ក្រុមឧទ្ទាម៖ យោធាមីយ៉ាន់ម៉ា នៅតែទម្លាក់គ្រាប់បែកលើតំបន់នានា ទោះមានវិបត្តិរញ្ជួយដីក៏ដោយ

ចលនាតស៊ូប្រដាប់អាវុធប្រឆាំងនឹងរដ្ឋាភិបាលដែលគ្រប់គ្រងដោយយោធា របស់សហភាពមីយ៉ាន់ម៉ា បានរិះគន់របបសឹកកាលពីថ្ងៃអាទិត្យ (៣០ មីនា) សម្រាប់ការធ្វើការវាយប្រហារតាមអាកាសទៅលើតំបន់នានា ខណៈពេលដែលប្រទេសនេះស្ថិតក្នុងវិបត្តិគ្រោះរញ្ជួយដី ដែលបានសម្លាប់មនុស្សជាង ១.៧០០នាក់ និងរាប់ពាន់នាក់របួស។

ក្រុមឧទ្ទាមការ៉ែន KNU ដែលជាកងទ័ពជនជាតិភាគតិចចំណាស់ជាងគេបំផុតមួយរបស់មីយ៉ាន់ម៉ា បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលរបបសឹក “បន្តធ្វើការវាយប្រហារតាមអាកាសសំដៅលើតំបន់ជនស៊ីវិល ទោះបីជាប្រជាជនកំពុងរងគ្រោះយ៉ាងខ្លាំងពីការរញ្ជួយដីក៏ដោយ”។

ក្រុមនេះបាននិយាយថា នៅក្រោមកាលៈទេសៈធម្មតា យោធានឹងផ្តល់អាទិភាពដល់កិច្ចខិតខំប្រឹងប្រែងសង្គ្រោះ ប៉ុន្តែផ្ទុយទៅវិញ របបនេះបែរជាផ្តោតលើ “ការដាក់ពង្រាយកងកម្លាំងដើម្បីវាយប្រហារប្រជាជនរបស់ខ្លួន”។ អ្នកនាំពាក្យរបបសឹក មិនបានឆ្លើយតបនឹងសំណើអត្ថាធិប្បាយលើការរិះគន់នេះទេ។

ភ្លាមៗបន្ទាប់ពីរញ្ជួយដីដ៏កាចសាហាវកាលពីថ្ងៃសុក្រសប្ដាហ៍មុន យន្តហោះយោធាបានបើកការវាយប្រហារតាមអាកាស និងការវាយប្រហារដោយយានដ្រូននៅក្នុងរដ្ឋ Karen ក្បែរទីស្នាក់ការកណ្តាលរបស់ក្រុម KNU នេះបើយោងតាមអង្គការសង្គ្រោះ FBR។ គួរឱ្យដឹងថា មីយ៉ាន់ម៉ាកំពុងជាប់គាំងក្នុងសង្គ្រាមស៊ីវិលជាមួយក្រុមប្រឆាំងប្រដាប់អាវុធជាច្រើន ចាប់តាំងពីរដ្ឋប្រហារឆ្នាំ២០២១មក នៅពេលយោធាបានដណ្តើមអំណាចពីរដ្ឋាភិបាលជាប់ឆ្នោត៕