នាវាចម្បាំងកងទ័ពជើងទឹកសហព័ន្ធរុស្ស៊ីចំនួនបីគ្រឿងកំពុងបន្តធ្វើទស្សនកិច្ចនៅកម្ពុជា

នៅថ្ងៃនេះ នាវាចម្បាំងកងទ័ពជើងទឹករបស់ប្រទេសរុស្ស៊ីចំនួនបីគ្រឿង កំពុងបន្តធ្វើទស្សនកិច្ចនៅកម្ពុជា ដើម្បីពង្រឹង និងពង្រីកកិច្ចសហប្រតិបត្តិការលើវិស័យកងទ័ពជើងទឹកកម្ពុជា-រុស្ស៉ី រយៈពេល៤ថ្ងៃ ពីថ្ងៃទី២៨ ខែមេសា ដល់ថ្ងៃទី១ ខែឧសភា ឆ្នាំ២០២៥។

កាលពីថ្ងៃទី២៨ ខែមេសា ឆ្នាំ២០២៥ នាវាចម្បាំងរបស់កងទ័ពជើងទឹកប្រទេសរុស្ស៉ីចំនួន ៣ គ្រឿង ដឹកនាំដោយវរនាវីឯក ALEKSEI ANTSIFEROV នាយសេនាធិការនៃផ្នែកនាវានៅលើផ្ទៃទឹកកងនាវាប៉ាស៊ីហ្វិក ប្រទេសរុស្ស៊ី បានចាប់ផ្តើមទស្សនកិច្ចនៅប្រទេសកម្ពុជា ដោយចូលចតនៅកំពង់ផែស្វយ័តខេត្តព្រះសីហនុ និងមានការទទួលស្វាគមន៍ដោយឧត្តមនាវីត្រី ជួន ទី មេបញ្ជាការរង បញ្ជាការដ្ឋានកងទ័ពជើងទឹកសមុទ្ររាម និងឯកឧត្តម អាណាតូលី បូរ៉ូវីក ឯកអគ្គរដ្ឋទូតរុស្ស៉ីប្រចាំកម្ពុជា។

ការបំពេញទស្សនកិច្ចរបស់នាវាចម្បាំងកងទ័ពជើងទឹកប្រទេសរុស្ស៉ីចំនួន៣គ្រឿង មាននាវិកសរុបចំនួន២៦២នាក់ ដោយក្នុងដំណើរទស្សនកិច្ចនេះ គណៈប្រតិភូនាវានឹងចូលជួបសំដែងការគួរសមជាមួយឯកឧត្តម មាំង ស៊ីណេត អភិបាលខេត្តព្រះសីហនុ, មេបញ្ជាការមូលដ្ឋានសមុទ្ររាម, មេបញ្ជាការកងទ័ពជើងទឹក នៃកងយោធពលខេមរភូមិន្ទ ព្រមទាំងមានការលេងកីឡាជាមិត្តភាពបាល់ទះ និងបាល់ទាត់ រវាងនាវិកកងទ័ពជើងទឹករុស្ស៊ី ជាមួយនាវិកកងទ័ពជើងទឹកមូលដ្ឋានសមុទ្ររាម។

ទស្សនកិច្ចនាវាចម្បាំងរបស់ប្រទេសរុស្ស៉ីនាពេលនេះ បង្ហាញពីការពង្រីកចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ ពិសេសការចូលចតរបស់នាវានេះធ្វើឡើងស្របខួបលើកទី៦៩ឆ្នាំ នៃទំនាក់ទំនងការទូតរវាងកម្ពុជា -រុស្ស៊ីផងដែរ។

សូមជម្រាបថា អំឡុងពេលនាវាចម្បាំងរុស្ស៉ីចំនួន៣គ្រឿងមកកម្ពុជា នាថ្ងៃទី២៧ ខែមេសា ឆ្នាំ២០២៥ ម្សិលមិញ មាននាវាកងទ័ពជើងទឹកប្រជាជនវៀតណាម ០១គ្រឿង លេខ២៦១ ដឹកនាំដោយវរនាវីឯកបំរ៉ុង ម៉ាយ ដាំងហ្សាញ់ មេបញ្ជាការរង និងជានាយ សេនាធិការបញ្ជាការដ្ឋានតំបន់៥ កងទ័ពជើងទឹកប្រជាជនវៀតណាម បានចូលសំចតនៅកំពង់ផែមូលដ្ឋានសមុទ្ររាម រយៈពេល៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែមេសា ឆ្នាំ២០២៥ ដើម្បីចូលរួមកិច្ចប្រជុំដកបទពិសោធន៍ការងារល្បាតរួមលើកទី៣៥រវាងកងទ័ពជើងទឹកកម្ពុជា-វៀតណាម៕ អត្ថបទ សេក ឧត្តម