សម្តេចធិបតី អំពាវនាវ​ឲ្យភាគីទាំងអស់រួម​គ្នាលុបបំបាត់​ឲ្យ​អស់​នូវ​ជំងឺ​គ្រុន​ចាញ់​ពី​កម្ពុជា​ក្នុង​ឆ្នាំ២០២៥​នេះ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអំពាវនាវដល់ភាគីទាំងអស់ គប្បី​ធ្វើ​យ៉ាង​ណា រួមគ្នាខិតខំលុបបំបាត់នូវជំងឺគ្រុនចាញ់ឲ្យអស់ពីកម្ពុជា នៅក្នុងឆ្នាំ២០២៥នេះ ខណៈ​ឆ្នាំ​នេះ​គឺជាផែនការយុទ្ធសាស្ត្រជា​តិ​លុប​បំបាត់​ជំងឺ​គ្រុន​ចាញ់​ចុង​ក្រោយ​នៅ​ក្នុ​ង​ព្រះ​រា​ជា​ណា​ចក្រ​កម្ពុជា​ «ឆ្នាំ២០១១-២០២៥»។

តាមរយៈសារលិខិត ក្នុងឱកាសប្រារព្ធទិវាជាតិប្រយុទ្ធនឹងជំងឺគ្រុនចាញ់ក្រោមប្រធានបទ«យើង បញ្ចប់​ជំងឺគ្រុនចាញ់ដោយវិនិយោគឡើងវិញ គិតច្នៃប្រឌិតឡើងវិញ គ្រប់គ្រងឡើងវិញ» នាថ្ងៃ​ទី២៥ ខែមេសា ឆ្នាំ២០២៥នេះ សម្តេចធិបតី ហ៊ុន ម៉ាណែត បានថ្លែងថា «ប្រទេសកម្ពុជា​យើង​កំពុង​តែ​ឈាន​ឆ្ពោះជិតដល់ការសម្រេចបានជោគជ័យនូវកម្ពុជាគ្មានជំងឺគ្រុនចាញ់ នាដំណាច់​ឆ្នាំ​២០២៥នេះដែ​លជាដំណើរគួរឱ្យកោតសរសើរ និងសាទរជាទីបំផុត ប៉ុន្តែយើង​ក៏​មិន​អាច​បន្ធូរ​ដៃ​បាន​ឡើយ ព្រោះថាដើម្បីឈានទៅបញ្ចប់ជំងឺគ្រុនចាញ់ឱ្យបាន​ជាស្ថាពរ​១០០​ភាគ​រយ​យើង​ត្រូវ​តែ​បន្ត​ខិត​ខំ​ប្រឹងប្រែងទាំងអស់គ្នាបន្ថែមទៀត ទាំងកម្លាំងកាយចិត្ត ប្រាជ្ញាស្មារតី និងធន​ធាន​ចូល​រួម​សហការជាមួយគ្នា ដើម្បីធានាកុំឱ្យមានការកើតជំងឺគ្រុនចាញ់ឡើងវិញ និងទប់ស្កាត់​ការ​នាំ​ចូល​ជំងឺគ្រុនចាញ់ពីក្រៅប្រទេស ព្រមទាំងផ្សព្វ​ផ្សាយ​ការ​យល់​ដឹង​ឱ្យ​បាន​ទូលំទូ​លាយ​អំពីការ​ផ្តល់​មូល​និធិវិនិយោគ ការសិក្សាស្រាវជ្រាវ ការធ្វើរោគវិនិច្ឆ័យ ការព្យាបាល ការគ្រប់គ្រង​ភ្នាក់​ងារ​ចម្លង​ជំងឺ បច្ចេកវិទ្យាវិទ្យាសាស្ត្រ ប្រព័ន្ធតាមដានព័ត៌មាន កិច្ចសហការពីគ្រប់ភាគី ពាក់ព័ន្ធ សេវា​សុខាភិបាលប្រកបដោយសមធម៌ និងកិច្ចសហប្រតិបត្តិការជាតិ-អន្តរជាតិ ក្នុងន័យពង្រឹងពង្រីក ការ​យល់ដឹងនិងការចូលរួមលើកកម្ពស់សុខភាពសាធារណៈ ជាពិសេសប្រជាជន​គោលដៅ​ដែ​លប្រ​ឈម​ខ្ពស់ ប្រកបដោយប្រសិទ្ធភាពនិងស័ក្តិសិទ្ធិភាព ឈានឆ្ពោះទៅនឹ​ង​លុប​បំបាត់​ជំងឺ​គ្រុន​ចាញ់​ឱ្យ​អស់​ពីប្រទេសកម្ពុជា»។

សម្តេចធិបតី នាយករដ្ឋមន្រ្តី បានលើកឡើងទៀតថា ក្នុងដំណើរឆ្ពោះទៅបញ្ចប់ជំងឺគ្រុនចាញ់ ទាម​ទារឱ្យមានការលើកទឹកចិត្តនិងការវិនិយោគបន្ថែមទៀត ព្រមទាំង​អំពាវ​នាវ​ឱ្យ​មាន​វិធី​សាស្ត្រ​ ឬ​គំនិតច្នៃប្រឌិតថ្មីៗជំរុញការលើកទឹកចិត្តដើម្បីប្រមូលផ្ដុំថាមពលថ្មីពីគ្រប់មជ្ឈដ្ឋាន ដោយ​ត្រូវ​ផ្ដុំ​គ្នា​ទាំង​ក្នុងកម្រិតសហគមន៍ រាជរដ្ឋាភិបាល និងដៃគូនានា ដើម្បីឈានឆ្ពោះ​ទៅ​សម្រេច​ជោគ​ជ័យ​គ្មាន​ជំងឺ​គ្រុនចាញ់ក្នុងព្រះរាជាណាចក្រកម្ពុជា នៅដំណាច់ឆ្នាំ២០២៥នេះ និងក្នុងសកលលោក នា​ឆ្នាំ២០៣០នោះ។

សម្តេចបានបន្ថែមទៀតថាឆ្នាំនេះជាឆ្នាំចុងក្រោយ នៃផែនការ​យុទ្ធសាស្ត្រ​ជាតិ​លុប​បំបាត់​ជំងឺ​គ្រុន​ចាញ់​ក្នុងព្រះរាជាណាចក្រកម្ពុជា ឆ្នាំ២០១១-២០២៥ ដែលជា​គំនិត​ផ្តួច​ផ្តើម​របស់​សម្តេច​អគ្គ​មហា​សេនា​បតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ដែល​ប្រទេស​យើង​ត្រូវ​សម្រេចគោលដៅបញ្ចប់ជំងឺគ្រុនចាញ់ឱ្យបានក្រោមដំបូលនៃសុខសន្តិភាពពេញលេញ ស្ថិរភាពនយោបាយ សេរីភាព សាមគ្គីភាព សេចក្តីថ្លៃថ្នូរ និងវឌ្ឍនភាពនៅទូទាំងប្រទេស។

សម្តេចនាយករដ្ឋមន្រ្តី បាន​លើក​ឡើង​ទៀត​ថា​ប្រទេស​កម្ពុជា​យើង​មាន​មោទក​ភាព​យ៉ាង​ខ្លាំង​លើ​មាគ៌ា​ដ៏​ត្រឹម​ត្រូវរបស់ផែនការយុទ្ធសាស្ត្រជាតិ ដោយបានសម្រេច​នូវ​សមិទ្ធ​ផល​ផ្លែ​ផ្កា​នៃ​គោល​ដៅ​ជា​បន្ត​បន្ទាប់រួមមាន៖ ទប់ស្កាត់មិនឱ្យមានភាពស៊ាំថ្នាំគ្រុនចាញ់តាំងពីឆ្នាំ២០១៥ គ្មានអ្នក​ស្លាប់​ដោយ​សារ​ជំងឺគ្រុនចាញ់តាំងពីឆ្នាំ២០១៨ និងគ្មានជំងឺគ្រុនចាញ់ទម្រង់សន្ធិឆ្នាំ២០២៤។ ឆ្នាំ​២០២៤ ប្រទេសកម្ពុជាមានជំងឺគ្រុនចាញ់ត្រឹមតែ៣៥៥ករណីប៉ុណ្ណោះ គឺ​បាន​កាត់​បន្ថយ​៧៥​ភាគរយ បើធៀបនឹងឆ្នាំ២០២៣ ដែលជាទឡ្ហីករណ៍គួរជាទីមោទកខ្ពស់របស់កម្ពុជា ក្នុង​ការ​ចូល​រួម​ជា​មួយប្រទេសក្នុងតំបន់និងសកលលោក ដើម្បីសម្រេចគោលដៅគ្មានជំងឺគ្រុនចាញ់នេះ៕ អត្ថបទ៖ បាន ចក់