ក្រុមហ៊ុនទឹកស្អាតអានកូក្រុងកំពង់ឆ្នាំង បន្តកាយដីចេញ ក្រោមការត្រួតពិនិត្យ​ពីក្រសួង​ធនធានទឹក

កំពង់ឆ្នាំង៖ នៅរសៀលថ្ងៃទី០៩ និងថ្ងៃទី១០ ខែឧសភា ឆ្នាំ២០២៥នេះ ក្រុមហ៊ុន​ទឹក​ស្អាត​អាន​កូ​ក្រុង​កំពង់ឆ្នាំង បន្តកាយដីចេញទៀតហើយ ក្រោមការត្រួត​ពិនិត្យ​តាម​ដាន​ដិត​ដល់​ពី​ក្រសួង​ធន​ធានទឹក និងឧតុនិយម ដែលមានឯកឧត្តម យិន ងួនកូលេនីន អនុរដ្ឋលេខាធិការ​ក្រសួង​ធន​ធានទឹក និងឧតុនិយម និងក្រុមការងារ លោក អឿ សារឿន ប្រធានមន្ទីរធនធានទឹកស្តីទី ដើម្បី​ឲ្យ​ក្រុម​ហ៊ុន​កាយដីចេញពីទីតាំងដែលខ្លួនបានចាក់ចូលទន្លេ​សាប​ជម្រៅ​៧០​ម៉ែត្រ​កាល​ពី​អំឡុង​ខែ​មីនា ឆ្នាំ២០២៥កន្លងមកឲ្យស្អាតតែម្តង។

ឯកឧត្តម យិន ងួនកូលេនីន បានថ្លែងថា ដីដែលក្រុមហ៊ុនបានចាក់ចូលទន្លេនេះ មិនអាច​កាយ​ចេញ​តែ​​ក្នុង​រយៈពេល៥ទៅ៧ថ្ងៃរួចនោះឡើយ ព្រោះទំហំដីដែលបានចាក់ចូលទន្លេនោះវាច្រើន នឹង​ត្រូវ​ប្រើពេលយូរថ្ងៃ។ ឯកឧត្តម និងក្រុមការងារ បានទទួលបញ្ជាពីឯកឧត្តម ថោ ជេដ្ឋា រដ្ឋមន្ត្រី​ក្រសួងធនធាទឹក និងឧតុនិយម មកពិនិត្យការកាយដីយកចេញវិញរបស់ក្រុមហ៊ុន រហូត​ដល់​សភាព​ដើម​។ ក្រុមហ៊ុនកំពុងកាយដីចេញ និងប្រើឡានដឹកដីចេញច្រើន គ្រាន់តែឡាន​ទាំង​នោះ​មាន​ទំហំ​តូចៗតែប៉ុណ្ណោះ។

ប្រជាពលរដ្ឋក្នុងខេត្តកំពង់ឆ្នាំង បានសាទរ អរគុណចំពោះចំណាត់ការរបស់ក្រសួងធនធានទឹក និង​ឧតុនិយមដែលមានឯកឧត្តម ថោ ជេដ្ឋា ជារដ្ឋមន្ត្រី អាជ្ញាធរទន្លេសាប និង​ក្រុម​ការងារ​ទាំង​អស់​ដែល​បានចូលរួមយ៉ាងសស្រាក់សស្រាំក្នុងការកាយដីដែលក្រុមហ៊ុនទឹកស្អាត​អានកូ​ក្រុង​កំពង់​ឆ្នាំង បានចាក់ចូលទន្លេសាបប្រវែង៧០ម៉ែត្រ។ ពួកគាត់សង្ឃឹមថា ក្រុមហ៊ុន នឹងមិនធ្វើ​អោយ​អាក់​ខានការកាយដីទាំងនោះចេញដូចមុនទៀតឡើយ នឹងបន្តកាយចេញ​ទាល់​តែ​អស់​ពី​ក្នុង​ទន្លេសា​ប​វិញ ដើម្បីកុំអោយមានពាក្យរិះគន់ពីប្រជាពលរដ្ឋ។ ពួកគាត់ក៏រង់ចាំមើល ថាតើក្រុមហ៊ុន បាន​កាយចេញទាំងអស់តាមវិធានការរបស់ក្រសួងធនធានទឹក និងអាជ្ញាធរទន្លេសាបឬ ក៏អត់ ព្រោះការចាក់ដីនេះ មានទំហំធំណាស់។

សូម​បញ្ជាក់ថា ការចាក់ដីចូលទន្លេសាបរបស់ក្រុមហ៊ុន ទឹកស្អាតអានកូក្រុងកំពង់ឆ្នាំង បាន​ធ្វើ​ឡើង​​នៅក្នុងអំឡុងខែមីនា ឆ្នាំ២០២៥ រហូតដល់ថ្ងៃទី១៨ ខែមេសា ឆ្នាំ២០២៥។​ ក្រោយ​សារ​ព័ត៌មាន​​ផ្សព្វផ្សាយបានដឹងដល់ក្រសួងធនធានទឹក និងឧតុនិយម និង​អាជ្ញាធរ​ទន្លេសាប​នៅ​ថ្ងៃ​ទី​១៩ ខែមេសា ឆ្នាំ២០២៥ ទើបមានការប្រជុំជាបន្តបន្ទាប់ និងបាន​ចាត់​វិធានការអោយ​ក្រុមហ៊ុន​នោះ​កាយ​ដីចេញពីទន្លេសាបវិញ រួមទាំងមានដាក់​ឱសាន​វាទ​ពី​ក្រសួង និងមន្ទីរធនធានទឹក, អាជ្ញាធរទន្លេសាប, និងអាជ្ញាធរខេត្តកំពង់ឆ្នាំង តែ​ក្រុម​ហ៊ុន​ទឹក​ស្អាត​អានកូ បានកាយដីចេញ​បាន​តែ​១ថ្ងៃ(ថ្ងៃ៣០ ខែមេសា ឆ្នាំ២០២៥) និងលែង​កាយ​បន្ត​ទៀត​ដោយ​មិនដឹងមូលហេតុ ទើបតែរសៀលថ្ងៃទី០៩ និងថ្ងៃទី១០ ខែឧសភានេះ បានឃើញកាយចេញថែមទៀត៕ កាំង ហុងវាស្នា