ឥណ្ឌាគ្រោងបង្កើនការផ្ដល់សត្វខ្លាធំដល់កម្ពុជា ខណៈទីតាំងព្រលែងអំណោយផល​ក្នុងការពង្រីក​ពូជ

ភ្នំពេញ៖ រដ្ឋាភិបាល នៃប្រទេសឥណ្ឌា គ្រោងនឹងបង្កើនការផ្ដល់នូវអំណោយសត្វខ្លាធំ ដល់កម្ពុជា ខណៈអ្នកបច្ចេកទេសរបស់ឥណ្ឌា បង្ហាញពីការពេញចិត្ត ចំពោះទីតាំង ដែលត្រូវព្រលែង​សត្វខ្លាធំ​ទាំង​នោះ មានស្ថានភាពល្អ និងអំណោយផលដល់ការពង្រីកពូជ ។

ក្នុងកិច្ចសម្ភាសន៍ជាមួយBTV ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានថ្លែងថា សម្រាប់​​​ទីតាំង ដែលត្រូវព្រលែងសត្វខ្លាធំ បានត្រៀមរួចជាស្រេចហើយ ហើយកាល​ពីចុង​ឆ្នាំ​២០២៤​​​កន្លងទៅនេះ ក្រុមការងារនៃប្រទេសឥណ្ឌា បានចុះមកធ្វើការពិនិត្យ និងតាមដាន​ទៅក្នុង​តំបន់​ដែល​គ្រោងដាក់សត្វខ្លាធំនោះ ដោយជំហានដំបូង គឺគ្រោងបញ្ចូនមកចំនួន ៤ក្បាល (ឈ្មោល​​១ក្បាល និងមេ៣ក្បាល) ប៉ុន្តែថ្មីៗនេះ រដ្ឋាភិបាលនៃប្រទេសឥណ្ឌា ក៏គ្រោង​បន្ថែម​ចំនួន ២ក្បាលទៀត ។

ឯកឧត្តមបានបន្តថា ការប្រែប្រួលចំនួនសត្វខ្លាធំ ដែលត្រូវផ្ដល់ដល់កម្ពុជានេះ ប្រហែល​ដោយ​សារ​​ក្រុម​បច្ចេកទេសឥណ្ឌា រកឃើញថា ទីតាំងនោះសមស្រប សម្រាប់បង្កើននូវ​ចំនួន​សត្វខ្លា ស្ថិត​ក្នុង​តំបន់ការពារធម្មជាតិ នៃខេត្តកោះកុង ដែលមានសុវត្ថិភាព ទាំងសត្វខ្លាធំ និងមនុស្ស​ដែល​រស់នៅក្នុងសហគមន៍ក្បែរនោះផងដែរ ។

ឯកឧត្តមអ្នកនាំពាក្យ បានបន្ថែមថា ពាក់ព័ន្ធនឹងពេលវេលា ដែលត្រូវបញ្ជូនមកនេះ គឺក្រសួង​បរិស្ថាន នឹងជូនដំណឹងនៅពេលក្រោយទៀត បន្ទាប់ពីក្រុមការងារបច្ចេកទេស និងមន្ត្រី​អង្គការ​សម្ព័ន្ធ​មិត្តសត្វព្រៃ (WA) ចំនួន៥នាក់ ត្រូវទៅសិក្សាបច្ចេកទេសបន្ថែម ពីប្រទេសឥណ្ឌា លើ​ការងារ​ថែទាំសត្វខ្លាធំ ដែលពួកគេនឹងធ្វើដំណើរទៅនៅក្នុងខែឧសភា ឆ្នាំ២០២៥នេះ ។

សម្រាប់​ទីតាំងត្រូវព្រលែងនោះ អង្គការសម្ព័ន្ធមិត្តសត្វព្រៃ និងក្រសួងបរិស្ថាន ក៏បានរៀបចំដំឡើងកាំមេរ៉ាចំនួន ៤១០គ្រឿង នៅទូទាំងតំបន់ទេសភាពជួរភ្នំក្រវាញ ដើម្បីសិក្សា​ឱ្យ​បាន​ច្បាស់នូវរបាយចំនួនសត្វព្រៃ ដែលជាចំណីសត្វខ្លាឱ្យបានជាក់លាក់ ។ សត្វខ្លាធំទាំងនោះ នឹង​លែង​ក្នុងតំបន់ស្នូលនៃជួរភ្នំក្រវាញ ដែលត្រូវបានការពារ និងចាត់ទុកថា​មាន​សុវត្ថិភាព​បំផុត​ក្នុង​ការ​ស្តារសត្វខ្លាធំ នៅកម្ពុជាឡើងវិញ។ ក្នុងនោះដែរក៏មានបំពាក់ឧបករណ៍ GPS ដើម្បី​តាម​ដាន​ដឹង​ពីដំណើររបស់សត្វខ្លាធំទាំងនេះ ក៏ដូចជាការពារសុវត្ថិភាពពួកវា និងការពារ​ជាមុន​នូវ​សុវត្ថិភាព​ប្រជាពលរដ្ឋផងដែរ ។

គួរបញ្ជាក់ថា គម្រោងស្តារសត្វខ្លាធំឡើងវិញនេះ បានបង្កើតឡើងបន្ទាប់ពី​បាត់វត្តមាន​ពីទឹក​ដី​កម្ពុជា​កាល​ពីអំឡុងឆ្នាំ២០០៧ ខណៈនៅទូទាំងពិភពលោក គេប៉ាន់ប្រមាណថា​សត្វខ្លា​ធំនៅ​មាន​ប្រហែល ៣ ២០០ក្បាល នៅឆ្នាំ២០១០។ ចំនួននេះមានការថយចុះ ៩៥ភាគរយ បើ​ធៀប​នឹង​ចំនួន​សត្វខ្លាធំ ធ្លាប់មានវត្តមានក្នុងដើមទសវត្សទី២០ ដែលមានប្រហែល ១០ម៉ឺនក្បាល​នៅ​ក្នុង​ពិភពលោក​៕ អត្ថបទ បាន សុខរិទ្ធិ