រដ្ឋមន្ត្រីទទួលបន្ទុកអាកាសចរណ៍ស៊ីវិល ដឹកនាំចុះពិនិត្យអាកាសយានដ្ឋានអន្តរជាតិតេជោ មុនថ្ងៃដាក់ឱ្យដំណើរការ

ថ្ងៃទី ២ ឧសភានេះ រដ្ឋលេខាធិការដ្ឋានអាកាសចរណ៍ស៊ីវិល បានដឹកនាំគ្រប់ផ្នែកពាក់ព័ន្ធ ដើម្បី ចុះពិនិត្យវឌ្ឍនភាព អាកាសយានដ្ឋានអន្តរជាតិតេជោ ដើម្បីពិនិត្យ និងសម្រេចថាតើថ្ងៃទី១០ ខែកក្កដា ឆ្នាំ២០២៥នេះ អាចដាក់ឱ្យដំណើរការជាផ្លូវការនូវអាកាសដ្ឋានអន្តរជាតិលំដាប់ថ្នាក់ទី៩លើពិភពលោកនេះបាន ដែរឬយ៉ាងណា។

ផ្តល់បទសម្ភាសន៍ឱ្យ BTV ឯកឧត្តម សយ សុខាន់ រដ្ឋលេខាធិការ នៃរដ្ឋលេខាធិការដ្ឋាន អាកាសចរណ៍ ស៊ីវិល បានបញ្ជាក់ថា ដំណើរការចុះពិនិត្យមើលអាកាសយានដ្ឋានអន្តរជាតិតេជោ ដែលមានភាគីពាក់ព័ន្ធថ្ងៃនេះ ពិតជាសំខាន់ណាស់ ហើយគោលបំណងសំខាន់ដើម្បីពិនិត្យមើលរាល់គ្រប់ផ្នែកនៃអាកាសយានដ្ឋានអន្តរ ជាតិតេជោ បានប្រព្រឹទ្ធទៅដោយរលូនឬបែបណាខ្លះ ពិសេសដើម្បីពិនិត្យរាល់ឧបករណ៍ ក្នុងការសម្រេច ឱ្យបានជាក់ល័ក្ខថាតើ នៅថ្ងៃទី១០ខែកក្កដា ឆ្នាំ២០២៥ អាចដាក់ឱ្យដំណើរការអាកាសយានដ្ឋានអន្តរជាតិមួយនេះ បានដែរឬយ៉ាងណា។

សូមបញ្ជាក់ថា អាកាសយានដ្ឋានអន្តរជាតិតេជោ សម្រេចបានប្រមាណជិត១០០%ហើយ ដែលអាកាស យានដ្ឋានមួយនេះ សាងសង់លើផ្ទៃដីសរុប ប្រមាណ ២,៦០០ហិចតា ជាប់រាជធានីភ្នំពេញ ខេត្តកណ្តាល និងខេត្តតាកែវ សាងសង់ដោយក្រុមហ៊ុន CAIC ដែលបណ្តាក់ទុនរួមគ្នា រវាងរាជរដ្ឋាភិបាលកម្ពុជា និងក្រុមហ៊ុន OCIC មានតម្លៃសរុបប្រមាណ ១,៥០០លានដុល្លារ និងជាអាកាសយានដ្ឋានអន្តរជាតិលំដាប់ 4F ដែលអាចទទួលយន្តហោះធំៗគ្រប់ប្រភេទលើ ពិភពលោក៕ អត្ថបទ៖ គង់ រ៉េន