ពលរដ្ឋ ថ្លែងអំណរគុណដល់ក្រុមការងារថ្នាក់កណ្តាលចុះឃុំពេជ្រចង្វារ ដែលបានដោះស្រាយបញ្ហាទីលានចាក់សំរាម បានជោគជ័យ

កំពង់ឆ្នាំង៖ ប្រជាពលរដ្ឋឃុំពេជ្រចង្វារ ស្រុកបរិបូណ៌ ខេត្តកំពង់ឆ្នាំង នៅថ្ងៃទី០៤ ខែឧសភា ឆ្នាំ២០២៥នេះ បានថ្លែងអំណរគុណដល់ ក្រុមការងារថ្នាក់កណ្តាលគណបក្សប្រជាជនចុះឃុំពេជ្រចង្វារ ដែលបានជួយដោះស្រាយបញ្ហាទីលានចាក់សំរាមរបស់ស្រុកបរិបូណ៌ ទទួលបានជោគជ័យ មិនឱ្យមានក្លិន និងឆេះមានផ្សែងពុលតទៅទៀត។

លោក ជា វ៉ិច មេឃុំ និងជាតំណាងប្រជាពលរដ្ឋឃុំពេជ្រចង្វារ បានថ្លែងថា កាលពីថ្ងៃទី២៨ ខែមេសា ឆ្នាំ២០២៥ ឯកឧត្តម កុល ប៊ុនលី ប្រធានក្រុមការងារថ្នាក់កណ្តាលចុះឃុំពេជ្រចង្វារ, ឯកឧត្តម គឹម រ័ត្នណារិន ប្រធានសាលាដំបូងខេត្ត, និងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូង​ខេត្តកំពង់ឆ្នាំង, ក្រុមការងារ និងប្រជាពលរដ្ឋ បានចុះមកដល់ទីតាំងទីលានចាក់សំរាមផ្ទាល់ និង​បានដោះស្រាយតាមយុទ្ធសាស្ត្រឈ្នះ ឈ្នះ ទទួលបានជោគជ័យ ដោយក្រុមហ៊ុនបាន​ទទួលយកនូវសំណូមពររបស់ប្រជាពលរដ្ឋ។ នៅថ្ងៃទី០៤ ខែឧសភា ឆ្នាំ២០២៥នេះ ឯកឧត្តម បានអញ្ជើញចុះពិនិត្យម្តងទៀត ដោយឃើញខាងអ្នក​ម៉ៅការសំរាមស្រុកបរិបូណ៌ បាន និងកំពុងជីករណ្តៅទុក​ដាក់សំរាមតាមលក្ខណៈបច្ចេកទេស និងមិនមានសំរាម ណានៅទីលាននោះ ត្រូវបានបន្តឆេះទៀតនោះទេ។

ប្រជាពលរដ្ឋ បានថ្លែងអំណរគុណយ៉ាងជ្រៀលជ្រៅដល់ឯកឧត្តមប្រធានក្រុមការងារចុះឃុំពេជ្រចង្វារ ឯកឧត្តមប្រធានសាលាដំបូងខេត្ត ឯកឧត្តមព្រះរាជអាជ្ញាអមសាលាខេត្តកំពង់ឆ្នាំង និងក្រុមការងារដែលបានជួយជ្រោមជ្រែងអោយទទួលបានជោគជ័យដូចថ្ងៃនេះ។

ក្នុងពេលចុះពិនិត្យទីលានចាក់សំរាមនោះឯកឧត្តម កុល ប៊ុនលី បានអោយខាងអ្នកម៉ៅការ ជីករណ្តៅកប់សំរាមអោយបានលឿន និងតាមបច្ចេកទេស កុំទុកសំរាមនៅពាសវាលពាសកាល ព្រោះទីលានទុកដាក់សំរាមនេះ ជាប្រភពមេរោគដ៏ធំប្រសិនបើយើងមិនទុកដាក់តាមបច្ចេកទេសទេនោះ។ ម្យ៉ាងទៀត អ្នកម៉ៅការទុកដាក់សំរាម ត្រូវការពាររណ្តៅទុកសំរាមនោះ កុំអោយសត្វពាហនៈធ្លាក់ចូលនាំអោយមានគ្រោះថ្នាក់ និងមិនត្រូវអោយសំរាមឆេះទៀតនោះឡើយ៕ កាំង ហុងវាស្នា