សម្តេចតេជោ៖ មានបក្សខ្លះព្យាយាមបំបែកបំបាក់ផ្ទៃក្នុងបក្សប្រជាជន ប៉ុន្តែផ្ទុយទៅវិញបែកបាក់ខ្លួនឯងវិញ

ភ្នំពេញ៖ សម្ដេចតេជោ ហ៊ុន សែន ប្រមុខរដ្ឋស្តីទី និងនាយឧត្តមសេនីយ៍ផុតលេខផ្កាយមាស៥ និងជាប្រធានគណបក្សប្រជាជនកម្ពុជា បានផ្ដាំទៅក្រុមប្រឆាំង ឬគណបក្សណាក៏ដោយ សូមកុំបន្តព្យាយាមបំបែកផ្ទៃក្នុង គណបក្សប្រជាជនកម្ពុជាឲ្យសោះ ដោយសម្តេច បានលើកឡើងថា ការព្យាយាមរបស់ក្រុមទាំងនោះ គឺមិនអាចទៅរួចនោះទេ ខណៈគណបក្សប្រជាជនកម្ពុជា គឺបានដើរស៊ីសង្វាក់គ្នាណាស់។

ថ្លែងពិធីបំពាក់ឋានន្តរសក្តិ ថ្នាក់នាយឧត្តមសេនីយ៍ផុតលេខផ្កាយមាស៥ជូនសម្ដេចពិជ័យសេនា ទៀ បាញ់ និងសម្តេចកិត្តិសង្គហបណ្ឌិត​ ម៉ែន​ សំអន​ នាព្រឹកថ្ងៃទី២១ ខែមីនា ឆ្នាំ២០២៥នេះ សម្តេចតេជោ ហ៊ុន សែន បានបញ្ជាក់ថា សូមប្រាប់ទៅក្រុមប្រឆាំង​ កុំគិត​ព្យាយាម​ចង់បំបែកផ្ទៃក្នុង​ថ្នាក់​ដឹកនាំ​គណបក្សប្រជាជនកម្ពុជា​បន្តទៀតអី ដោយកាលពីកន្លងទៅ​មានគណបក្ស​នយោបាយ​ច្រើនហើយ ដែលបានព្យាយាមធ្វើឱ្យគណកប្សប្រជាជនកម្ពុជា​បែកបាក់សាមគ្គីគ្នា ប៉ុន្តែផ្ទុយទៅវិញ​ត្រូវបានបែកបាក់ខ្លួនឯងវិញ។

សម្តេចតេជោ បានសង្កត់ធ្ងន់ថា«ពួកអ្នកត្រូវចាំ យល់ល្អទុកឲ្យទៅតាមដំណើរធម្មជាតិទៅ ប៉ុន្តែពួកអ្នក​ឯងគ្មានសមត្ថភាពទេ…ផ្ទុយទៅវិញពួកអ្នកឯងបែក​ខ្លួនឯង​មិនចាំបាច់ខ្ញុំ​ទៅបំបែកនោះទេ។ ពេលណាពួកគណបក្សប្រជាជន​កម្ពុជា​រដ្ឋាភិបាលរឹង ​ពេលនោះ​ហើយ​ដែល​សត្រូវរបស់យើង នឹងបែកបាក់ដោយខ្លួនឯង»។

សម្តេចតេជោ ហ៊ុន សែន ប្រមុខរដ្ឋស្តីទី ក៏បានបង្ហើបឲ្យដឹងផងដែរថា ​កាលពីកន្លងទៅមានបុគ្គល មួយចំនួន​ក៏បានព្យាយាម​ធ្វើការបំបែកបំបាកសាមគ្គីរវាងសម្តេច និងសម្តេច ជា ស៊ីម , សម្តេច ស ខេង ផងដែរ ប៉ុន្តែការព្យាយាមបំបែកនេះ គឺមិនអាចទៅរួចនោះទេ ដោយ​សម្តេច​បានចាត់ទុក​ថា«សិល្បៈពួកទាំងនោះ បានលូតខុសសង្វាក់ ​ខណៈខាងនេះ (ខាងគណបក្សប្រជាជនកម្ពុជា) គឺរាំស្លូរ រាំចង្វាក់ក្បាច់អ្វីនោះ ​គឺត្រូវក្បួនគ្នាខ្លាំងណាស់​ពួក​អ្នកមើលមិនស្គាល់ និងមើលមិនយល់​នោះទេ»៕អត្ថបទបាន ចក់