ឯកឧត្ដម ហ៊ុន ម៉ានី ទទួលជួបជាមួយគណៈប្រតិភូយុវជន YLC នៃសមាគមប្រជាជនសិង្ហបុរី

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាចុងសប្ដាហ៍នេះ បានទទួលជួបជាមួយគណៈប្រតិភូយុវជន YLC នៃសមាគមប្រជាជនសិង្ហបុរី (People’s Association Singapore) នៅអគារ The Kampus ។ ការជួបសំណេះសំណាលនេះ មានការចូលរួមពី សមាជិក សមាជិកា និងរួមទាំងគណៈប្រតិភូយុវជនប្រមាណ ៧០នាក់ផងដែរ។

នាឱកាសនៃកិច្ចសន្ទនារវាងសហភាពសហព័ន្ធយុវជនកម្ពុជា (ស.ស.យ.ក.) និងគណៈប្រតិភូយុវជន YLC នៃសមាគមប្រជាជនសិង្ហបុរី (People’s Association Singapore) ឯកឧត្តម ហ៊ុន ម៉ានី ប្រធាន ស.ស.យ.ក. បានផ្ដល់ឱកាសឱ្យប្រតិភូយុវជនទាំងអស់ បានសិក្សាស្វែងយល់ឱ្យកាន់តែស៊ីជម្រៅពីបរិបទសង្គមរបស់ប្រទេសកម្ពុជាតាមរយៈការផ្ដល់ជាវេទិកា សំណួរ និងចម្លើយ ដោយបើកឱ្យប្រតិភូទាំងអស់បានជជែកពិក្សាជាមួយឯកឧត្តមផ្ទាល់ព្រមទាំងថ្នាក់ដឹកនាំដទៃទៀតផងដែរ។

ឆ្លើយតបទៅកាន់យុវជនដែលមកពីសមាគមន៍ប្រជាជនសិង្ហបុរីពាក់ព័ន្ធនឹងប្រធានបទ ពលរដ្ឋសកម្ម ( active citizens) ឯកឧត្តម ហ៊ុន ម៉ានី បានមានប្រសាសន៍ថា ពលរដ្ឋសកម្មគឺទាមទារឱ្យមានទំនួលខុសត្រូវ ការប្តេជ្ញាចិត្ត និងភាពរឹងមាំក្នុងការធ្វើការសម្រេចចិត្ត ដើម្បីចូលរួមចំណែកក្នុងការអភិវឌ្ឍសង្គម ជាក់ស្ដែង ស.ស.យ.ក.បានដើរតួនាទីយ៉ាងសំខាន់ក្នុងការលើកកម្ពស់ភាពជាពលរដ្ឋសកម្ម តាមរយៈការផ្ដល់ឱកាសឱ្យយុវជនបានចូលរួមការងារស្ម័គ្រក្នុងព្រឹត្តិការណ៍សំខាន់ៗជាច្រើនរបស់ ស.ស.យ.ក.។

ឯកឧត្តមបានបន្តថា មិនថានៅប្រទេសកម្ពុជា សិង្ហបុរី ឬប្រទេសដទៃនៅលើពិភពទេ ការចូលរួមរបស់ប្រជាពលរដ្ឋគ្រប់រូបគឺមានគុណតម្លៃសម្រាប់សង្គមជាតិនីមួយៗ ហើយការចូលរួមទាំងនោះគឺគប្បីកើតចេញពីការយល់ដឹង ការទទួលខុសត្រូវ និងការចូលរួមចេញពីចិត្ត។

ឯកឧត្តមបានបន្តថា ការកសាងសង្គមមួយឱ្យល្អប្រសើរមិនមែនជារឿងងាយទេ ប៉ុន្តែវាអាចផ្តើម​ពីជម្រើសផ្ទាល់ខ្លួនរបស់ពលរដ្ឋគ្រប់រូប តាមរយៈការចង់ធ្វើអ្វីមួយដោយចេញពីចិត្ត​ដើម្បី​ផលប្រយោជន៍រួមរបស់សង្គមជាតិខ្លួន ។

ជាមួយគ្នានេះ ឯកឧត្តម បានគូសបញ្ជាក់ថា សង្គមមានសន្តិភាព និងស្ថិរភាពនយោបាយ បានផ្តល់លក្ខណៈអំណោយផលសម្រាប់ ពលរដ្ឋសកម្ម ជាពិសេសយុវជនចូលរួម​កសាងសហគមន៍​មួយដ៏រឹងមាំ និងជំរុញការអភិវឌ្ឍ។

ឯកឧត្តមបានបន្តទៀតថា ​ជាក់ស្តែងប្រទេសកម្ពុជាផ្ទាល់ យើងធ្លាប់បានឆ្លងកាត់នូវសង្គ្រាម​រាំរ៉ៃអស់រយៈពេលជាច្រើនឆ្នាំ និងបានទទួលសុខសន្តិភាពពេញលេញ ​កាលពីចុងឆ្នាំ ១៩៩៨។ ដូច្នេះក្នុងនាមជាយុវជនជំនាន់ក្រោយ យើងត្រូវតែចងចាំថាបើទោះបីស្ថានភាព​ប្រទេសជាតិ​មានស្ថិរភាព និងបរិយាកាសល្អ តែយើងត្រូវតែត្រៀមលក្ខណៈចំពោះមុខគ្រាលំ​បាកណាមួយ​ដែលមិនអាចប៉ាន់ស្មានបាន ដែលទាមទារឱ្យយើងមានចិត្តគំនិត និងស្មារតីរួមគ្នាជានិច្ច៕ អត្ថបទ៖ គឹមហុក