អគារថ្មីរបស់រដ្ឋបាលក្រុងសិរីសោភ័ណ ត្រូវបានដាក់សម្ពោធឱ្យដំណើរការប្រើប្រាស់ជាផ្លូវការ

បន្ទាយមានជ័យ ៖ អគាររដ្ឋបាលថ្មីមួយខ្នងរបស់រដ្ឋបាលក្រុងសិរីសោភ័ណ ខេត្តបន្ទាយមានជ័យ ដែលបានសាងសង់រួចរាល់ជាស្ថាពរ និងដាក់សម្ពោធឱ្យដំណើរការប្រើប្រាស់ជាផ្លូវការនៅថ្ងៃទី២៩ ខែមេសា ឆ្នាំ២០២៥នេះ ក្រោមអធិបតីភាពឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ព្រមទាំងមានការចូលរួមពីថ្នាក់ដឹកនាំ​មន្ត្រីរាជការ មន្ទីរ ស្ថាប័នអង្គភាពពាក់ព័ន្ធ យ៉ាងច្រើនកុះករដែលពិធីបានប្រារព្ធធ្វើនៅបរិវេណ សាលាក្រុងសិរីសោភ័ណ នាខេត្តបន្ទាយមានជ័យ។

ឱកាសនោះដែរឯកឧត្ដម អ៊ុំ រាត្រី អភិបាលខេត្តបន្ទាយមានជ័យ បានសម្តែងនូវក្តីសោមនស្សរីករាយ​យ៉ាងក្រៃលែង និងសាទរជាមួយមន្រ្តីរាជការ ​នៃសាលាក្រុងសិរីសោភ័ណ​ ដែលបានអគាររដ្ឋបាល​មួយខ្នង​ជាសមិទ្ធផលថ្មីដ៏ធំធេងមួយ ក្រោមជំនួយ​ឧបត្ថម្ភរបស់​រាជរដ្ឋាភិបាលកម្ពុជា។

ក្នុងនោះឯកឧត្តម ​បានលើកទឹកចិត្តដល់មន្រ្តីរាជការគ្រប់អង្គភាព និងកងកម្លាំងគ្រប់ផ្នែក វិស័យ​ឯកជន ​សង្គមស៊ីវិល អាជ្ញាធរមូលដ្ឋានគ្រប់លំដាប់ថ្នាក់ ​និងបងប្អូនប្រជាពលរដ្ឋ ត្រូវ​បន្តប្រឹងប្រែង​រួមគ្នា​បន្ថែមទៀត ក្នុងការចូលរួមអភិវឌ្ឍន៍​លើគ្រប់វិស័យតាមតួនាទីភារកិច្ចរៀងៗខ្លួន ជាពិសេស​ការអភិវឌ្ឍធនធានមនុស្ស (យុវជន) ដើម្បីកាត់បន្ថយភាពក្រីក្រីឱ្យកាន់តែរួមតូចជាអតិបរិមា និងឈាន​ទៅលុបបំបាត់ទាំងស្រុងនាពេលខាងមុខផងដែរ។

ឯកឧត្តមបន្តថា ទន្ទឹមនឹងការទទួលបាននូវ អគាររដ្ឋបាលថ្មីដែលបាននិងកំពុងសម្ភោធដាក់​ឱ្យប្រើប្រាស់​ជាផ្លូវការ ​នាពេលនេះដែរឯកឧត្ដម ​បានធ្វើការណែនាំ ដល់ថ្នាក់ដឹកនាំជំរុញការថែទាំ​អគារ និងទ្រព្យសម្បត្តិ ទាំងអស់ឱ្យបានល្អ គង់វង្សសម្រាប់ការប្រើប្រាស់បានយូរអង្វែង និង​ប្រកប​ដោយស្មារតីទទួលខុសត្រូវខ្ពស់, ជំរុញការផ្តល់សេវាជូនដល់ប្រជាពលរដ្ឋប្រកបដោយគុណភាព តម្លាភាពគណនេយ្យភាព ​និងប្រសិទ្ធភាព ​និងត្រូវបង្កើនការខិតខំបំពេញការងារ គោរពវិន័យ និង​ក្រមសីលធម៌វិជ្ជាជីវៈឱ្យបានខ្ជាប់ខ្ជួន ថ្លៃថ្នូរ ដើម្បីបម្រើប្រជាពលរដ្ឋប្រកបដោយការទទួល​ខុសត្រូវខ្ពស់​ផងដែរ៕ ឃិនសារិទ្ធ