សម្ដេចធិបតី អំពាវនាវមន្រ្ដីគ្រប់ក្រសួងស្ថាប័ន ត្រូវពិនិត្យការនាំចេញទំនិញ ទៅក្រៅប្រទេសឱ្យបានសុក្រឹត

ក្នុងឱកាស អញ្ជើញសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែ ស្វយ័តក្រុងព្រះសីហនុ ក្នុងឱកាសទិវាពលកម្មអន្តរជាតិ ថ្ងៃទី១ ខែឧសភា ឆ្នាំ២០២៥នេះ ដែរសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវដល់មន្រ្ដីគ្រប់ក្រសួង ស្ថាប័ន ត្រូវអនុវត្តគោលការត្រួតពិនិត្យការនាំចេញផលិតផល ឬទំនិញពីកម្ពុជា ទៅក្រៅប្រទេស​ឱ្យបានសុក្រឹតជៀងវាងមានការចោទប្រកាន់លើការនាំចេញផលិតផលរបស់កម្ពុជាទៅក្រៅប្រទេស។

សម្តេចនាយករដ្ឋមន្រ្ដី បានណែនាំដល់មន្ត្រីពាក់ព័ន្ធត្រួតពិនិត្យ និងគ្រប់គ្រងឱ្យបានច្បាស់ ដើម្បី​កុំឱ្យមាននាំទំនិញមកវាយផ្លាកផលិតនៅកម្ពុជា ហើយនាំចេញទៅកាន់ប្រទេសដទៃ​ដើម្បី​បានរួចពន្ធ។ សម្តេចបានលើកបង្ហាញទិន្នន័យដែលបានស្រាវជ្រាវថា ឆ្នាំ២០២៤ អាមេរិកមាន​ឱនភាព​ពាណិជ្ជកម្ម (នាំចេញតិច នាំចូលច្រើន) ជាមួយប្រទេសជាង ១០០ប្រទេស។ ចំណែកប្រទេសចិន មានអតិរេក ១៥០ ប្រទេសនាំចេញចេញច្រើន នាំចូលតិច ជាពិសេស​នាំចេញផលិតផលសម្រេច និងវត្ថុធាតុដើមច្រើន។ រីឯ អាមេរិកនាំចូលច្រើន ព្រោះអាមេរិក ចំណាយលើការទិញច្រើន ខណៈចិនផ្អែកលើការផលិត និងនាំចេញ។

សូមជម្រាបថា នៅថ្ងៃទី៣០ ខែមេសា ឆ្នាំ២០២៥នេះ ក្រសួងពាណិជ្ជកម្មកម្ពុជា បានចេញ​សេចក្តី​ជូន​ដំណឹងស្តីពីការដាក់ឱ្យអនុវត្តនូវវិធានការសម្រាប់ការនាំចេញទំនិញ​មួយចំនួនទៅកាន់ទីផ្សារ​សហរដ្ឋអាម៉េរិក ក្នុងគោលបំណងបង្ការ និងទប់ស្កាត់ការក្លែងបន្លំដើមកំណើតទំនិញ និងជំរុញការ អនុវត្តច្បាប់ស្តីពីវិធានដើមកំណើតទំនិញប្រកបដោយតម្លាភាព សម្រាប់ការនាំចេញទំនិញ​មួយ​ចំនួនពីកម្ពុជា ទៅកាន់ទីផ្សារសហរដ្ឋអាម៉េរិក។ ជាមួយគ្នានេះ ក្រសួងបានជូនដំណឹងដល់ ផលិតករ និងអ្នកនាំចេញមិនតម្រូវឱ្យបង់កម្រៃសេវាសាធារណៈ សម្រាប់ការស្នើសុំលិខិត​អនុញ្ញាតបញ្ជាក់​ដើមកំណើតទំនិញនោះឡើយ៕ អត្ថបទ៖ វ៉ន ដារ៉ា