សម្ដេចធិបតីឱ្យតាមដានជាប្រចាំលើការអនុវត្តគោលនយោបាយដែលបានដាក់ចេញចៀសវាងការអនុវត្តផ្ទុយ

ក្នុងឱកាស អញ្ជើញសំណេះសំណាលជាមួយថ្នាក់ដឹកនាំអង្គការវិជ្ជាជីវៈក្នុងឱកាសខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ១ ឧសភា នៅព្រឹកថ្ងៃទី២៧ ខែមេសា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាឱ្យក្រសួង ស្ថាប័នពាក់ព័ន្ធ ត្រូវតាមដានជាប់ជាប្រចាំចំពោះការអនុវត្តគោលនយោបាយដែលរាជរដ្ឋាភិបាលបានដាក់ចេញ ចៀសវាងការអនុវត្តផ្ទុយពីគោលនយោបាយដែលដាក់ចេញ ពីអនុគ្រោះដល់ការវិនិយោគ ឬវិស័យផ្សេងៗ បណ្ដាលឱ្យពលរដ្ឋរងគ្រោះទៅវិញ។

សម្ដេចធិបតី នាយករដ្ឋមន្រ្ដី មានប្រសាសន៍ថា កុំឱ្យវិនិយោគិន ឬប្រជាពលរដ្ឋ ឃើញគោលនយោបាយស្រក់ទឹកមាត់ ប៉ុន្ដែពេលឃើញការអនុវត្តបែរជាស្រក់ទឹកភ្នែកទៅវិញ។ សម្ដេចមានប្រសាសន៍ថា កន្លងទៅមានករណីកើតឡើងរួចហើយ គឺទាក់ទងនឹងការផ្ដល់សេវាតាមបណ្ដាក្រសួង ស្ថាប័នមួយចំនួនដូចជាការអនុវត្តការអនុគ្រោះពន្ធ និងការអនុគ្រោះលើការផ្ដល់សេវាលើលិខិតស្នាមផ្សេងៗ ប៉ុន្ដែបែរជាមានឈ្នួញកណ្ដាលទៅទាមទារថវិកាពីពលរដ្ឋ ធ្វើឱ្យពលរដ្ឋភ័ន្តច្រឡំថារាជរដ្ឋាភិបាលជាអ្នកយកកម្រៃបន្ថែម ទៅវិញ។