សង្ក្រាន្តស្វាយរៀងរយៈពេល៣ថ្ងៃមានភ្ញៀវទេសចរនិងពលរដ្ឋជាង៦សែននាក់បានចូលមកលេងកម្សាន្តនៅក្នុងភូមិសាស្ត្រខេត្ត

ស្វាយរៀង ÷ យោងតាមរបាយការណ៍ដែលទូរទស្សន៍BTVទទួលបានពីលោកវ៉ាន់ សារ៉ាត់ ប្រធានមន្ទីរទេសចរខេត្តស្វាយរៀងបញ្ជាក់ឲ្យដឹងនៅថ្ងៃទី១៧ ខែមេសា ឆ្នាំ២០២៥នេះថា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ គ.ស ២០២៥ រយះពេល៣ថ្ងៃ ចាប់ពីថ្ងៃទី១៤.១៥ និងថ្ងៃទី១៦ ខែមេសា ឆ្នាំ២០២៥ ស្វាយរៀងមានភ្ញៀវទេសចរជាតិ និងអន្តរជាតិ ពិសេសយុវជន និងពលរដ្ឋ នៅក្នុងភូមិសាស្ត្រខេត្ត និងខេត្តជិតៗបានចូលមកលេងកម្សាន្តនៅតាមគោលដៅទេសចរណ៍សំខាន់ៗ និងកម្មវិធីសង្ក្រាន្តនានាក្នុងខេត្តស្វាយរៀង មានចំនួន៦សែន ៦ម៉ឺន ០ពាន់ ២៦៩នាក់,ក្នុងនោះបរទេសចំនួន ៧ពាន់់់់២៥៦នាក់។

សូមបញ្ជាក់ថាស្វាយរៀងក្នុងឱកាសបុណ្យចូលឆ្នាំថ្មីប្រពៃណីជាតិនៅឆ្នាំនេះក្រៅពីរដ្ឋបាលខេត្តរៀបចំទីតាំងរួមសម្រាប់ផ្តល់អោយភ្ញៀវ និងពលរដ្ឋចូលលេងកំសាន្ត និងរម្មណីយដ្ឋានធម្មជាតិចំនួន២កន្លែង ដែលបុព្វបុរសបានបន្សល់ទុកស្ថិតនៅក្នុងស្រុកស្វាយជ្រុំ និងស្រុករមាសហែក នូវមានសហភាពសហព័ន្ធយុវជនកម្ពុជា ក្រោមការចង្អុលណែនាំរបស់ឯកឧត្តមឌី វិទ្យា ប្រធានសហភាពសហព័ន្ធយុវជនកម្ពុជា និងជាអនុប្រធានថ្នាក់កណ្ដាលនិងរាជរដ្ឋាភិបាលចុះជួបខេត្តផងនោះសហភាពសហព័ន្ធយុវជនស្រុកក្រុងទាំង ៨របស់ខេត្ត បានសហការជាមួយរដ្ឋបាលមូលដ្ឋានរៀបចំទីតាំងសម្រាប់ផ្ដល់ឲ្យយុវជនយុវនារីនិងពលរដ្ឋចូលលេងសប្បាយបែបនេះ។

តាមរបាយការណ៍ របស់គណៈបញ្ជាការឯកភាពខេត្តក្នុងរយៈពេល ៣ថ្ងៃ នៃពិធីបុណ្យចូលឆ្នាំថ្មីប្រពៃណីជាតិ ស្វាយរៀង ពុំមាន បញ្ហាអសន្តិសុខគួរឲ្យកត់សម្គាល់នោះទេ ខណៈដែលមន្ត្រីមានសមត្ថកិច្ចនិងប្រជាការពារបានចូលរួមការពារទីតាំងលេងកំសាន្ត និងវត្តអារាមដោយការយកចិត្តទុកដាក់ ។