ការស្ទង់មតិ WSJ៖ ពលរដ្ឋអាមេរិក មិនសប្បាយចិត្តនឹងផែនការសេដ្ឋកិច្ចរបស់លោក Trump

ការស្ទង់មតិពីសារព័ត៌មាន Wall Street Journal ហៅកាត់ថា WSJ បានបង្ហាញថា ជាងពាក់កណ្តាលនៃជនជាតិអាមេរិក មិនសប្បាយចិត្តនឹងគោលនយោបាយពន្ធរបស់រដ្ឋបាលថ្មី ពោលគឺប្រមាណ ៥២% មិនយល់ស្របលើការគ្រប់គ្រងសេដ្ឋកិច្ចរបស់លោកប្រធានាធិបតី Donald Trump ដែលកើនឡើង ១២% ពីការមិនគាំទ្រ នៅក្នុងខែតុលា ឆ្នាំ២០២៤។

នៅក្នុងការស្ទង់មតិ ដែល WSJ ចេញផ្សាយកាលពីថ្ងៃសុក្រ (០៤ មេសា) សប្ដាហ៍មុន បានបង្ហាញថា មនុស្សតែ ១ភាគ៤ ប៉ុណ្ណោះនិយាយថា ពួកគេយល់ស្របលើការគ្រប់គ្រងសេដ្ឋកិច្ចរបស់លោក Trump ក្នុងអំឡុងពេល ១០០ថ្ងៃដំបូងរបស់លោកនៅក្នុងតំណែងសេតវិមាន។

ទោះបីជាការស្ទង់មតិនេះត្រូវបានធ្វើឡើងមុនការប្រកាសរបស់លោក Trump អំពីពន្ធមូលដ្ឋាន ១០% លើទំនិញទាំងអស់ដែលចូលមកក្នុងអាមេរិកកាលពីដើមសប្តាហ៍នេះក៏ដោយ ប៉ុន្តែមេដឹកនាំរូបនេះធ្លាប់បានសន្យាយូរមកហើយថានឹងអនុវត្តពន្ធគយយ៉ាងទូលំទូលាយ ចាប់តាំងពីយុទ្ធនាការប្រធានាធិបតីឆ្នាំ២០២៤ របស់លោក។

តួលេខ ៣៥% នៃអ្នកចូលរួមការស្ទង់មតិបាននិយាយថា ភាពតានតឹងរយៈពេលខ្លីនឹងនាំឱ្យមានកំណើនផ្នែកហិរញ្ញវត្ថុក្នុងរយៈពេលវែង។ ប៉ុន្តែជនជាតិអាមេរិកកាន់តែច្រើន ប្រមាណ ៤៨% និយាយថា អ្នកប្រើប្រាស់នឹងមានអារម្មណ៍ឈឺចាប់ខាងសេដ្ឋកិច្ច មុនពេលមើលឃើញការកែលម្អតិចតួចពីការដំឡើងពន្ធទូលំទូលាយនោះ៕