ព្រះធម្មវនវាសី ចន្ទមុនី និងអភិបាលខេត្ត បាននិមន្ត និងអញ្ជើញទស្សនា​សមុច្ច័យដែល​មានដាក់តាំង​ក្នុងសារមន្ទីរខេត្តកំពង់ឆ្នាំង

ព្រះធម្មវនវាសី ចន្ទមុនី ព្រះសង្ឃាធិបតី វត្តចន្ទប្បជោត្តនារាម ហៅវត្តតាសុត និងឯកឧត្តម ស៊ុន សុវណ្ណារិទ្ធិ អភិបាលខេត្ត និងក្រុមការងារ បាននិមន្តនិងអញ្ជើញទស្សនានូវរាល់សមុច្ច័យដែលមានដាក់តាំងបង្ហាញក្នុងសារមន្ទីរខេត្តកំពង់ឆ្នាំង, ព្រឹកថ្ងៃទី៣០ ខែមេសា ឆ្នាំ២០២៥នេះ។

សារមន្ទីរខេត្តកំពង់ឆ្នាំង គឺជាមណ្ឌលប្រមូលផ្តុំបុរាណវត្ថុជាច្រើន ចាប់ពីសម័យបុរេប្រវត្តិសាស្រ្ត រហូតដល់សម័យបច្ចុប្បន្ន ដែលបានមកពីបុរាណដ្ឋាន និងរមណីយដ្ឋានប្រាសាទនានាក្នុងខេត្តកំពង់ឆ្នាំង។

សូមជម្រាបថា សារមន្ទីរខេត្តកំពង់ឆ្នាំង ជាតួអាគារមួយខ្នងលាបពណ៌ក្រហម ដែលសង់ជាទម្រង់មានកំពូលបុស្បុក លំអក្បាច់ ដោយចម្លងតាមលំនាំតួកណ្ដាល របស់សារមន្ទីរជាតិកម្ពុជា(ភ្នំពេញ)។

សារមន្ទីរនេះសាងសង់ឡើងចាប់តាំងពីថ្ងៃទី៣ ខែវិច្ឆិកា ឆ្នាំ២០០៧ នៅក្នុងដីឡូតិ៍របស់មន្ទីរវប្បធម៌ខេត្តដែលស្ថិតនៅចំពីមុខសួនទឹក ឯកឧត្តមបណ្ឌិតសភាចារ្យ អ៊ុក រ៉ាប៊ុន ជាប់ផ្លូវជាតិលេខ៥ ក្នុងភូមិទី១ សង្កាត់ខ្សាម ក្រុងកំពង់ឆ្នាំង៕ អត្ថបទ រដ្ឋា