UN ព្រមានពីការអស់ឱកាសសម្រាប់អ្នករួចជីវិតពីគ្រោះរញ្ជួយដីមីយ៉ាន់ម៉ា ខណៈចំនួនអ្នកស្លាប់កើនឡើងជិត៣.០០០នាក់

ក្រុមផ្តល់ជំនួយនៅសហភាពមីយ៉ាន់ម៉ាកាលពីថ្ងៃអង្គារ ១ មេសា បានពណ៌នាពីទិដ្ឋភាពនៃការបំផ្លិចបំផ្លាញ និងភាពអស់សង្ឃឹមបន្ទាប់ពីការរញ្ជួយដីដែលបានសម្លាប់មនុស្សជាង២.៧០០នាក់ ដោយសង្កត់ធ្ងន់ទៅលើតម្រូវការបន្ទាន់សម្រាប់អាហារ ទឹក និងទីជម្រក ហើយព្រមានថាឱកាសដើម្បីស្វែងរកអ្នកនៅរស់រានមានជីវិត ត្រូវបានបិទយ៉ាងឆាប់រហ័ស ក្រោយពេល៧២ម៉ោងកន្លងផុតទៅ។

មេដឹកនាំយោធាមីយ៉ាន់ម៉ា លោក Min Aung Hlaing បាននិយាយថា ចំនួនអ្នកស្លាប់ដោយសារគ្រោះរញ្ជួយដីកម្រិត ៧.៧ រ៉ិចទ័រ កាលពីថ្ងៃសុក្រសប្ដាហ៍មុន ត្រូវបានគេរំពឹងថានឹងកើនលើស៣.០០០នាក់ ខណៈចំនួនអ្នកស្លាប់បានឡើងដល់២.៧១៩នាក់ គិតត្រឹមព្រឹកថ្ងៃអង្គារសប្ដាហ៍នេះ ដោយមនុស្សចំនួន ៤.៥២១នាក់បានរងរបួស និង ៤៤១នាក់បាត់ខ្លួន។

លោកបាននិយាយនៅក្នុងសុន្ទរកថាមួយថា ក្នុងចំណោមអ្នកបាត់ខ្លួន ភាគច្រើនត្រូវបានគេសន្មត់ថាបានស្លាប់។ មានឱកាសតិចតួចបំផុតសម្រាប់ពួកគេដែលអាចនៅរស់។

ការរញ្ជួយដីដែលបានវាយប្រហារនៅពេលអាហារថ្ងៃត្រង់កាលពីថ្ងៃសុក្រ គឺជាកម្លាំងខ្លាំងបំផុតដែលបានវាយប្រហារប្រទេសអាស៊ីអាគ្នេយ៍មួយនេះ ក្នុងរយៈពេលជាងមួយសតវត្សរ៍ ដោយបានបំផ្លិចបំផ្លាញវត្តបុរាណ និងអគារទំនើបៗជាច្រើន។

គ្រោះមហន្តរាយនេះ បានបង្កការខូចខាតយ៉ាងធ្ងន់ធ្ងរទៅលើទីក្រុងធំបំផុតទី២ Mandalay និងណៃពីដោ(Naypyitaw)របស់ប្រទេសមីយ៉ាន់ម៉ា ជារដ្ឋធានីនៃគោលបំណងរបស់របបយោធាកាលពីកន្លងទៅ ដែលត្រូវបានសាងសង់ឡើងដើម្បីធ្វើជាបន្ទាយយោធា។

ការរញ្ជួយដីគឺជាការវាយប្រហារចុងក្រោយសម្រាប់ប្រទេសក្រីក្រដែលមានប្រជាជនចំនួន ៥៣ លាននាក់ បន្ទាប់ពីរដ្ឋប្រហារឆ្នាំ២០២១ ដែលបានធ្វើឲ្យរបបសឹកក្ដាប់អំណាចឡើងវិញ និងបំផ្លិចបំផ្លាញសេដ្ឋកិច្ច បន្ទាប់ពីមួយទសវត្សរ៍នៃការអភិវឌ្ឍន៍ និងលទ្ធិប្រជាធិបតេយ្យក្មេងខ្ចី៕