សម្ដេចធិបតី៖ កំណើនទិញរថយន្ត និងអចលនទ្រព្យរបស់ពលរដ្ឋមានការកើនឡើង បង្ហាញពីលំនឹងសេដ្ឋកិច្ចកម្ពុជា

ក្នុងឱកាស អញ្ជើញជាអធិបតីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ៣៣ ផ្លូវជាតិលេខ៣១ និងផ្លូវជាតិលេខ៤១ ប្រវែងសរុបជាង ២០០គ.ម នៅស្រុកត្រាំកក់ ខេត្តតាកែវ នាព្រឹកថ្ងៃទី២៩ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានប្រសាសន៍បញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះកំណើនទិញរថយន្ត និងអចលនទ្រព្យរបស់ពលរដ្ឋមានការកើនឡើង ដែលនេះបង្ហាញពីកត្តាលំនឹងសេដ្ឋកិច្ច និងការជឿទុកចិត្តរបស់ប្រជាពលរដ្ឋចំពោះរាជរដ្ឋាភិបាលកម្ពុជា។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា កំណើនទិញរថយន្ត និងអចលនទ្រព្យ ជាលក្ខណៈគ្រួសារ ពីសំណាក់ប្រជាពលរដ្ឋមានការកើនឡើងច្រើន លទ្ធផលនេះបង្ហាញពីការជឿទុកចិត្តរបស់ប្រជាពលរដ្ឋមកលើគោលនយោបាយដឹកនាំរបស់រាជរដ្ឋាភិបាល និងស្ថិរភាពសេដ្ឋកិច្ចរបស់កម្ពុជា។

សម្ដេចធិបតីបន្ថែមថា រាជរដ្ឋាភិបាល ដឹកនាំដោយគណបក្សប្រជាជនកម្ពុជា កុំថាឡើយសង្គ្រាមជាមួយកូវីដ-១៩ ឬសង្គ្រាមពាណិជ្ជកម្ម, រាជរដ្ឋាភិបាល គឺតែងតែនៅជាមួយប្រជាពលរដ្ឋជាគ្រប់ពេលវេលា មិនដែលរត់ចោលពលរដ្ឋឡើយ។

សូមជម្រាបថា កម្ពុជាសម្រេចបាននូវកំណើនផលិតផលក្នុងស្រុកសរុប (GDP) ប្រមាណ ៥.៣ ភាគរយនៅឆ្នាំ២០២៤។ ជាមួយគ្នានេះ រដ្ឋាភិបាលក៏បានព្យាករអត្រាកំណើនសេដ្ឋកិច្ចប្រមាណ ៦,៣ ភាគរយនៅឆ្នាំ ២០២៥។ នេះបើយោងតាមរបាយការណ៍ថវិកាក្នុងរបាយការណ៍សង្ខេបសម្រាប់ឆ្នាំសារពើពន្ធ ២០២៥ ដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុ។

ក្រៅពីនេះ កាលពីខែមករា ឆ្នាំ២០២៥ ស្ថាប័នហិរញ្ញវត្ថុ IMF បានចេញផ្សាយរបាយការណ៍មាត្រា IV 2025 របស់ខ្លួនស្តីពីកម្ពុជា ដែលព្យាករកំណើន ៥.៨ ភាគរយសម្រាប់កម្ពុជា។ ប្រភពដដែលបានបន្ថែមថា “IMF ព្យាករណ៍ GDP ពិតប្រាកដនឹងកើនឡើងពី ៥.៥ ភាគរយនៅឆ្នាំ២០២៤ ដល់ ៥.៨ ភាគរយនៅឆ្នាំ២០២៥ ហើយអតិផរណាកើនឡើងពី ០.៥ ភាគរយនៅឆ្នាំ២០២៤ ដល់២ភាគរយនៅឆ្នាំ២០២៥ផងដែរ៕ អត្ថបទ៖ វ៉ន ដារ៉ា