ពលរដ្ឋសម្តែងការអរគុណរាជរដ្ឋាភិបាលដែលបានប្រើប្រាស់រថយន្តក្រុងឥតគិតថ្លៃ ទាំងទៅនិងមក នាឱកាសបុណ្យចូលឆ្នាំ

ភ្នំពេញ៖ ខណៈដែលពិធីបុណ្យប្រពៃណីជាតិខ្មែរ ត្រូវបានបញ្ចប់ដោយភាពសម្បូរសប្បាយនៅទូទាំងរាជធានីខេត្ត នៃប្រទេសកម្ពុជា នៅព្រឹកថ្ងៃទី១៧ ខែមេសានេះ កម្មករនិយោជិត និងប្រជាពលរដ្ឋ បានវិលត្រឡប់ចូលរាជធានីភ្នំពេញដើម្បីចូលបំពេញការងារ និងប្រកបអាជីវកម្មឡើងវិញ ជាមួយនឹងទឹកមុខសប្បាយរីករាយ។ ជាមួយនេះ ប្រជាពលរដ្ឋបានថ្លែងអំណរគុណជូនចំពោះរាជរដ្ឋាភិបាល ដែលបានផ្ដល់រថយន្តក្រុងជូនទៅមកស្រុកកំណើតដោយឥតគិតថ្លៃផងដែរ។

លោក រឿន ណយ ពលរដ្ឋមកពីខេត្តតាកែវ បច្ចុប្បន្នជាបុគ្គលិកក្រុមហ៊ុនមួយនៅរាជធានីភ្នំពេញ នៅក្នុងបទសម្ភាសន៍ជាមួយព័ត៌មាន ប៊ីធីវី លោកបានបង្ហាញអារម្មណ៍សប្បាយរីករាយនៅពេលដែលបានធ្វើដំណើរទៅលេងស្រុកកំណើតតាមរយៈរថយន្តក្រុងដោយមិនគិតថ្លៃ ព្រោះបានជួយសម្រួលដល់ការចំណាយថវិកាមួយកម្រិត ខណៈកន្លងមករាល់ពេលធ្វើដំណើរទៅស្រុកកំណើតតាមរថយន្តឈ្នួលក្នុងឱកាសបុណ្យទាន យ៉ាងហោចណាស់ចំណាយប្រមាណ ២០ម៉ឺនរៀល សម្រាប់មនុស្ស២នាក់។ លោកបន្តថា ដូច្នេះគ្មានអ្វីក្រៅពីការអរគុណរាជរដ្ឋាភិបាល ដែលបានបញ្ចេញរថយន្តក្រុងឲ្យប្រជាពលរដ្ឋជិះដោយមិនគិតថ្លៃ ហើយក៏ចង់ឱ្យរាជរដ្ឋាភិបាលផ្តល់ជូនបែបនេះបន្តទៀត រាល់ពេលបុណ្យទានធំៗផងដែរ ដើម្បីជួយសម្រួលការចំណាយ។

ប្រជាពលរដ្ឋដទៃផ្សេងទៀត បាននិយាយស្រដៀងគ្នាថា តាមរយៈរថយន្តក្រុងឥតគិតថ្លៃនេះ ក្រៅពីកាត់បន្ថយការចំណាយថ្លៃធ្វើដំណើរ និងចំណេញថវិកាច្រើន ការធ្វើដំណើរគឺមានភាពងាយស្រួល ត្រជាក់ មិនចង្អៀតណែន ហើយមានសុវត្ថិភាពខ្ពស់ថែមទៀតក្រោមការយកចិត្តទុកដាក់ពីតៃកុងឡានគ្រប់ពេលវេលា។ ទាំងអស់នេះ ធ្វើឱ្យប្រជាពលរដ្ឋសប្បាយចិត្ត ហើយមានតែពាក្យអរគុណដល់រាជរដ្ឋាភិបាល ដែលតែងតែយកចិត្តទុកដាក់ខ្ពស់ និងបារម្ភអំពីសុខទុក្ខប្រជាពលរដ្ឋគ្រប់ស្រទាប់វណ្ណៈជានិច្ច ។

លោក ឡាំង សៀត បុគ្គលិករដ្ឋាករស្វយ័ត្នដឹកជញ្ជូនសាធារណៈនៃសាលារាជធានីភ្នំពេញ បានលើកឡើងថា ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ទោះបីជាមិនបានឈប់សម្រាកប៉ុន្តែលោកមានការសប្បាយចិត្ត ដែលបានចូលរួមបំពេញការងារសង្គមមួយនេះជូនដល់ប្រជាពលរដ្ឋ។ លោកក៏បានថ្លែងអំណរគុណដល់ប្រមុខរាជរដ្ឋាភិបាល ដែលតែងតែគិតគូរដល់ ប្រជាពលរដ្ឋតាមរយៈការផ្ដល់ឱ្យពលរដ្ឋបានជិះរថយន្តក្រុងឥតគិតថ្លៃក្នុងឱកាសបុណ្យចូលឆ្នាំខ្មែរ និងសម្តែងការជូនពរដល់ជនរួមជាតិទាំងអស់ធ្វើដំណើរត្រឡប់មកពីស្រុកកំណើតវិញប្រកបដោយសុខសុវត្ថិភាពគ្រប់ៗគ្នា។

សូមបញ្ជាក់ថា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៥នេះ រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ បានរៀបចំរថយន្តក្រុងសរុបចំនួន ៥៩៧គ្រឿង ដើម្បីបម្រើសេវាដឹកជញ្ជូនសាធារណៈឥតគិតថ្លៃ ក្នុងគោលបំណងដើម្បីជួយសម្រួល និងសម្រាលបន្ទុករបស់ប្រជាពលរដ្ឋក្នុងការធ្វើដំណើរទៅនិងមកស្រុកកំណើតនៅទូទាំងប្រទេស ដែលគិតចាប់ពីថ្ងៃទី១២ ដល់១៧ ខែមេសា ឆ្នាំ២០២៥៕អត្ថបទ៖ ឈិត បូរ៉ាវី