នគរបាលរាជធានីភ្នំពេញ បើកវគ្គបណ្តុះបណ្តាលបំប៉នជំនាញ ស្តីពីយុទ្ធសាស្រ្តបន្សាបព័ត៌មានក្លែងក្លាយ និងព័ត៌មានមិនពិត

ភ្នំពេញ៖ នគរបាលនៃស្នងការដ្ឋាននគរបាលរាជធានីភ្នំពេញ បើកវគ្គបណ្តុះបណ្តាលបំប៉នជំនាញ ស្តីពីយុទ្ធសាស្រ្តបន្សាបព័ត៌មានក្លែងក្លាយនិងព័ត៌មានមិនពិត មានសិក្ខាកាមសរុបចំនួន៥០នាក់ ធ្វើឡើងនៅស្នងការដ្ឋាននគរបាលរាជធានីភ្នំពេញ។

វគ្គបណ្តុះបណ្តាលបំប៉នជំនាញ បានធ្វើឡើង នាព្រឹកថ្ងៃទី២០ ខែមីនា ឆ្នាំ២០២៥ ដោយ មានការដឹកនាំចង្អុលបង្ហាញពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ចាត់ឲ្យលោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានធ្វើបទបង្ហាញវគ្គបណ្តុះបណ្តាលបំប៉នជំនាញ ស្តីពីយុទ្ធសាស្ត្របន្សាបព័ត៌មានក្លែងក្លាយ និងប្រយុទ្ធប្រឆាំង ការឆ្លើយតបព័ត៌មានក្លែងក្លាយ ព័ត៌មានមិនពិត ដល់ក្រុមការងារព័ត៌មាន និងប្រតិកម្មរហ័ស តាមបណ្តាផែនការងារជំនាញ និងអធិការដ្ឋាននគរបាលខណ្ឌទាំង១៤ សរុបចំនួន៥០នាក់។

លោកវរសេនីយ៍ឯក អ្នកនាំពាក្យបញ្ជាក់ថា វគ្គបណ្តុះបណ្តាលនេះ សំដៅលើការពង្រីក​ចំណេះ​ជំនាញក្នុងការគ្រប់គ្រង​ តាមដានឆ្លើយតប ​បកស្រាយដើម្បីបន្សាបព័ត៌មាន ក្លែងក្លាយ ព័ត៌មាន​មិនពិត នៅលើតាមបណ្តាញសង្គមឱ្យមានប្រសិទ្ធភាព ​កុំឲ្យប្រជាពលរដ្ឋមានការយល់ច្រឡំ ជាពិសេស​ការគ្រប់គ្រង​សតិអារម្មណ៍របស់​ប្រជាពលរដ្ឋក្នុងការទទួល​បានព័ត៌មានពិត និងការ​សម្រេចចិត្តដ៏ត្រឹមត្រូវ ​ដើម្បីទប់ស្កាត់កុំឲ្យមានការជឿជាក់ខ្វះការពិចារណា ដែល​អាចធ្វើការ​សម្រចិត្តខុស​បង្កជះឥទ្ធិពល​អាក្រក់​ណាមួយនៅក្នុងសង្គម រឺ​នៅក្នុងជីវភាពប្រចាំថ្ងៃនៅពេល​ដែល​ប្រជាពលរដ្ឋទទួលបានព័ត៌មាន ​ក្លែងក្លាយ​ ព័ត៌មានមិនពិត ពីការបង្កើតឡើងដោយ​ក្រុមទុច្ចរិតណាមួយនោះ។

លោកវរសេនីយ៍ឯក សំ វិច្ឆិកា អ្នកនាំពាក្យ ​បានសង្កត់ធ្ងន់ថា វគ្គបណ្តុះបណ្តាលបំប៉ន​ជំនាញនេះ​សិក្សាលើមេរៀន ទី១ ការយល់ដឹងពីព័ត៌មានក្លែងក្លាយ ​និងព័ត៌មានពិត។ទី២.ភាពខុសគ្នារវាង​ព័ត៌មានក្លែងក្លាយ និងព័ត៌មានពិត។និងទី៣. យុទ្ធសាស្ត្របន្សាបព័ត៌មានក្លែងក្លាយ និងព័ត៌មានមិនពិត៕ អត្ថបទ៖ កុម្ភៈ