សម្តេចធិបតី៖ កត្តាសន្តិភាព និងស្ថិរភាពនយោបាយ ទើបក្រុមហ៊ុនរថយន្តអាមេរិក សម្រេចពង្រីកអាជីវកម្ម បន្ថែមនៅកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងថា ការដែលក្រុមហ៊ុនរថយន្តFordរបស់អាមេរិកសម្រេចពង្រីកអាជីវកម្មបន្ថែមនៅកម្ពុជា ដោយសារតែក្រុមហ៊ុនមួយនេះជឿជាក់លើ កត្តាសុខសន្តិភាព និងស្ថិរភាពនយោបាយនៅកម្ពុជា ដូច្នេះរាជរដ្ឋាភិបាលដឹកនាំដោយគណបក្សប្រជាជនកម្ពុជាត្រូវតែការពារ និងថែរក្សាឲ្យខាងតែបាននូវសុខសន្តិភាពនេះ។

ក្នុងឱកាសអញ្ជើញជាអធិបតីសម្ពោធដាក់ឱ្យដំណើរការខ្សែសង្វាក់ផលិតកម្មថ្មី និងរោងចក្រដំឡើងគ្រឿងបង្គុំរថយន្ត Ford នៅខេត្តពោធិ៍សាត់ នាថ្ងៃទី២២ ខែមេសា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានលើកឡើងថា ក្រុមហ៊ុនFordពីមុននាំចូលគ្រឿងបង្គុំរថយន្តពីក្រៅប្រទេសចូលមកកម្ពុជា ដើម្បីផ្គុំចេញជារថយន្ត ប៉ុន្តែបច្ចុប្បន្នក្រុមហ៊ុនបានឈានដល់កម្រិតផលិតគ្រឿងបង្គុំនៅកម្ពុជាដោយកាត់បន្ថយការនាំចូលទាំងស្រុងដូចមុនទៀត ដូច្នេះហើយការពង្រីកអាជីវកម្មបន្ថែមនេះនឹងនាំការងារ ដល់បងប្អូន ប្រជាពលរដ្ឋខ្មែរកាន់តែច្រើនបន្ថែមទៀត។

ជាមួយគ្នានោះដែរសម្តេចធិបតី នាយករដ្ឋមន្រ្តី ក៏បានឲ្យដឹងផងដែរថា បច្ចុប្បន្ននេះប្រទេសកម្ពុជា​មានរោងចក្រដំឡើងរថយន្តចំនួន៩ ក្នុងនោះនៅក្នុងតំបន់សេដ្ឋកិច្ចពិសេសចំនួន៦ និងនៅខាងក្រៅ ចំនួន៣ ខណៈនាពេលខាងមុខកម្ពុជា នឹងនាំចេញរថយន្ត ដែលផលិតនៅកម្ពុជាព្រមទាំង​មានការ​បិទស្លាក យីហោ« Made in Cambodia»ផងដែរ។

យ៉ាងណាក៏ដោយសម្តេចធិបតីនាយករដ្ឋមន្រ្តី ក៏បានស្នើដល់ម្ចាស់ក្រុមហ៊ុនលក់ឡាន ហើយបានធ្វើការផ្គុំនៅកម្ពុជាគប្បីលក់នូវតម្លៃឲ្យបានថោកជាងឡាននាំចេញពីក្រៅប្រទេសផងដែរ ខណៈក្រសួង-ស្ថាប័នរបស់រដ្ឋនឹងមិនបញ្ជាទិញពីខាងក្រៅនោះទេ ប្រសិនបើក្រុមហ៊ុនបង្គុំ ក្នុងស្រុកលក់នូវតម្លៃសមរម្យនោះ៕អត្ថបទបាន ចក់