សម្តេចធិបតីឱ្យយកចិត្តទុកដាក់លើគុណភាព សុវត្ថិភាពចំណីអាហារ និងការប្រើថ្នាំគីមីដើម្បីបង្ការជំងឺមហារីក

នៅក្នុងឱកាសអញ្ជើញជាអធិតី ប្រកាសដាក់ឱ្យអនុវត្តជាផ្លូវការ «ផែនការជាតិប្រយុទ្ធនឹងជំងឺមហារីក២០២៥-២០៣០» នៅព្រឹកថ្ងៃទី៥ ខែឧសភា ឆ្នាំ២០២៥នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានណែនាំឱ្យភាគីពាក់ព័ន្ធត្រូវយកចិត្តទុកដាក់លើគុណភាព សុវត្ថិភាពចំណីអាហារ និងការប្រើថ្នាំគីមីដើម្បីបង្ការជំងឺមហារីក។

សម្ដេចធិបតី នាយករដ្ឋមន្រ្ដីបានថ្លែងបញ្ជាក់ថា ការព្យាបាលជំងឺមហារីក គឺជារឿងមួយត្រូវយកចិត្តទុកដាក់ ប៉ុន្ដែការបង្ការលើជំងឺមហារីក គឺរឹតតែចាំបាច់ថែមទៀត ដើម្បីកុំឱ្យជំងឺនេះមានការឆ្លងទៅដល់ប្រជាពលរដ្ឋតាមរយៈការយកចិត្តទុកដាក់លើគុណភាព សុវត្ថិភាពចំណីអាហារ លើការប្រើថ្នាំគីមីនេះឯង។

សម្ដេចធិបតី បានបន្តថា ចំពោះការផ្សព្វផ្សាយ ក៏ជាវិធីសាស្ត្រមួយអាចជួយបង្កើនការយល់ដឹងដល់ប្រជាពលរដ្ឋក្នុងការបង្ការជំងឺមហារីកផងដែរ។ ក្នុងន័យនេះសម្តេច បានជំរុញឱ្យមានការផ្សព្វផ្សាយឱ្យបានទូលំទូលាយពាក់ព័ន្ធបញ្ហាបង្ការជំងឺមហារីកនេះ។

បើតាម ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានឱ្យដឹងថា អត្រាមរណៈដែលបង្កឡើងដោយជំងឺមហារីក៖ មនុស្សស្លាប់ជិត ១៤ ០០០នាក់ ក្នុងមួយឆ្នាំ ស្មើនឹងអត្រាខ្ពស់លើស ៧០% ពីព្រោះអត្រាជាមធ្យមនៅលើពិភពលោកគឺ ៤៨%។ ឯកឧត្តម បានឱ្យដឹងថា ជារៀងរាល់ឆ្នាំ៖អត្រាមរណៈដោយសារជំងឺមហារីកនេះមានន័យថា មានមនុស្សស្លាប់ម្នាក់ដោយសារជំងឺមហារីក រៀងរាល់ ៤០នាទីម្តងនៅកម្ពុជា ឬប្រមាណ ៣៨នាក់ក្នុងមួយថ្ងៃ ធ្វើឱ្យគ្រួសារជាច្រើនធ្លាក់ទៅក្នុងទុក្ខលំបាក បន្សល់ទុក នូវកូនកំព្រា បុរសពោះម៉ាយ ឬស្ត្រីមេម៉ាយទុរគត។ កាន់តែគួរឱ្យសោកសង្រេងទៅទៀតនោះគឺសោកនាដកម្មនេះកើតមានលើកុមារផងដែរ៖ ដែលក្នុងមួយឆ្នាំ មានប្រមាណ ៦០០ ករណីនៅកម្ពុជា។ នៅទូទាំងពិភពលោក ជំងឺមហារីកកុមារអាចព្យាបាលជាសះស្បើយ ៨០% ប៉ុន្តែនៅកម្ពុជា អត្រានេះមានទាបជាង ២០%ប៉ុណ្ណោះ។ ប្រសិនបើស្ថានភាពនៅតែដដែល ជំងឺមហារីកនឹងឆក់យកជីវិតមនុស្សប្រមាណ ២១០ ០០០នាក់ ទាំងក្មេង និងចាស់ ក្នុងរយៈពេល ១៥ឆ្នាំខាងមុខ។ ចំនួននេះស្ទើរតែស្មើនឹងចំនួនប្រជាជនខេត្តស្ទឹងត្រែង ឬខេត្តកែប និង ខេត្តប៉ៃលិនរួមបញ្ចូលគ្នា ឬជិតស្មើនឹងចំនួនប្រជាជននៅក្រុងសៀមរាប៕ អត្ថបទ៖ វ៉ន ដារ៉ា