កសិករឃុំថ្មីស្រុកកំពង់រោទិ៍ខេត្តស្វាយរៀងសម្រេចផលិតស្រូវដើមរដូវបានជាង៦០%

ស្វាយរៀង ÷ ចលនាបង្ករបង្កើតផលស្រូវដើមរដូវវស្សា របស់ពលរដ្ឋនៅក្នុងភូមិចំនួន៦របស់ឃុំថ្មី ស្រុក កំពង់រោទិ៍ ខេត្តស្វាយរៀង បានចំនួនជាង៥០០ហិចតា តាមរយះអំណោយទឹកភ្លៀងបានបង្អុរជាបន្តបន្ទាប់ គួបផ្សំទៅនឹងប្រព័ន្ធធារសាស្ត្រ ដែលរាជរដ្ឋាភិបាលបានស្ថាបនាផ្ដល់ជូនពលរដ្ឋប្រើប្រាស់។

លោក ឡឹក សំអុន មេឃុំថ្មី នៅថ្ងៃទី៤ ខែឧសភា ឆ្នាំ២០២៥នេះ បានប្រាប់ទូរទស្សន៍BTVឲ្យដឹងថានៅចុងខែមេសា និងដើមខែឧសភា ឆ្នាំ២០២៥នេះកសិករនៅក្នុងភូមិចំនួន៦របស់ឃុំដែលមានប្រព័ន្ធធារាសាស្ត្រគ្រប់គ្រាន់ បានសម្រេចធ្វើការងារបង្កបង្កើតផលបង្កើនរដូវបានចំនួនជាង៥០០ហិចតាហើយ សម្រាប់ហូបចុកនិងបំរើទីផ្សារក្រៅស្រុក ខណះដែលឃុំនេះជាឃុំជាប់ព្រំដែនកម្ពុជា វៀតណាម ងាយស្រួលក្នុងការលក់ដោះដូរស្រូវ ។

លោកមេឃុំ បានបញ្ជាក់ថា ការដែលពលរដ្ឋនៅក្នុង ឃុំថ្មី ធ្វើស្រែមុនរដូវវស្សា គឺជាប្រពៃណីរបស់ពលរដ្ឋនៅក្នុងតំបន់នេះ ពីព្រោះតំបន់នេះជាតំបន់ រងជំនន់ទឹកភ្លៀង និងទឹកទន្លេនៅរដូវ វស្សា ដែលអូសបន្លាយពេលយូរទើបកសិករធ្វើស្រូវមុនរដូវ មួយវគ្គ និងនៅពេលទឹកសម្រកកសិករលោកធ្វើស្រែពីរវគ្គបន្ថែមទៀត បានន័យថានៅតំបន់នេះពលរដ្ឋគាត់ធ្វើស្រូវបាន៣ដងក្នុងមួយឆ្នាំ តាមរយះអំណោយទឹកភ្លៀង និងទឹកនៅក្នុងប្រព័ន្ធធារាសាស្ត្រធម្មជាតិ។