រដ្ឋមន្រ្តីការងារជំរុញគ្រឹះស្ថានបណ្ដុះបណ្ដាលជំនាញបន្តពង្រឹងគុណភាពសិស្សិដើម្បីឆ្លើយតបកំណើនសេដ្ឋកិច្ចជាតិទៅថ្ងៃអនាគត

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជា្ជជីវៈ និងឯកឧត្តម PARK Jong-Wook ឯកអគ្គរដ្ឋទូតនៃសាធារណៈរដ្ឋកូរ៉េប្រចាំកម្ពុជា នៅព្រឹកថ្ងៃទី១២ ខែឧសភានេះ បាន​អញ្ជើញជាអធិបតីក្នុងពិធីប្រារព្ធខួប២០ឆាំ្ននៃការបង្កើតវិទ្យាស្ថានជាតិពហុបច្ចេកទេសកម្ពុជា (NPIC) និងពិព័រណ៍ការងារលើកទី៤ ឆ្នាំ២០២៥ ស្ថិតនៅទំនប់កប់ស្រូវ ខណ្ឌពោធិ៍សែនជ័យ រាជ​ធានីភ្នំពេញ។

នៅក្នុអង្គពិធីនេះ ឯកឧត្តមរដ្ឋមន្ត្រី បានមានប្រសាសន៍ថា ក្នុងរយៈពេល២០ឆ្នាំមកនេះ វិទ្យាស្ថាន បានក្លាយជាគ្រឹះស្ថានបណ្តុះបណ្តាលជំនាញដ៏លេចធ្លោមួយដោយមានការទទួលស្គាល់យ៉ាងទូលំទូលាយនៅទូទាំងប្រទេស និងលើអន្តរជាតិតាមរយៈការរក្សាបាននូវគុណភាពបណ្តុះបណ្តាល បច្ចេក​វិទ្យាទំនើបៗ បរិយាកាសសិក្សា និងការងារដែលជាកត្តាផ្តល់ជូនសិស្សនិស្សិត និង​សិក្ខា​កាម​ឱ្យ​មាន​ទាំងចំណេះ ជំនាញ និងសីលធម៌វិជ្ជាជីវៈដែលបានធ្វើឱ្យក្រុមហ៊ុន ដៃគូនានា និង​អ្នក​ពាក់​ព័ន្ធ​ទុកចិត្ត និងជឿជាក់។ ឯកឧត្តម បានគូសបញ្ជាក់ថា កត្តាទាំងអស់​នេះ​ហើយ​បាន​ជំរុញ​ឲ្យ​ក្រសួង​ស្ថាប័ន វិស័យឯកជន ដៃគូអភិវឌ្ឍន៍ជាតិ និងអន្តរជាតិទទួលស្គាល់ថា វិទ្យាស្ថាននេះ គឺ​ជា​គ្រឹះ​ស្ថាន​អប់រំបណ្ដុះបណ្ដាលបច្ចេកទេស និងវិជ្ជាជីវៈមួយដែលមានសក្តានុពល និងសកម្ម ក្នុង​ការ​ចូល​រួមចំណែកកសាងមូលធនមនុស្សសម្រាប់គាំទ្រដល់សេដ្ឋកិច្ចកម្ពុជា។

ឯកឧត្តម ហេង សួរ បានសង្កត់ធ្ងន់ថា ខណៈដែល​រាជ​រដ្ឋាភិបាល​កម្ពុជា​កំពុង​អនុវត្ត​កម្ម​វិធី​បណ្តុះ​បណ្តាល​ជំនាញបច្ចេកទេសវិជ្ជាជីវៈ ១,៥លាននាក់ យ៉ាងសកម្មនោះ វិទ្យាស្ថានវិស័យអប់រំបណ្តុះបណ្តាលជំនាញ ធីវ៉េត ក៏បានដើរតួនាទីយ៉ាងសំខាន់បំផុតផងដែរ ក្នុង​ការបណ្តុះបណ្តាលជំនាញដល់ក្រុមយុវជនគោលដៅ និង​ប្រជា​ពលរដ្ឋ​កម្ពុជា​ឱ្យ​មាន​ជំនាញ​ច្បាស់​លាស់​ដែល​បាន​និង​កំពុង​ផ្តល់​ឱកាស​ឱ្យ​សិក្ខា​កាម​មាន​ការ​ងារ​នៅ​តាម​ក្រុម​ហ៊ុន​រោង​ចក្រ​សហ​គ្រាស និងការក្លាយជាម្ចាស់អាជីវកម្មផងដែរ។

យោងតាមរបាយការណ៍របស់ ឯកឧត្តម ប៊ុន ភារិន នាយកវិទ្យាស្ថានជាតិពហុបច្ចេកទេសកម្ពុជា (NPIC) បានឲ្យដឹងថា ក្រោមកិច្ចសហប្រតិបត្តិការជាមួយសាធារណរដ្ឋកូរ៉េ បាន​ចាប់​បើក​ដំណើរ​ការ​ដំបូង​នៅឆ្នាំ២០០៥ ដែលមានសិស្សចំនួនត្រឹមតែចំនួន ២០០នាក់ ជាមួយនិង៨មុខជំនាញ ប៉ុន្តែ​រហូតមកដល់បច្ចុប្បន្ននេះ វិទ្យាស្ថាន មានសិស្ស និស្សិតចំនួនជាង ៧ពាន់ ៨០០នាក់ ដែល​កំពុងសិក្សាលើមុខជំនាញ២៤ ខណៈ​ដែល​សិស្ស​និស្សិត​បាន​បញ្ចប់​ការ​សិក្សា​គ្រប់​កម្រិត​ប្រមាណ​ជាង ១ម៉ឺន ៣ពាន់នាក់ គិតត្រឹមឆ្នាំ២០២៤។ បន្ថែមពីនេះ វិទ្យាស្ថាន NPIC ក៏បាន​ចូល​រួម​យ៉ាង​សកម្ម​ក្នុង​ការអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេ ដល់យុវជនមក​ពី​គ្រួសារ​ក្រី​ក្រ និងគ្រួសារងាយរងហានិភ័យចំនួន ១,៥លាននាក់ ដោយគិតត្រឹមខែមេសា ឆ្នាំ២០២៥ សិក្ខា​កាមដែលបានបញ្ចប់វគ្គមានចំនួន ៨៨៤នាក់ ក្នុងនោះសិក្ខា​កាម​មួយ​ចំនួន​បាន​ក្លាយ​ទៅ​ជាម្ចា​ស់​អាជីវកម្ម និងមួយចំនួនទៀតកំពុងបម្រើការនៅក្នុងក្រុមហ៊ុន និងសហគ្រាសផ្សេងៗ៕ អត្ថបទ៖ ឈិត បូរ៉ាវី