រដ្ឋបាលរាជធានីភ្នំពេញចែកទឹកស្អាតដល់ពលរដ្ឋរស់នៅក្នុងបុរី VIP ដែលខ្វះទឹកស្អាតប្រើប្រាស់ ៣ថ្ងៃមកហើយ

ភ្នំពេញ ៖ ដោយអនុវត្តតាមការយកចិត្តទុកដាក់គិតគូរពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ចំពោះប្រជាពលរដ្ឋជួបបញ្ហាខ្វះទឹកស្អាតប្រើប្រាស់ ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ នាព្រឹកថ្ងៃទី២៨ ខែមេសា ឆ្នាំ២០២៥ បានចាត់ឱ្យក្រុមការងាររដ្ឋបាលរាជធានីភ្នំពេញ មានលោក ឆាយ វីរៈ អភិបាលរងរាជធានីភ្នំពេញដឹកនាំរដ្ឋបាលខណ្ឌដង្កោ និងសហការដោយរដ្ឋាករទឹករាជធានីភ្នំពេញ បានដឹកទឹកស្អាតចែកជូនប្រជាពលរដ្ឋរស់នៅក្នុងបុរី VIP ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ ខណៈតំបន់នេះមានបញ្ហាខ្វះទឹកស្អាតប្រើប្រាស់ចំនួន៣ថ្ងៃមកហើយ។

លោក ឆាយ វីរៈ អភិបាលរងរាជធានីភ្នំពេញបានឱ្យដឹងនារសៀលថ្ងៃដដែលនេះថា ប្រជាពលរដ្ឋរស់នៅក្នុងបុរី VIP នេះតាមពិតទៅកន្លងមកមានអ្នកផ្គត់ផ្គង់ទឹកស្អាតហើយ តែមិនទាន់គ្រប់គ្រាន់ ទើបអាជ្ញាធរជួយបំពេញបន្ថែម ដើម្បីបន្តចែកចាយទៅប្រជាពលរដ្ឋដែលខ្វះខាតទឹកស្អាតបានប្រើប្រាស់។ ការងារនេះរដ្ឋបាលរាជធានីភ្នំពេញនឹងបន្តផ្គត់ផ្គង់រហូតដល់ពលរដ្ឋមានទឹកប្រើប្រាស់គ្រប់គ្រាន់ ទើបបញ្ឈប់ការផ្គត់ផ្គង់ជាបណ្តោះអាសន្ន៕