថា ក្នុងរយៈពេល ៤ថ្ងៃនេះ ក្រុមអ្នក​ហែល​ទឹក​នឹង​បន្ត​ហែ​ល​តាម​ដង​ទន្លេមេគង្គ អមដំណើរដោយក្រុមសុវត្ថិភាពជិះទូកកាយ៉ាក និងទូកឆ្នាំទន្លេដើម្បីជួយគាំទ្រសកម្មភាពហែលទឹក។ បេសកកម្មនេះ មិនត្រឹមតែបង្ហាញពីការស៊ូទ្រាំ និងការលះបង់របស់អ្នកចូលរួមប៉ុណ្ណោះទេ ប៉ុន្តែថែមទាំងជាឱកាសមួយ ដើម្បីកត់ត្រាមើលសត្វផ្សោត កំណត់អត្តសញ្ញាណនៃការគំរាមកំហែងនានា និងប្រមូលយកសំណាកទាំងឡាយដែលអាចបង្កគ្រោះថ្នាក់ និងដកហូតម៉ង នេសាទដែលបោះបង់ចោលចេញពីទន្លេ។

គួរបញ្ជាក់ថា នៅឆ្នាំ២០១៦ សត្វផ្សោតនៅក្នុងអន្លង់ឈើទាលកៀកជាប់ទៅនឹងព្រំប្រទល់កម្ពុជា-ឡាវត្រូវបាន ប្រកាសថាផុតពូជ ដែលត្រូវបានកត់ត្រានៅឆ្នាំ២០២២ ។ ការបាត់បង់នេះបង្ហាញពីចំណាត់ការជាបន្ទាន់ដើម្បីការពារផ្សោតដែលនៅសេសសល់ក្នុងទន្លេមេគង្គ។ ប្រសិនបើមិនធ្វើសកម្មភាពឥឡូវនេះទេ នោះនឹងប្រឈមនឹងការបាត់បង់សត្វដ៏អស្ចារ្យទាំងនេះជារៀងរហូត៕