រដ្ឋមន្រ្តីក្រសួងអប់រំ៖ជំនឿជាកត្តាមួយជំរុញឲ្យមនុស្សពីសម័យបុរាណអាចសាងសង់ប្រាសាទផ្សេងៗបាន

ភ្នំពេញ ៖ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយយរដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ជំនឿជាកត្តាមួយធ្វើឲ្យមនុស្សក្នុងសម័យបុរាណអាចសាងសង់ប្រាសាទអង្គរវត្ត និងប្រាសាទផ្សេងៗទៀត ប៉ុន្តែការលូតលាស់វប្បធម៌ខ្មែរហូរចូលតាមដំណាក់កាល។

ការថ្លែងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី បានធ្វើឡើងក្នុងពិធីបិទវេទិកាស្តីពី «ទំនៀមជំនុំច្បាប់ខ្មែរ៖ ទស្សនវិជ្ជាច្បាប់បែបប្រពៃណី» ស្ថិតនៅសាលាភូមិន្ទរដ្ឋបាល នារសៀលថ្ងៃទី១៨ខែមីនានេះ ដោយមានការចូលរួមពីថ្នាក់ដឹកនាំក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំសាលាភូមិន្ទរដ្ឋបាល នៃក្រសួងមុខងារសាធារណៈ សិស្សមន្រ្តីជាន់ខ្ពស់ និងក្រមការ ព្រមទាំងថ្នាក់ដឹកនាំស្ថាប័នពាក់ព័ន្ធនានា។

នៅក្នុងអង្គវេទិកា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយយរដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងបន្តថា បើនិយាយពីប្រព័ន្ឋច្បាប់កាលពីសម័យបុរាណគឺបញ្ចូលក្នុងសាសនាដែលធ្វើឲ្យមនុស្សក្នុងសម័យនោះ មានជំនឿ ធ្វើបុណ្យបានបុណ្យ ធ្វើបាបបានបាប ប៉ុន្តែប្រព័ន្ឋច្បាប់នេះបានវិវត្តពីសម័យកាលមួយទៅសម័យកាលមួយទៀត រហូតមកដល់បច្ចុប្បន្ននេះប្រទេសកម្ពុជាបានទទួលរងឥទ្ឋិពលប្រព័ន្ឋច្បាប់ពីប្រទេសបារាំង។

គួរបញ្ជាក់ដែរថា វេទិកាស្តីពី «ទំនៀមជំនុំច្បាប់ខ្មែរ៖ ទស្សនវិជ្ជាច្បាប់បែបប្រពៃណី»រៀបចំដោយក្រុមប្រឹក្សានីតិកម្មនៃក្រសួងសេដ្ឋកិច្ចនិងហិរញ្ញវត្ថុ និងសាលាភូមិន្ទរដ្ឋបាលនៃក្រសួងមុខងារសាធារណៈ ក្នុងគោលបំណង ផ្សព្វផ្សាយនូវ កម្រងឯកសារសិក្សាស្រាវជ្រាវអំពីទស្សនវិជ្ជាច្បាប់ខ្មែរពីបុរាណ និងជាការរួមចំណែកក្នុងការរក្សាការពារ អត្តសញ្ញាណ និងវប្បធម៌ខ្មែរជាដើម។អត្ថបទ៖ទូច សោភ័ណ​