សម្តេចធិបតី៖ រាជរដ្ឋាភិបាលខ្ចីលុយបរទេសមកយកអភិវឌ្ឍន៍ប្រទេស មិនមែនយកមកបើកប្រាក់ខែជូនមន្រ្តីរាជការទេ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា ការដែលរាជរដ្ឋាភិបាលខ្ចីលុយបរទេសនោះ គឺយកមកអភិវឌ្ឍន៍ប្រទេសជាតិ ដើម្បីបង្កើនចំណូលសេដ្ឋកិច្ចជូនបងប្អូនប្រជាពលរដ្ឋ មិនមែនយកមកដាក់ហោប៉ៅខ្លួនឯង ឬយកមកសម្រាប់បើកប្រាក់ខែជូនមន្រ្តីរាជការ ដូចការលើកឡើង របស់ក្រុមអគតិមួយក្តាប់តូចដែលតែងតែរិះគន់ និងចោទប្រកាន់ជារឿយៗនោះឡើយ។

ឆ្លើយតបចំពោះក្រុមប្រឆាំងថា រាជរដ្ឋាផិបាលដើរខ្ចីលុយបរទេសទៀតហើយនោះ សម្តេចនាយក រដ្ឋមន្រ្តី បានលើកឡើងថា ការខ្ចីលុយបរទេសនេះប្រទេសណាក៏មានដែរ ប៉ុន្តែការខ្ចីគេនោះ គឺត្រូវមានហេតុផលច្បាស់លាស់ ខណៈរាជរដ្ឋាភិបាលកម្ពុជាមិនមែន​កញ្ជើធ្លុះ​នោះទេ ការដែលរដ្ឋខ្ចីលុយគេគឺយកមកអភិវឌ្ឍន៍ប្រទេសជាតិ យកមកធ្វើហេដ្ឋារចនាសម្ព័ន្ធសព្វបែបយ៉ាង ដើម្បីបង្កើន​ចំណូលជូនដល់ប្រជាពលរដ្ឋ ​ជាក់ស្តែងដូចករណីផ្លូវជាតិលេខ៣១,៣៣,៤១នេះ គឺរដ្ឋបានខ្ចីពីបរទេសជិតពីររយលានដុល្លារ ​ប៉ុន្តែវានឹងបង្កើនចំណូលជូនដល់ជាតិ និងប្រជាជនកម្ពុជាទាំងមូលរាប់ពាន់លានដុល្លារឯកណោះ។

សម្តេចធិបតីនាយករដ្ឋមន្រ្តី បានលើកឡើងទៀតថា ​ការដែរកម្ពុជាខ្ចីគេ ​គឺកម្ពុជាមានលទ្ធភាពសង គេ ដូច្នេះបងប្អូន​ប្រជាពលរដ្ឋសូមកុំ​ព្រួយបារម្ភ​ចំពោះ​បំណុល​បរទេស​នេះឲ្យសោះ។

ការលើកឡើងរបស់សម្តេចធិបតី នាយករដ្ឋមន្រ្តីនេះ គឺបានធ្វើឡើង ​ក្នុងឱកាសអញ្ជើញជាធិបតីភាព ក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ ៣១,៣៣,៤១ ​នៅស្រុកត្រាំកក់ ខេត្តតាកែវ នាព្រឹកថ្ងៃទី២៩ ខែមេសា ឆ្នាំ២០២៥នេះ៕អត្ថបទ៖ បាន ចក់