សហជីព និងកម្មករនិយោជិតនៅរាជធានីភ្នំពេញ ប្រារព្ធពិធីអបអរសាទរទិវាពលកម្មអន្តរជាតិ ១ឧសភា

នៅថ្ងៃទី១ ខែឧសភានេះ សហជីពធំៗចំនួន២ បានសហការគ្នាយ៉ាងជិតស្និទ្ធ និងកម្មកម្មករ កម្មការិនី​ចំនួនសរុបជាង ៣ពាន់នាក់ បានជួបជុំគ្នា​ដើម្បី​ប្រារព្ធ​ពិធី​អបអរ​សាទរ​ខួប​អនុស្សាវ​រីយ៍​លើក​ទី​១៣៩ នៃទិវាពលកម្មអន្តរជាតិ ក្រោមប្រធានបទ “សហជីពរួមគ្នាធ្វើឱ្យសហគ្រាសមួយ ជា​សហគមនសុខសាន្តមួយ” ដែលរៀបចំឡើងនៅមហោស្រពកោះពេជ្រ។

លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) បានមាន​ប្រសាសន៍​ប្រាប់​បណ្តាញ​អ្នកសារព័ត៌មាន ឲ្យដឹងថា ការរៀបចំកម្មវិធីនេះ គឺជាសក្ខីភាពនៃការបេ្តជ្ញា​ចិត្ត​ខ្ពស់​របស់​សហជីព​ទាំងអស់ រួមជាមួយរាជរដ្ឋាភិបាលក្នុងការលើកកម្ពស់នូវលក្ខខណ្ឌការងារ និង​សិទ្ធិ​សេ​រីភាព​អង្គការវិជ្ជាជីវៈ និងបា​ន​ចូលរួ​មចំ​ណែក​ក្នុង​ការព​ង្រឹងនូ​វ​យន្ត​ការ​ដោះ​ស្រាយ​វិវាទ​ការងារ​ដែល​អាច​កើតមានឡើងនៅកន្លែងការងារ សំដៅធ្វើឲ្យមានភាពកាន់តែប្រសើរឡើង នៃ​ទំនាក់​ទំនង​វិជ្ជា​ជីវៈ ដើម្បីឲ្យប្រែក្លាយពីសហគ្រាសមួយជាសហគមសុខសាន្តមួយ។

លោក មុំ សៀក ប្រធានក្រុមប្រឹក្សាសហជីពជាតិកម្ពុជា (CCNU) បានសម្តែង​ការអរគុណ​ចំពោះកម្មករ​និយោជិតទាំងអស់ ដែលបានខិតខំយកចិត្តទុកដាក់ខ្ពស់ក្នុងការប្រកបដោយគុណភាព ផលិតភាព និងភាពរីកចម្រើននូវចំណេះជំនាញរៀងៗខ្លួន ធ្វើឲ្យមានការកើនឡើងនូវផលិតផលគួរឲ្យកត់សម្គាល់។ លោកបន្ថែមថា ស្របពេលដែលកម្មករនិយោជិតបានខិតខំពង្រឹងសមត្ថភាពរបស់ខ្លួនក្នុងការចូលរួមធ្វើការងារបានល្អប្រសើរ ដោយមានការកើនឡើងនូវសេដ្ឋកិច្ចកម្ពុជាឲ្យកាន់តែរីកចម្រើនពីមួយឆ្នាំទៅមួយឆ្នាំ។

ក្រុមកម្មការិនី ដែលបានចូលរួមក្នុងកម្មវិធីខាងលើនេះ បានលើកឡើងអមជាមួយទឹកមុខសប្បាយរីករាយថា ការងារសព្វថ្ងៃនេះ ប្រសិនបើ មិនមានការជួយជ្រោមជ្រែងរបស់រដ្ឋាភិបាលនោះទេ ក៏ពួកគាត់គ្មានប្រាក់ចំណូលដើម្បីផ្គត់ផ្គង់គ្រួសារផងដែរ។ កម្មការនីទាំងនេះ បានឲ្យដឹងស្រដៀងគ្នាទៀតថា អ្វីដែលជាការកត់សម្គាល់ ក្រៅពីការតម្លើងប្រាក់ឈ្នួលអប្បបរមាជារៀងរាល់ឆ្នាំ រាជរដ្ឋាភិបាលកម្ពុជាតែងតែគិតគូរជានិច្ចក្នុងការទាក់ទាញអ្នកវិនិយោគពីបណ្តាប្រទេសផ្សេងៗឲ្យមកវិនិយោគនៅកម្ពុជា ដើម្បីធានាបាននូវច្រវ៉ាក់ផលិតកម្ម ផ្តល់មុខរបរ និងការងារប្រាក់ចំណូលទៀងទាត់ជូនដល់កម្មករនិយោជិតគ្រប់វិស័យទាំងអស់។

ពាក់ព័ន្ធការប្រារព្ធពិធីអបអរសាទរទិវាពលកម្មអន្តរជាតិ ១ឧសភានេះដែរ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចាត់ទុកកម្មករនិយោជិត គឺជាសមាជិកគ្រួសារ ជាកោសិកា ជាសរសៃឈាម និងជាដៃជើងដែលមិនអាចខ្វះបានក្នុងការចូលរួមចំណែកនាំកម្ពុជា និងសេដ្ឋកិច្ចកម្ពុជាឆ្ពោះទៅមុខ នាពេលកន្លងមក និងនាពេលខាងមុខ ខណៈពេលដែលរាជរដ្ឋាភិបាលបាននិងកំពុងបន្តទាក់ទាញវិនិយោគិនមកអភិវឌ្ឍសេដ្ឋកិច្ច និងបង្កើតសហគ្រាស បង្កើតការងារជាច្រើនជូនប្រជាពលរដ្ឋ។

យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ គិតត្រឹមខែមីនា ឆ្នាំ២០២៥នេះ អង្គការវិជ្ជាជីវៈដែលបានចុះបញ្ជីសរុបមានចំនួន ៦ ៦០០ ក្នុងនោះរួមមាន សហជីពមូលដ្ឋានជាង ៦ពាន់, សហព័ន្ធសហជីព២៨១, សហភាពសហជីព៤២ និងសមាគមនិយោជកចំនួន១២ ក្នុងចំនួននេះបានបញ្ជាក់ថា នៅកម្ពុជាសេរភាពសហជីពត្រូវបានមិនរើសអើង៕ អត្ថបទ៖ ឈិត បូរ៉ាវី