តំបន់សហគមន៍នេសាទស្រីចឹកក្នុងខេត្តពោធិ៍សាត់សំបូរត្រីជាងមុន បន្ទាប់ពីមានការគាំទ្រ​ពីកម្មវិធី CAPFISH

តំបន់សហគមន៍នេសាទស្រីចឹក ស្ថិតក្នុងស្រុកកណ្ដៀង ខេត្តពោធិ៍សាត់ សំបូរត្រីច្រើនជាងមុន បន្ទាប់ពីមានការគាំទ្រពីកម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (CAPFISH-Capture)។

លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ទទួលបន្ទុក​ការងារ​ព័ត៌មាន និងទំនាក់ទំនងសាធារណៈ នៅថ្ងៃទី៣០ខែមេសា ឆ្នាំ២០២៥នេះ បាន​ដឹកនាំ​គណៈ​ប្រតិភូមកពីស្ថានទូតអឺរ៉ុបប្រចាំប្រទេសកម្ពុជា អង្គការស្បៀង និងកសិកម្ម​នៃសហប្រជាជាតិ (FAO) ប្រចាំនៅកម្ពុជា មន្រ្តីក្រសួងកសិកម្ម និងអ្នកសារព័ត៌មាន អញ្ជើញទៅទស្សនកិច្ចនៅតំបន់សហគមន៍នេសាទស្រីចឹក ស្ថិតនៅស្រុកកណ្តៀង ខេត្តពោធិ៍សាត់។

ក្នុងដំណើរទស្សនកិច្ចនេះ លោកជំទាវ អ៊ឹម រចនា បានមានប្រសាសន៍ថា តាមរយៈកម្មវិធី CAPFISH-Capture ដែលផ្តល់ហិរញ្ញប្បទានដោយសហភាពអឺរ៉ុប និងគាំទ្របច្ចេកទេសពី អង្គការស្បៀង និងកសិកម្មនៃសហប្រជាជាតិ (FAO) បានធ្វើឲ្យសហគមន៍នេសាទស្រីចឹកមានការអភិវឌ្ឍរីកចម្រើនទាំងសមត្ថភាពពលរដ្ឋរស់នៅក្នុងសហគមន៍ និងត្រីនៅក្នុងតំបន់សហគមន៍មានការកើនឡើងគួរឲ្យកត់សំគាល់ ដោយសារបទល្មើសមានការថយចុះ និងប្រជាពសហគមន៍ចេះពីរបៀបអភិរក្សមេពូជត្រីជាដើម។

លោក ឌុក សុខា ប្រធានសហគមនេសាទស្រីចឹក ប្តេជ្ញាបន្តថែរក្សាការពារ និងអភិរក្សត្រីនៅតំបន់សហគមន៍នេសាទស្រីចឹកឲ្យមានកាន់តែសំបូរថែមទៀត។ លើសពីនេះ លោកបានអគុណដល់សហភាពអឺរ៉ុបដែលបានផ្តល់ថវិការក្នុងមួយឆ្នាំ១ពាន់ដុល្លា និងអង្គការFAO បានជួយបណ្តុះបណ្តាលជំនាញបច្ចេកទេសដល់ប្រជាសហគមន៍។

លោកស្រី រេប៊ែកកា ប៊ែល (Rebekah Bell) ប្រធានអង្គការស្បៀង និងកសិកម្មនៃសហប្រជាជាតិ(FAO) ប្រចាំនៅកម្ពុជា បានថ្លែងថា អង្គការFAO ពិតជារីករាយក្នុងនាមជាដៃគូជាមួយរាជរដ្ឋាភិបាល ក្នុងការចូលរួមចំណែកជំរុញកំណើនជលផលនៅក្នុងប្រទេសកម្ពុជា។

គួរបញ្ជាក់ដែរថា បច្ចុប្បន្ននេះ រដ្ឋបាលជលផល (FiA) នៃក្រសួងកសិកម្ម រុក្ខាប្រមាញ់ និងនេសាទ (MAFF) បាននិងកំពុងអនុវត្ត «កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (CAPFISH-Capture)» ដែលផ្តល់មូលនិធិដោយ កិច្ចសហប្រតិបត្តិការអភិវឌ្ឍន៍សហភាពអឺរ៉ុប។ គោលបំណងនៃកម្មវិធីនេះ គឺដើម្បីលើកកម្ពស់កំណើនប្រកបដោយនិរន្តរ ភាព ភាពធន់នឹងអាកាសធាតុ និងបរិយាបន្ននៅក្នុងវិស័យជលផលទឹកសាប និងសមុទ្ររបស់ប្រទេសកម្ពុជា។

តាមរយៈកម្មវិធី CAPFISH-Capture អង្គការស្បៀងនិងកសិកម្មនៃសហប្រជាជាតិ (FAO) ផ្តល់ការគាំទ្រផ្នែក បច្ចេកទេសបន្ថែមដល់រដ្ឋបាលជលផល ក្នុងការអនុវត្តសកម្មភាពដែលបានចាប់ផ្តើមនៅខែកក្កដា ឆ្នាំ២០១៩ រហូតដល់ខែធ្នូ ឆ្នាំ២០២៥ ដើម្បីគាំទ្រដល់ការគ្រប់គ្រង អភិរក្ស និងការអភិវឌ្ឍធនធានជលផល។ អត្ថបទ៖ទូច សោភ័ណ