កម្ពុជាផ្សព្វផ្សាយពីសក្តានុពលកាលានុវត្តភាព វិនិយោគ និងទេសចរណ៍​ដល់ធុរកិច្ច​ក្នុង​ខេត្តហ៊ឺណាន

កម្ពុជាចូលរួមសន្និសីទផ្លាស់ប្តូរសេដ្ឋកិច្ច ពាណិជ្ជកម្ម វប្បធម៌ និងទេសចរណ៍នៅប្រទេសចិន ក្នុង​គោល​បំណងផ្សព្វផ្សាយអំពី សក្តានុពល និងកាលានុវត្តភាព វិនិយោគ និងទេសចរណ៍នៅកម្ពុជា ដល់​សហគមន៍ធុរកិច្ច ដែលមានមូលដ្ឋាននៅក្នុងខេត្តហ៊ឺណាន។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី១៨ ខែមីនា ឆ្នាំ ២០២៥ ម្សិលមិញនេះ បានដឹកនាំ​គណៈ​ប្រតិភូ​កម្ពុជា​ចូល​រួម​សន្និសីទ រៀបចំឡើងនៅខេត្តហឺណានប្រទេសចិន ក្នុងនោះឯកឧត្តម ឧបនាយករដ្ឋមន្ត្រី បាន​រំលេច​អំពី​សក្តានុពលវិជ្ជមានរបស់កម្ពុជារួមមាន៖ ស្ថិរភាពនយោបាយ, ស្ថានភាព​ម៉ាក្រូ​សេដ្ឋកិច្ច​ដែល​មាន​លំនឹងវិជ្ជមាន, កម្លាំងពលកម្មវ័យក្មេងប្រកបដោយថាមវន្ត, រាជរដ្ឋាភិបាល​គាំទ្រ​ដល់​វិស័យ​ឯកជន​, របបវិនិយោគដែលមានភាពទាក់ ទាញ និងអនុគ្រោះ, និងហេដ្ឋារចនា​សម្ព័ន្ធ​អន្ត​រ​មធ្យោបាយ​ដែលបាននិងកំពុងអភិវឌ្ឍឱ្យកាន់តែមានភាពតភ្ជាប់ និងប្រទាក់ក្រឡា។

ក្នុង​សន្និសីទនេះ, ឯកឧត្តមឧបនាយករដ្ឋមន្ត្រី បានបង្ហាញនូវសុទិដ្ឋិនិយមយ៉ាងមុតមាំថា វិនិយោគិន និងធុរជន នៅខេត្តហឺ ណាន នឹងអញ្ជើញមកសិក្សាស្វែងយល់ដោយផ្ទាល់នៅកម្ពុជា និង​បាន​ពាំនាំនូវបច្ចុប្បន្នភាពនៃបរិយាកាសវិនិយោគនៅកម្ពុជា ទៅកាន់ សហគមន៍​ធុរកិច្ច​ខេត្ត​ហ៊ឺណាន ឱ្យកាន់តែទូលំទូលាយបន្ថែមមួយកម្រិតទៀតផងដែរ។

សូមជម្រាបជូនថា កិច្ចសហប្រតិបត្តិការរវាងប្រទេសកម្ពុជា-ខេត្តហ៊ឺណាន មានឯកសារ​ចំនួន​២​រួម​មាន​៖ (១) អនុស្សរណៈ នៃការយោគយល់គ្នា រវាងក្រុមហ៊ុនអាកាសចរណ៍ជាតិកម្ពុជា ជាមួយ​នឹង​សាលា​គុនកុងហ្វូ តេងហ្វេងយ៉ានលូ នៃសំណាក់សៅលីង និង មហាវិទ្យាល័យ​បណ្តុះ​បណ្តាល​វិជ្ជា​ជីវៈ​អប់រំកាយ ក្រុងចឹងចូវ, និង (២) លិខិតសម្តែង​បំណង​បណ្តាក់​ទុន​វិនិយោគ​របស់​ក្រុម​ហ៊ុន Zhengzhou Agricultural Development Group ត្រូវបានចុះហត្ថលេខាក្រោមសក្ខីភាព ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។

នៅក្នុងថ្ងៃដ៏ដែលនេះដែរ, ឯកឧត្តម ស៊ុន ចាន់ថុល បានជំនួបសម្តែងការគួរសម និង​ពិភាក្សា​ការងារ ជាមួយឯកឧត្តម An Wei លេខាបក្សប្រចាំក្រុងចឹងចូវ ក្នុងគោល​បំណង​ពិភាក្សា​អំពី​លទ្ធភាព​នៃ​ការពង្រឹង និងពង្រីកកិច្ចសហប្រតិបត្តិការលើវិស័យ វិនិយោគនិង​ទេសចរណ៍​រវាង​ប្រទេស​ទាំង​ពីរ ក្នុងជំនួបនេះ, ឯកឧត្តមលេខាបក្សប្រចាំក្រុងចឹងចូវ បានថ្លែងនូវសេចក្តី​ស្វាគមន៍​យ៉ាង​កក់ក្តៅដល់គណៈប្រតិភូកម្ពុជា និងបានជម្រាបគណៈប្រតិភូ អំពីវឌ្ឍន​ភាព​ថ្មីៗ​នៃ​ការ​អភិវឌ្ឍ​ក្រុង​ចឹងចូវ ដែលជាទីប្រសព្វរវាងវប្បធម៌ បុរាណ និងសហសម័យ។ ចំណែក​ទាក់​ទិន​ការ​វិនិយោគ ឯកឧត្តមបង្ហាញសុទិដ្ឋិនិយមថា ដំណើរបេសកកម្មនាពេលនេះ នឹងអាចទាក់ ទាញ​នូវ​គម្រោង​វិនិយោគជាច្រើនពីខេត្តហឺណាន ឱ្យទៅបណ្តាក់ទុនវិនិយោគនៅកម្ពុជាបន្ថែមទៀត។

ជាការឆ្លើយតប ឯកឧត្តមឧបនាយករដ្ឋមន្ត្រី បានថ្លែងអំណរគុណសមភាគី សម្រាប់​បដិសណ្ឋារ​កិច្ច​យ៉ាង​កក់ក្តៅ ដល់គណៈ ប្រតិភូកម្ពុជានាឱកាសបំពេញបេសកកម្មជំរុញ និងទាក់ទាញ​វិនិយោគ​ខេត្ត​ហ៊ឺណាន នេះបេសកកម្មក្រៅប្រទេសដំបូងគេបង្អស់ប្រចាំ ឆ្នាំ២០២៥ របស់​ក្រុម​ប្រឹក្សា​អភិវឌ្ឍន៍កម្ពុជា។ ឯកឧត្តមឧបនាយករដ្ឋមន្ត្រី បានកោតសរសើរសម្រាប់ការអភិវឌ្ឍសង្គម សេដ្ឋកិច្ច យ៉ាង ឆាប់រហ័សរបស់ក្រុងចឹងចូវ ដែលជាមជ្ឈមណ្ឌលសេដ្ឋកិច្ច និងឧស្សា​ហកម្ម​ដ៏​សំខាន់​ នៅតាមបណ្តោយទន្លេលឿងរបស់ខេត្ត៕ អត្ថបទ៖ សុន រ៉ាឌី