ត្រីមាសទី១ ដើមឆ្នាំ២០២៥នេះ កម្ពុជារកប្រាក់ចំណូលពីការនាំចេញអង្ករបានជាង ១៦០លានដុល្លារអាម៉េរិក

ភ្នំពេញ៖ គិតក្នុងរយៈ ៣ខែដំបូង ដើមឆ្នាំ២០២៥នេះ កម្ពុជាសម្រេចបានការនាំចេញអង្ករទៅកាន់ទីផ្សារអន្តរជាតិចំនួន ២១១ ០៥៨តោន គិតជាទឹកប្រាក់បានចំនួន ១៦០.៥១លានដុល្លារសហរដ្ឋអាមេរិក។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា (ស.អ.ក)។

នៅក្នុងរបាយការណ៍ដែលផ្សាយនៅល្ងាចថ្ងៃទី១១ ខែមេសា ឆ្នាំ២០២៥នេះ សហព័ន្ធស្រូវអង្ករកម្ពុជា បានបង្ហាញឲ្យដឹងថា ទីផ្សារដែលជាគោលដៅរបស់កម្ពុជា ក្នុងការនាំចេញអង្ករទៅដាក់លក់នោះ មានចំនួន៥៥គោលដៅ នៅទូទាំងពិភពលោករបស់ក្រុមហ៊ុននាំចេញអង្ករចំនួន៤៧។ ក្នុងនោះមានដូចជា នៅប្រទេសក្នុងទ្វីបអឺរ៉ុបចំនួន២៥ សរុបចំនួន ១០៦ ៥១៣តោន គិតជាទឹកប្រាក់ចំនួន ៨៤.៨៣លានដុល្លារ។ ៤ប្រទេសសមាជិអាស៊ាន ចំនួន៣៤ ៩២៣តោន គិតជាទឹកប្រាក់ចំនួន ២៤.៩៥លានដុល្លារ, ប្រទេសចិន និងតំបន់រដ្ឋបាលស្វយ័ត ៣៧ ៨២១តោន គិតជាទឹកប្រាក់ចំនួន ២២.៥៩លានដុល្លារ និង២៤ប្រទេសផ្សេងៗទៀត អាហ្រ្វិក មជ្ឈឹមបូព៌ា ។ល។ ៣១ ៨០១តោន គិតជាទឹកប្រាក់ចំនួន ២៨.១៤លានដុល្លារ។

សហព័ន្ធស្រូវអង្ករកម្ពុជា បានឲ្យដឹងទៀតថា ចំពោះប្រភេទអង្ករនាំចេញ មានដូចជា អង្ករក្រអូបគ្រប់ប្រភេទ មានចំនួន ៨១.៣៨% , អង្ករសគ្រាប់វែង ១៣.៦០% , អង្ករចំហុយ ២.៦០% , អង្ករសរីរាង្គ ១.៩៣% និងអង្ករផ្សេងៗទៀត ០.៤៩%៕