សម្តេចធិបតី៖ សុក្រឹតភាព សុចរិតភាព និងការទទួលខុសត្រូវធ្វើឱ្យស្ថាប័នព័ត៌មានរក្សាបានប្រជាប្រិយភាពរឹងមាំ

ក្នុងឱកាសអញ្ជើញផ្តល់កិត្តិយសសំណេះសំណាល និងពិសាអាហារសាមគ្គីជាមួយអ្នកសារព័ត៌មានទូទាំងប្រទេស លើកទី៧ នៅល្ងាចថ្ងៃទី៣ ខែឧសភា ឆ្នាំ២០២៥នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីបានគូសបញ្ជាក់ទៀតថា កត្តាសុក្រឹតភាព កត្តាសុចរិតភាព និងកត្តាទំនួលខុសត្រូវ ជាធាតុដែលធ្វើឱ្យស្ថាប័នព័ត៌មានរក្សាបានប្រជាប្រិយភាពរឹងមាំ។

សម្តេចធិបតី បានបញ្ជាក់ថា ធាតុសំខាន់នៃសុក្រឹតភាព, សុចរិតភាព និងទំនួលខុសត្រូវនេះ បានធ្វើឱ្យស្ថាប័នសារព័ត៌មាន អាចរស់បានយូរ មានន័យថា មានកត្តា៣នេះទទួលបានការគាំទ្របានយូរអង្វែង ដូច្នេះសូមស្ថាប័នសារព័ត៌មានទាំងអស់បន្តអនុវត្តឱ្យបាននូវកត្តាចាំបាច់ទាំងបីនេះ។

សម្តេចធិបតី បានគូសបញ្ជាក់ថា ប្រសិនបើសារព័ត៌មានគ្មានសុក្រឹតភាព ផ្សព្វផ្សាយតែព័ត៌មានមិនពិត អ្នកសារព័ត៌មានផ្សាយព័ត៌មានខុស គឺមិនទទួលបានការគាំទ្រឡើយ។ បើជាអ្នកអាជីព ជាអ្នកវិជ្ជាជីវៈ ត្រូវប្រកាន់សុក្រឹតភាព ពីព្រោះកាលណាមានសុក្រឹតភាព អ្នកមើល អ្នកតាមដានព័ត៌មាន នឹងទៅរកវេបសាយព័ត៌មានដែលមានសុក្រឹតភាពជាទម្លាប់មិនខានឡើយ។

ក្នុងឱកាសនោះ សម្តេចធិបតី នាយករដ្ឋមន្ត្រី បានអំពាវនាវដល់អ្នកសារព័ត៌មាន សូមកុំយកអាជីពអ្នកសារព័ត៌មានឯករាជ្យ ទៅរំលោភបំពានសិទ្ធិអ្នកដទៃ គប្បីត្រូវមានសុចរិតភាព និងត្រូវមានព្រំដែនច្បាស់លាស់៕