ជាលើកទី១ ព្រះរាជពិធីបុណ្យច្រត់ព្រះនង្គ័ល​ប្រព្រឹត្តទៅនៅខេត្តកំពង់ឆ្នាំង

កំពង់ឆ្នាំង៖ ព្រះរាជពិធីច្រត់ព្រះនង្គ័ល និងតាំងពិព័រណ៍ផលិតផលកសិកម្ម សិប្បកម្មក្នុងស្រុក នឹង​ប្រព្រឹត្តក្រោមព្រះរាជាធិបតីដ៏ខ្ពង់ខ្ពស់បំផុតរបស់ ព្រះករុណាព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលព្រះរា​ជ​ពិធី​បុណ្យ​ច្រត់​ព្រះ​នង្គ័ល​ឆ្នាំ​នេះ នឹងប្រព្រឹត្តទៅក្នុងក្រុងកំពង់ឆ្នាំង ខេត្តកំពង់ឆ្នាំង នៅថ្ងៃទី១៥ ខែឧសភា ឆ្នាំ​២០២៥​ខាងមុខ។

រយៈពេលប៉ុន្មានថ្ងៃមកនេះ​សម្ដេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួង​ព្រះបរម​រាជ​វាំង និងជាប្រធានគណៈកម្មាធិការជាតិរៀបចំបុណ្យជាតិនិងអន្តរជាតិ, ឯកឧត្តម ស៊ុន សុវណ្ណ​រិទ្ធិ អភិបាលខេត្តកំពង់ឆ្នាំង និងឯកឧត្តមលោកជំទាវ លោក​លោក​ស្រី​ជា​ក្រុម​ការងារ​ថ្នាក់​ជាតិ និងក្រោមជាតិ បាន និងកំពុងមមាញឹកក្នុងការងារជាច្រើន ហើយបានអញ្ជើញ​ចុះពិនិត្យ​ទីតាំង​ទីលាន​ព្រះស្រែ មុខសាលាខេត្តកំពង់ឆ្នាំង ដែលក្រុមការងាររៀបចំបុណ្យជាតិនិងអន្តរជាតិ រួម​និង​ក្រុមការងារខេត្តកំពុងរៀបចំ ទីលានព្រះស្រែ ក៏ដូចជាពិនិត្យស្ថានភាព សាកល្បង គោ​ឧសភ​រាជ្យ ដែលនឹងត្រៀមគោរពព្រះរាជពិធី នាពេលខាងមុខនេះ។

ជាមួយនឹងសកម្មភាពពិនិត្យការងារដែលគ្រោងរៀបចំព្រះរាជពិធីច្រត់ព្រះនង្គ័ល និង​តាំង​ពិព័រណ៍​ផលិត​ផល​កសិកម្មសិប្បកម្មក្នុងស្រុក គេក៏សង្កេតឃើញមានកិច្ចប្រជុំ ជាញឹកញាប់ ស្ដីពីកា​រងារ​លម្អិត​ដែល​ត្រូវរៀបចំ ក្នុងព្រះរាជពិធីនេះ រួមនិងការការពារសន្តិសុខសណ្តាប់ធ្នាប់ ដើម្បីឲ្យ​ប្រព្រឹត្ត​ទៅ​បាន​យ៉ាងល្អប្រសើរ និងយ៉ាងឧត្តុងឧត្តមផងដែរ។

សូមបញ្ជាក់ផងដែរថា ព្រះរាជពិធីបុណ្យច្រត់ព្រះន័ង្គលនេះ គឺជាព្រះរាជពិធីបុណ្យ​មួយ​សម្រាប់​ដាស់​តឿន​ក្រើន​រំលឹកដល់បងប្អូនប្រជាកសិករខ្មែរអោយយល់ដឹង ព្រោះរដូវវស្សាមកដល់ ត្រូវ​ត្រៀម​ខ្លួន​រដូវ​ធ្វើស្រែចំការ ត្រូវត្រៀមឧបករណ៍ គ្រាប់ពូជ កម្លាំងអូសទាញ ដើម្បីធ្វើ​ស្រែ​ចំការ​ក្នុង​រដូវ​វស្សា​នេះឲ្យទាន់ពេលវេលា៕ កាំង ហុងវាស្នា