សម្ដេចធិបតី បង្ហាញមូលហេតុធំៗចំនួន២ ដែលសម្ដេចសម្រេច​ជួលផ្ទះតូចមួយ​នៅបីនាក់​ជាមួយ​មិត្តភក្តិ​ពេលរស់នៅសហរដ្ឋអាម៉េរិក

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន​បង្ហាញ​មូល​ហេតុ​ធំ​ៗ​ចំនួនពីរដែលសម្ដេចសម្រេចជួលផ្ទះតូចមួយនៅបីនាក់ជាមួយមិត្តភក្តិ ពេលធ្វើ​កម្ម​សិក្សា​នៅ​ធនាគារ​ពិភពលោក ក្នុងរដ្ឋធានី Washington នៃសហរដ្ឋអាម៉េរិក។

តាមបណ្ដាញសង្គមកាលពី​រសៀលថ្ងៃទី២៧ ខែមេសា ឆ្នាំ២០២៥ សម្ដេចបានសរសេររៀបរាប់ថា ព្រឹក​មិញក្នុងកម្មវិធីជួបជាមួយបងប្អូនសហជីព និងសេដ្ឋកិច្ចក្រៅប្រព័ន្ធ សម្ដេចបាននិយាយលេង​បន្តិច​អំពី​ការរស់នៅរបស់សម្ដេចកាលធ្វើកម្មសិក្សានៅធនាគារពិភពលោក ក្នុងរដ្ឋធានី Washington នៃសហរដ្ឋអាម៉េរិក ឆ្នាំ២០០២។

ក្រោយចប់កម្មវិធី សម្ដេចបានទទួលរូបថតមួយសន្លឹកនេះដែលមិត្តរបស់សម្ដេចផ្ញើមកឱ្យសម្ដេច។

ក្នុង​រូបនេះគឺជាបន្ទប់ដែលសម្ដេច ជួលនៅជាមួយមិត្តរួមបន្ទប់ពីរនាក់ទៀតរយៈពេលជិតមួយឆ្នាំ ក្នុង​ពេលដែលសម្ដេចធ្វើកម្មសិក្សានៅធនាគារពិភពលោកនៅឆ្នាំ២០០២នោះ។

បន្ទប់​នេះមា​នបន្ទប់គេងតូចមួយអាចដាក់គ្រែបានពីរ បន្ទប់ទឹកតូចមួយ កន្លែងសាឡុងទទួលភ្ញៀវ ជាប់​ជាមួយចង្ក្រានតូចមួយ។

សម្ដេច គេងនៅលើប៉ៅអ៊ី (ប៉ៅអ៊ីបត់ក្នុងរូប) នៅក្នុងបន្ទប់សាឡុង ជាប់ផ្ទះបាយ ដោយ​ទុក​ឱ្យមិ​ត្ត​រួម​បន្ទប់​ពីរនាក់ទៀតគេងនៅក្នុងបន្ទប់ ដោយសារសម្ដេច ធ្វើការងារយប់ៗជ្រៅ ហើយមិន​ចង់​រំខាន​មិត្ត ទុកឱ្យគាត់អាចបិទភ្លើងគេងក្នុងបន្ទប់ចុះ។

កន្លែងដែល សម្ដេចអង្គុយហូបបាយនេះគឺ ជាកន្លែងគេងរបស់សម្ដេច គ្រែរបស់សម្ដេចគឺប៉ៅអ៊ីបត់ (ក្នុងរូបភាព) ហើយវាក៏ជាកន្លែងហូបបាយ និងធ្វើកិច្ចការរបស់សម្ដេចនៅផ្ទះផងដែរ។

មិត្ត​ភក្តិ​ខ្លះ ប្រាប់ថាឃើញរូបនេះថាគួរឱ្យអាណិតសម្ដេច។

ប៉ុន្តែសម្ដេច​បាន​ប្រាប់គាត់វិញថាមិនមានអ្វីគួរឱ្យអាណិតនោះទេ ព្រោះទោះយ៉ាង​ណា​ក៏​សម្ដេច​មាន​សំណាង​ជាងមនុស្សរាប់លាននាក់ដែលមិនមានឱកាសដូចសម្ដេច។

ការដែល សម្ដេចសម្រេចជួលផ្ទះតូចមួយនៅបីនាក់ជាមួយមិត្តភក្តិរបស់សម្ដេច មាន​មូល​ហេតុ​ធំ​ៗ​ចំនួន​ពីរ÷

-មូលហេតុទី១ គឺសម្រាប់រូបសម្ដេច មិនថាផ្ទះតូចចង្អៀត ឬចាស់ ឱ្យតែមាន​ដំបូល​កុំ​ឱ្យលិ​ច​ពេល​ភ្លៀង មានកន្លែងសម្រាប់គេង សម្រាប់ហូបបាយ សម្រាប់ធ្វើកិច្ចការ គឺគ្រប់គ្រាន់ហើយ។

គោល​ដៅសំខាន់របស់សម្ដេចពេលនោះគឺផ្ដោតទៅលើការងារនៅធនាគារពិភពលោក ដែល​សម្ដេច​ត្រូវ​ខិតខំធ្វើឱ្យល្អ និងច្បាមយកបទពិសោធន៍ឱ្យបានជាអតិបរមា ក្នុងរយៈ​ពេល​ដែល​សម្ដេច​ធ្វើការនៅទីនោះ។

កន្លែងស្នាក់នៅ ឬមធ្យោបាយធ្វើដំណើរ (សម្ដេច ជិះរថភ្លើងក្រោមដីទៅធ្វើការ) គឺ​ជា​កិច្ច​ការបន្ទាប់បន្សំ។ មិន​អាច​ឱ្យ​កិច្ចការ​បន្ទាប់​បន្សំ​ជា​ឧបសគ្គ​សម្រាប់​រំខាន​ដល់​ការ​សម្រេច​គោល​ដៅ​ធំ​របស់​សម្ដេចទេ។

-មូលហេតុទី២ គឺភាពម្ចាស់ការរបស់សម្ដេចក្នុងការរស់នៅ ដោយ​សម្ដេច​ព្យាយាម​ដាក់​គោល​ដៅ​ធ្វើ​យ៉ាង​ណា ការរស់នៅរបស់​សម្ដេច​នៅ​ពេ​ល​នោះ​ត្រូវ​អាច​ទ្រទ្រង់​បាន​ដោយ​សារ​ប្រាក់​បៀវ​ត្ស​របស់​សម្ដេច ដែលបានមកពីការធ្វើកម្មសិក្សានៅធនាគារពិភពលោក។ ពោលគឺ​រស់​ដោយ​ថវិកា​រក​ដោយ​ខ្លួន​ឯង ដោយមិនចាំបាច់ប្រើប្រាស់ថវិការបស់ឪពុកម្ដាយ ទោះបីជា​គាត់​មាន​លទ្ធ​ភាព​ផ្ដល់​ឱ្យ​សម្ដេច​អាច​ជួលផ្ទះបានល្អជាងឬធំជាងនេះក៏ដោយ៕