អាជ្ញាធរខេត្តបន្ទាយមានជ័យ ចុះជួយជួសជុលផ្ទះដល់ប្រជាពលរដ្ឋរងគ្រោះដោយសារខ្យល់កន្ត្រាក់ចំនួន ៣៤ខ្នង ក្នុងស្រុកភ្នំស្រុក

បន្ទាយមានជ័យ៖ លោក ឃ្លោក នួយ អភិបាលរងខេត្ត បានដឹកនាំក្រុមការងារ សហការជាមួយ វរសេនីយ៍ឯក ប៉ែន សុគន្ធ មេបញ្ជាការស្ដីទីកងពលតូចថ្មើជើងលេខ៥១ បានចុះជួយជួសជុលផ្ទះដល់បងប្អូនប្រជាពលរដ្ឋ ដែលរងគ្រោះដោយខ្យល់កន្ត្រាក់ ចំនួន ៣៤ខ្នងផ្ទះ និងរោងបន្លែសុវត្ថិភាពមួយខ្នង និងបាននាំយកនូវស័ង្កសីចំនួន ៣២០សន្លឹក ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ស្ថិតក្នុងស្រុកភ្នំស្រុក ខេត្តបន្ទាយមានជ័យ នៅថ្ងៃទី២៨ ខែមេសា ឆ្នាំ២០២៥នេះ។

នាឱកាសនោះលោក ឃ្លោក នួយ អភិបាលរងខេត្ត ក៏បានចូលរួមសម្តែងក្តីសោកស្តាយ ចំពោះ​បាតុភូតគ្រោះធម្មជាតិ ខ្យល់កន្ត្រាក់ ​ធ្វើឱ្យរងការប៉ះពាល់ដល់ផ្ទះ​សំបែង ទ្រព្យសម្បត្តិរបស់​បងប្អូន​ប្រជាពលរដ្ឋ។

ជាវិធានការលោក ក៏បានណែនាំដល់បងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់​ចំពោះ​បាតុភូតធម្មជាតិខ្យល់កន្ត្រាក់ រន្ទះបាញ់ ដែលតែងតែកើតមានជារៀងរាល់ឆ្នាំ ក្នុងករណី​អាកាសធាតុមិនសូវស្រួល ត្រូវរកកន្លែងទីជម្រកមានសុវត្ថិភាព ជាពិសេសកុំជ្រកក្រោមដើមឈើ ឬនៅក្បែរបង្គោលភ្លើង​ ក្នុងពេលអាកាសធាតុរកកលចង់ភ្លៀងនោះ។

សូមបញ្ជាក់ថា កាលពីថ្ងៃទី២៧ ខែមេសា ឆ្នាំ២០២៥ មានភ្លៀងធ្លាក់លាយ​លំ នឹង​ខ្យល់កន្រ្តាក់​ដែលបានប៉ះពាល់ស្រុកភ្នំស្រុក ​បណ្ដាលឱ្យប៉ះពាល់ផ្ទះប្រជាពលរដ្ឋចំនួន៣៤ខ្នងផ្ទះ ​ចំនួន ៤ឃុំ រួមមាន ឃុំប៉ោយចារ ​ចំនួន ១៧ខ្នងផ្ទះ ទទួលបានស័ង្កសី​ចំនួន ១០៨សន្លឹក ឃុំស្រះជីក ចំនួន ១១ខ្នងផ្ទះ ទទួលបានស័ង្កសីចំនួន ១៤៥សន្លឹក ឃុំភ្នំដី ចំនួន ៤ខ្នងផ្ទះ ទទួល​បានសង្ក័សី​ចំនួន ៥៥សន្លឹក ​និងឃុំពន្លៃ ចំនួន ២ខ្នងផ្ទះ ទទួលបាន​សង្ក័សី​ចំនួន​ ១២សន្លឹក និងរោងបន្លែ១កន្លែង ផងដែរ៕ឃិនសារិទ្ធ