សម្ដេចធិបតី៖ នៅថ្ងៃស្អែកនេះ ក្រុមការងាររាជរដ្ឋាភិបាលនឹងបន្តចរចាលើការធ្វើពាណិជ្ជកម្មជាមួយអាមេរិក

ក្នុងឱកាស អញ្ជើញសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ ក្នុងឱកាសទិវាពលកម្មអន្តរជាតិ ថ្ងៃទី១ ខែឧសភា ឆ្នាំ២០២៥នេះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍បញ្ជាក់ថា នៅថ្ងៃស្អែក គឺថ្ងៃទី២ ខែឧសភា ឆ្នាំ២០២៥នេះ ក្រុមការងាររាជរដ្ឋាភិបាលកម្ពុជា នឹងបន្តធ្វើការចរចាម្ដងទៀតជាមួយអាមេរិកពាក់ព័ន្ធនឹងការធ្វើណាណិជុ្ជកម្មរវាងប្រទេសទាំងពីរ។

សម្ដេចធិបតី នាយករដ្ឋមន្រ្ដីមានប្រសាសន៍ថា កន្លងទៅនេះ ក្រុមការងាររាជរដ្ឋាភិបាលកម្ពុជា ដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជួបប្រធានតំណាងពាណិជ្ជកម្មរបស់អាមេរិកម្ដងរួចហើយកាលពីថ្ងៃទី១៦ ខែមេសា ដែលនេះបានបញ្ជាក់យ៉ាងច្បាស់ពីការទទួលខុសត្រូវ និងការខិតខំប្រឹងប្រែងរបស់រាជរដ្ឋាភិបាលចំពោះការចរចាលើបញ្ហាការធ្វើពាណិជ្ជកម្ម និងការអនុវត្តពន្ធដារថ្មីរបស់អាមេរិកចំពោះកម្ពុជា។

បើតាម ការបញ្ជាក់របស់ សម្ដេចធិបតី នាយករដ្ឋមន្រ្ដី មកដល់បច្ចុប្បន្នភាពការអនុវត្តការធ្វើពាណិជ្ជកម្មជាមួយប្រទសអាមេរិក មិនទាន់មានប្រទេសណាមួយបានចរចាបានត្រូវគ្នាលើអនុវត្តពន្ធថ្មី ជាមួយអាមេរិកនៅឡើយទេ ក្នុងចំណោមប្រទេសជិត ២០០ នៅលើពិភពលោក ពីព្រោះការចរចានេះ មានលក្ខណៈស្មុគស្មាញ។ ប៉ុន្ដែសម្រាប់កម្ពុជា សម្ដេចបានបញ្ជាក់ថា រាជរដ្ឋាបាលនឹងបន្តខិតខំ និងបានត្រៀមលក្ខណៈបន្តទៀត ដើម្បីធានាទៅដល់ការចរចា និងធានាចំពោះសេដ្ឋកិច្ច និងពាណិជ្ជកម្ម និងការងាររបស់ប្រជាពលរដ្ឋកម្ពុជា៕