ក្រុមការងារចុះមូលដ្ឋានស្រុកបរិបូណ៌ ចុះដោះស្រាយករណីទីលានចាក់សម្រាមឆេះ ហុយផ្សែងប៉ះពាល់សុខភាពប្រជាពលរដ្ឋ ទទួលបានជោគជ័យ

កំពង់ឆ្នាំង៖ នៅរសៀលថ្ងៃទី២៨ ខែមេសា ឆ្នាំ២០២៥នេះ ឯកឧត្តម កុល ប៊ុនលី អនុប្រធានក្រុមការងារថ្នាក់កណ្តាលគណបក្សប្រជាជនចុះមូលដ្ឋានស្រុកបរិបូណ៌ តំណាងសម្តេចមហាមន្ត្រី គុយ សុផល ប្រធានក្រុមការងារថ្នាក់កណ្តាលគណបក្សប្រជាជនចុះមូលដ្ឋានស្រុកបរិបូណ៌, ឯកឧត្តម គឹម រ័ត្នណារិន ប្រធានសាលាដំបូងខេត្តកំពង់ឆ្នាំង, ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត បានអញ្ជើញចុះពិនិត្យទីលានចាក់សម្រាមរបស់ស្រុកបរិបូណ៌ និងបានសម្របសម្រួលជូនប្រជាពលរដ្ឋ និងអ្នកម៉ៅការដឹកសម្រាមតាមយុទ្ធសាស្ត្រ ឈ្នះ ឈ្នះ ទទួលបានជោគជ័យ ដោយបានអោយអ្នកម៉ៅការជីករណ្តៅទុកដាក់សម្រាមតាមបច្ចេកទេស និងហាមដុត។ ក្នុងនោះ ក៏មានការចូលរួមពីអាជ្ញាធរស្រុកបរិបូណ៌ អាជ្ញាធរឃុំពេជ្រចង្វារ មន្ទីរបរិស្ថានខេត្ត និងប្រជាពលរដ្ឋ ភូមិទឹកជ្រាប និងភូមិក្រាំងកកោះ ឃុំពេជ្រចង្វារ ស្រុកបរិបូណ៌ ខេត្តកំពង់ឆ្នាំងផងដែរ។

ក្រោយពីស្តាប់នូវការណែនាំរបស់ឯកឧត្តម កុល ប៊ុនលី និងឯកឧត្តម ឯក ស៊ុនរស្មី ជុំវិញបញ្ហារណ្តៅសម្រាមមានក្លិនស្អុយ និងឆេះសម្រាមបញ្ចេញជាតិពុលរាល់ពេល នាំអោយប៉ះពាល់ដល់សុខភាពប្រជាពលរដ្ឋ និងធ្វអោយងាប់គោប្រជាពលរដ្ឋនោះ អាជ្ញាធរឃុំពេជ្រចង្វារតំណាងប្រជាពលរដ្ឋទាំង២ភូមិ បានសំណូមពរដល់អ្នកម៉ៅការសម្រាម ជួយជីករណ្តៅទុកដាក់សម្រាមអោយបានស្រួល កុំដុតនាំអោយមានផ្សែងប៉ះពាល់ដល់សុខភាពប្រជាពលរដ្ឋក្នុងភូមិ សត្វចិញ្ចឹម ក៏ដូចជាដំណាំរួមផ្សំរបស់ប្រជាពលរដ្ឋ និងសុំផ្លាស់ប្តូរទីលានចាក់សម្រាមទៅកន្លែងផ្សេងទៀតផង។

ចំណែកអ្នកម៉ៅការសម្រាម បានទទួលយកនូវសំណូមពររបស់អាជ្ញាធរឃុំពេជ្រចង្វារទាំង៣ចំណុចខាងលើ ដោយត្រូវជីករណ្តៅទុកដាក់សម្រាមអោយបានត្រឹមត្រូវតាមបច្ចេកទេស និងមិនយឺតយ៉ាវ ដោយឡែកសម្រាមដែលកំពុងឆេះនោះ ខាងអ្នកម៉ៅការនឹងយកទឹកមកពន្លត់មិនអោយឆេះបន្តទៀត ហើយអ្នកម៉ៅការនឹងសហការជាមួយអាជ្ញាធរស្រុកបរិបូណ៌ និងមន្ទីរបរិស្ថានខេត្ត ដើម្បីរកទីលានចាក់សម្រាមថ្មី។

ឯកឧត្តម កុល ប៊ុនលី បានបន្តថា៖ ដើម្បីអោយសុខុមាលភាពប្រជាពលរដ្ឋ សត្វចិញ្ចឹម ដំណាំរួមផ្សំរបស់ប្រជាពលរដ្ឋ មានសុខភាពល្អ ឯកឧត្តមបានអោយអ្នកម៉ៅការសម្រាម ត្រូវសហការធ្វើការងារជាមួយអាជ្ញាធរស្រុក មន្ទីរបរិស្ថានខេត្ត មិនត្រូវទុកសម្រាមពាសវាលពាសកាល និងមានភ្លើងឆេះនាំអោយមានផ្សែងប៉ះពាល់ដល់សុខភាពប្រជាពលរដ្ឋបែបនេះឡើយ។

ប្រជាពលរដ្ឋបានថ្លែងអំណរគុណដល់ក្រុមការងារដឹកនាំដោយឯកឧត្តម កុល ប៊ុនលី ដែលបានេជួយដោះស្រាយទុក្ខលំបាករបស់ប្រជាពលរដ្ឋក្នុងពេលនេះ ហើយប្រជាពលរដ្ឋដឹងគុណដល់ក្រុមការងារ ជាពិសេសគណបក្សប្រជាជនតែម្តងដែលនៅកៀកកិតជាមួយប្រជាជនគ្រប់ពេលវេលា៕ កាំង ហុងវាស្នា