ប្រធានធនាគារអភិវឌ្ឍន៍អាស៊ី មានសុទិដ្ឋិនិយមចំពោះវិស័យអប់រំ នៅក្នុងប្រទេសកម្ពុជា

ប្រធានធនាគារអភិវឌ្ឍន៍អាស៊ី (ADB) បានបង្ហាញសុទិដ្ឋិនិយមចំពោះវិស័យអប់រំនៅក្នុងប្រទេស កម្ពុជា ដែលជាមូលដ្ឋានគ្រឹះនៃការអភិវឌ្ឍប្រទេសជាតិ ។

លោក Masato Kanda ប្រធានធនាគារអភិវឌ្ឍន៍អាស៊ី (ADB) នៅថ្ងៃទី១៩ ខែមីនា នេះ បានដឹកនាំក្រុមគណៈប្រតិភូធនាគារADB ចុះទស្សនកិច្ចនៅវិទ្យាល័យហ៊ុន សែន ចំការដូង ក្នុងខេត្តកែប ដែលជាសាលាមធ្យមសិក្សាធនធានគោលដៅមួយ ក្រោមការគាំទ្ររបស់គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ (USESDP-II)។ ដំណើរទស្សនកិច្ចនេះ ធ្វើឡើងក្នុងគោលបំណងជួបជាមួយនាយកសាលា គ្រូបង្រៀន និងសិស្សានុសិស្ស ដើម្បីស្វែងយល់ពីផលជះ និងសមិទ្ធផលដែលសម្រេចបានពីការអនុវត្តគម្រោង។

ក្នុងដំណើរទស្សនៈកិច្ច លោក Masato Kanda ប្រធានធនាគារអភិវឌ្ឍន៍អាស៊ី បានកោតសរសើរ​ចំពោះ​កិច្ចខិតខំប្រឹងប្រែងរបស់ថ្នាក់ដឹកនាំសាលារៀន គ្រូបង្រៀន និងសិស្សានុសិស្ស ដែលធ្វើ​ឲ្យសាលារៀនមានការអភិវឌ្ឍរីកចម្រើនតាមរយៈការជួយគាំទ្រពី ADB។លើសពីនេះ លោកមានសុទិដ្ឋិនិយមថាវិស័យអប់រំនៅក្នុងប្រទេសកម្ពុជានឹងមានភាពរីកចម្រើនជាបន្តបន្ទាប់។

លោក ឡុង សោភា នាយកវិទ្យាល័យ ហ៊ុន សែនចំការដូង បានឱ្យដឹងថា តាមរយៈជំនួយ​របស់​ធនាគារ ADB បានជួយពង្រឹងគុណភាពគ្រូបង្រៀន សិស្ស ហេដ្ឋារចនាសម្ព័ន្ធ និងសំភារៈផ្សេងៗ​ទៀត​បំរើដល់ការសិក្សាបែប STEM។ ជាមួយគ្នានេះ សិស្សបានអរគុណដល់ធនាគារ ADB និងដៃគូពាក់ព័ន្ធនានាទៀត ដែលបានជួយ សាលារៀនពួកគេឲ្យមានភាពរីកចម្រើនរីកចម្រើន និងបានប្តេជ្ញាខិតខំប្រឹងប្រែងរៀនសូត្រ។

គួរបញ្ជាក់ដែរថា គម្រោងអភិវឌ្ឍន៍វិស័យ​អប់រំមធ្យមសិក្សាទុតិយភូមិទី២ គឺជាផ្នែកមួយនៃការគាំទ្រ​របស់ធនាគារអភិវឌ្ឍន៍អាស៊ី (ADB) ទៅលើការអប់រំនៅមធ្យមសិក្សាទុតិយភូមិ និងការកសាង​បន្ថែម​លើចំណុចខ្វះខាតរបស់គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិជំហានទី១។ គម្រោងនេះ​ ទទួលបានថវិកាសរុបចំនួន ៥៣,៥លានដុល្លា ក្នុងនោះហិរញ្ញប្បទាន​ជា​កម្ចីពីADBចំនួន១៥លានដុល្លា,ហិរញ្ញប្បទានជាជំនួយឥតសំណងពីADBចំនួន៣៥លានដុល្លារ និងវិភាគទានពីរាជរដ្ឋាភិបាលចំនួន៣.៥លានដុល្លារ។ គម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិទី២ ត្រូវអនុវត្តរយៈពេល៦ឆ្នាំ គិតចាប់ពីខែធ្នូ ឆ្នាំ២០១៨ ដល់ខែមិថុនា ឆ្នាំ២០២៥ ដើម្បីបង្កើននូវប្រសិទ្ធភាព នៃការអប់រំនៅមធ្យមសិក្សាទុតិយភូមិ៕អត្ថបទ៖ទូច សោភ័ណ