[UPDATE] ចំនួនអ្នកស្លាប់ដោយសាររញ្ជួយដីនៅមីយ៉ាន់ម៉ា កើនឡើងដល់ជាង ១.០០០នាក់

របបយោធាដែលកំពុងកាន់អំណាចបាននិយាយនៅថ្ងៃសៅរ៍សប្ដាហ៍នេះថា ចំនួនអ្នកស្លាប់ដោយសារការរញ្ជួយដីដ៏ធំមួយនៅក្នុងសហភាពមីយ៉ាន់ម៉ាបានឡើងដល់ជាង១.០០០នាក់នាក់ហើយ និងជាង ២.០០០ នាក់ទៀតរងរបួស។

សេចក្តីថ្លែងការណ៍មួយពីក្រុមព័ត៌មានរបស់របបយោធាបាននិយាយថា មនុស្សចំនួន១.០០២នាក់ត្រូវបានគេដឹងថាបានស្លាប់នៅក្នុងការរញ្ជួយដីកម្រិត៧,៧រ៉ិចទ័រកាលពីថ្ងៃសុក្រ និង ២.៣៧៦នាក់បានរងរបួស។

គ្រោះរញ្ជួយដីបានវាយប្រហារភាគពាយព្យនៃទីក្រុង Sagaing ក្នុងភាគកណ្តាលរបស់សហភាពមីយ៉ាន់ម៉ា ដែលបណ្តាលឱ្យមានការបំផ្លិចបំផ្លាញយ៉ាងធំធេងនៅទូទាំងផ្នែកធំៗនៃប្រទេសនេះ។

ស្ថានភពគ្រាអាសន្នត្រូវបានប្រកាសនៅក្នុងតំបន់ចំនួនប្រាំមួយ រួមទាំងទីក្រុង Mandalay ដែលជាទីក្រុងធំបំផុតទីពីររបស់ប្រទេសនេះ ដែលនៅជិតនឹងចំណុចកណ្តាលនៃការរញ្ជួយ និងជាទីដែលមានការបំផ្លិចបំផ្លាញដ៏ធំត្រូវបានគេមើលឃើញ។

ក្រុមព័ត៌មានរបបយោធាបាននិយាយនៅក្នុងសេចក្តីថ្លែងការណ៍មួយថា ការស្លាប់ចំនួន៦៩៤ នាក់ ត្រូវបានបញ្ជាក់នៅក្នុងតំបន់ Mandalay តែមួយគត់ ទន្ទឹមនឹងមនុស្ស ១.៦៧០នាក់ បានរងរបួស ៕