ឧត្តមនាវីឯក ទៀ សុខា ជួបពិភាក្សាជាមួយប្រធានប្រតិភូបេសកកម្មនាវាជើងទឹករុស្ស៊ីក្នុងអំឡុងពេលចូល សំចតនៅដែនទឹកកម្ពុជា

ភ្នំពេញ ៖ ឯកឧត្តមឧត្តមនាវីឯក ទៀ សុខា មេបញ្ជាការកងទ័ពជើងទឹក និងជាអគ្គលេខាធិការជាតិសន្តិសុខលម្ហសមុទ្រ នៅព្រឹកថ្ងៃទី២៩ ខែមេសា ឆ្នាំ២០២៥នេះ បានទទួលជួបសម្តែងការគួរសម និងពិភាក្សាការងារ ជាមួយលោកវរនាវីឯក Alejsei ANTSIFEROV ប្រធានប្រតិភូបេសកកម្មនាវាជើងទឹករុស្ស៊ី នៅបញ្ជាការដ្ឋានកងទ័ពជើងទឹក។

សូមបញ្ជាក់ថា នៅថ្ងៃទី២៨ ខែមេសា ឆ្នាំ២០២៥នេះ នាវាចម្បាំងកងទ័ពជើងទឹកសហព័ន្ធរុស្ស៊ី ចំនួនបីគ្រឿង មាននាវិកសរុបចំនួន២៦២នាក់ បានចូលសំចតនៅកំពង់ផែស្វយ័តក្រុងព្រះសីហនុ និងធ្វើទស្សនកិច្ចនៅកម្ពុជា រយៈពេលបួនថ្ងៃ គឺចាប់ពីថ្ងៃទី២៨ ខែមេសា ដល់ថ្ងៃទី០១ ខែឧសភា ឆ្នាំ២០២៥។ កងនាវាទាំងបីគ្រឿងដឹកនាំ ដោយវរនាវីឯក ALEKSEI ANTSIFEROV នាយសេនាធិការ នៃផ្នែកនាវានៅលើផ្ទៃទឹក កងនាវាប៉ាស៊ីហ្វិក នៃសហព័ន្ធរុស្ស៊ី ។

ក្នុងកំឡុងដំណើរទស្សនកិច្ចនេះ គណៈប្រតិភូនាវាចូលជួបសំដែងការគួរសមជាមួយអភិបាលខេត្ត ព្រះសីហនុ, មេបញ្ជាការមូលដ្ឋានសមុទ្ររាម, មេបញ្ជាការកងទ័ពជើងទឹក នៃកងយោធពលខេមរភូមិន្ទ និង មានការលេងកីឡាជាមិត្តភាពបាល់ទះ និងបាល់ទាត់ រវាងនាវិកកងទ័ពជើងទឹកសហព័ន្ធរុស្ស៊ី ជាមួយនាវិក កងទ័ពជើងទឹកមូលដ្ឋានសមុទ្ររាមផងដែរ៕