ស្ថានទូតអូស្រ្តាលីប្រចាំរាជធានីភ្នំពេញ អញ្ជើញទស្សនកិច្ចការងារច្រកទ្វារព្រំដែនអន្តរជាតិប៉ោយប៉ែត

បន្ទាយមានជ័យ៖ នៅព្រឹកថ្ងៃទី២៩ ខែមេសា ឆ្នាំ២០២៥ ប្រតិភូនៃស្ថានទូតអូស្ត្រាលី ប្រចាំនៅរាជធានីភ្នំពេញ ដឹកនាំដោយលោកស្រី SAM KITSCHER លេខាធិការទី១ នៃស្ថានទូតអូស្ត្រាលីប្រចាំរាជធានីភ្នំពេញ និងលោកស្រី EACHEL BELL ស្នងការស៊ើបអង្កេត តំណាងឱ្យនគរបាលសហព័ន្ធអូស្ត្រាលីនៅរាជធានីភ្នំពេញ បានអញ្ជើញមកទស្សនកិច្ច​សិក្សា​ស្វែងយល់អំពីស្ថានភាពទូទៅ នៅច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ និង​ជួប​សំណេះសំណាល​ជាមួយមន្ត្រីប៉ុស្តិ៍ ​នៅសាលប្រជុំជាន់ទី២ អគារទីស្នាក់ការត្រួត​ពិនិត្យច្រកទ្វារព្រំដែន​អន្តរជាតិប៉ោយប៉ែតផងដែរ ។

ក្នុងឱកាសជួបសំណេះសំណាលនេះដែរលោកស្រី SAM KITSCHER ​បានលើកជា​សំនួរ​មួយ​ចំនួន​ពាក់ព័ន្ធ​លើជំនាញ​អន្តោប្រវេសន៍ ដល់មន្ត្រី និងបានសម្ដែងនូវការកោត​សរសើ​ខ្ពស់​ដល់​ថ្នាក់​ដឹកនាំ​និងមន្ត្រីនៃប៉ុស្តិ៍នគរបាលច្រកទ្វារព្រំដែន​អន្តរជាតិប៉ោយប៉ែត ដែលកន្លងមក ​ជានិច្ចកាល​បាន​យកចិត្តទុកដាក់ចូលរួមសហការបានយ៉ាងល្អប្រសើរជាមួយក្រុមការងាររបស់លោកស្រី​ប្រកប​ដោយភាពរីករាយរាក់ទាក់គួរជាទីមោទនបំផុតផងដែរ ។

ជាថ្មីម្ដងទៀតលោកស្រី ក៏បានថ្លែងនូវ​អំណរអរគុណ​ដ៏ជ្រាលជ្រៅ​ចំពោះ​របាយការណ៍​ដែល​ប៉ុស្តិ៍បានរាយការណ៍អំពីលំហូរចេញ-ចូល របស់អ្នកដំណើរភ្ញៀវជាតិ-អន្តរជាតិ ជាពិសេស​គុណសម្បត្តិ ​និងគុណវិបត្តិរបស់ជនជាតិអូស្ត្រាលីចេញ-ចូលឆ្លងកាត់តាមច្រកទ្វារព្រំដែន​អន្តរជាតិប៉ោយប៉ែត ​ខេត្តបន្ទាយមានជ័យ ផងដែរ។

ក្នុងនោះដែរ​លោកស្រី រួមទាំង​ក្រុមការងារសហការី​បាន​អញ្ជើញ​ពិនិត្យ​សកម្មភាព​ការងារ​របស់​មន្ត្រីជំនាញ​ចំពោះការ​ប្រថាប់ត្រា​តាមបញ្ជរបំពេញបែបបទចេញ-ចូលប្រទេស និងបានត្រឡប់​ទៅវិញប្រកបដោយសុវត្ថិភាពផងដែរ ៕