សម្ដេចធិបតី៖ ប្រទេសជាតិមួយអាចកសាងរីកចម្រើនទៅបាន គឺត្រូវមានមូលធនមនុស្សរឹងមាំ

ក្នុងឱកាសអញ្ជើញជាធិបតីសម្ពោធអគារអន្តេវាសិកដ្ឋានតេជោសន្តិភាព និងសមិទ្ធផលនានានៅវត្តស្វាយពពែ រាជធានីភ្នំពេញ នៅព្រឹកថ្ងៃទី៩ ខែឧសភា ឆ្នាំ២០២៥នេះដែរ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍បញ្ជាក់ថា ប្រទេសជាតិមួយអាចកសាងរីកចម្រើនទៅបាន គឺអាស្រ័យមានមូលធនមនុស្សរឹងមាំ ដូច្នេះទើបរាជរដ្ឋាភិបាលកម្ពុជាតាំងពីអាណត្តិមុន រហូតដល់អាណ្តិទី៧នេះផ្ដល់អាទីភាពទីមួយលើគោលនយោបាយជាតិចំពោះកសាងមូលធនមនុស្ស។

សម្ដេចធិបតី នាយករដ្ឋមន្រ្ដី បានមានប្រសាសន៍ថា ប្រទេសជាតិមួយអាចកសាងរីកចម្រើនទៅបាន គឺត្រូវមានមូលធនមនុស្សរឹងមាំ ដូច្នេះការកសាងមូលធនមនុស្សនេះ ត្រូវបានចាត់ទុកជាកត្តាដ៏សំខាន់ក្នុងការកំណត់កំណើនសេដ្ឋកិច្ច និងការអភិវឌ្ឍសង្គមកម្ពុជានាពេលអនាគត។

សម្ដេចធិបតី ថ្លែងថា ប្រទេសកម្ពុជា ប្រជាពលរដ្ឋមិនថាអ្នកមានឬអ្នកក្រ ឪពុកម្ដាយទាំងអស់ គឺចង់ឱ្យកូនបានរៀនសូត្របានខ្ពង់ខ្ពស់ពីព្រោះមានតែចំណេះវិជ្ជាទេដែលអាចជួយខ្លួនឯង គ្រួសារ និងសង្គមជាតិមានការរីកចម្រើនទៅបាន។

ក្នុងឱកាសនោះសម្ដេចធិបតី នាយករដ្ឋមន្រ្ដី បានផ្ដាំផ្ញើដល់សមណនិស្សិត និងនិស្សិតទាំងអស់ ឱ្យខិតខំសិក្សារៀនសូត្រ ស្វ័យសិក្សា ហើយត្រូវយល់ថាការរៀនសូត្រមិនមែនទទួលត្រឹមចំណេះដឹងនោះទេ ប៉ុន្ដែកត្តាធំបំផុតគឺការជឿជាក់លើខ្លួនឯង។ ចំណែកការរៀនជំនាញបច្ចេកទេស គឺជាជំនាញរឹងគឺរៀននៅក្នុងសាលារៀន ប៉ុន្ដែការរៀនពីចរិយាធម៌ សីលធម៌ គុណធម៌ គឺជាកត្តាសំខាន់ក្នុងការទទួលបានជំនាញទន់ អាចឱ្យសិស្ស និស្សិតធ្វើការនៅក្នុងសង្គមបានល្អជាមួយអ្នកដទៃ៕